韓式海帶蜆肉湯 Jogae Miyeokguk (조개미역국)

        今個禮拜又偷懶唔煲湯，試咗整 Gordon Ramsay 個西湯，效果都唔錯，不過份量只夠兩餐，所以今晚就另外再跟 Maangchi 姨學整海帶湯，遲啲先同大家分享番 Ramsay 個西湯啦！

 

        韓國人好鍾意煮海帶湯，不單只生日會整，就連生完 BB 之後都係飲海帶湯補身。Maangchi 姨係教用新鮮青口去煮海帶湯，但係邊度咁易買到新鮮青口呢！原本街市間「大昌」都有急凍藍青口賣，可惜街市重建又俾「領匯」迫走埋，所以我就改咗用蜆肉喇。當然，味道一定會差好遠，但調味之後都唔差呢！

 

 

材料：
韓國海帶
急凍蜆肉
蒟蒻芋絲
白蘿蔔
薑片
蒜蓉

調味料：
魚露
麻油

- 海帶用清水浸 30 分鐘，之後洗乾淨、瀝乾水，然後切段；蜆肉解凍後略沖洗。

- 芋絲過水後瀝乾水份備用；蘿蔔刨皮後切粒。

- 將海帶、蘿蔔同薑片凍水落煲，用中火煲 20 分鐘。

- 之後加入蜆肉、芋絲同蒜蓉，翻滾後即可熄火。

 

- 加少許魚露及麻油調味。

先買包細嘅海帶嚟試吓，試過之後覺得 OK

先再買包大嘅，價錢抵好多哦！

 

 
 
 
 
 

浸發前後完全兩個樣，拍得住啲整容廣告哦，呵呵！

 
 
 
 
 
 

        好彩我幫襯開嗰幾個檔口都抽中籤，可以留低喺度繼續營業，買慣買熟始終都好啲，我同菜檔老闆娘講蘿蔔太大條，一個人食唔到咁多，佢又搵唔到條細嘅俾我，於是佢就拗斷一截自己 “啃” 咗佢，等我可以買少啲，真係多謝哂老闆娘呀！

 
 
 
 
 
 

因為我習慣湯渣當餸食，所以我自己就加蘿蔔同芋絲一齊煮，

咁就唔使額外再整多樣餸；晏晝整鮮橙杏仁玉米蛋糕時

又用剩咗半隻蛋，倒埋落去做蛋花，無浪費呀！