手語

        一個唔識英文又唔識普通話嘅語言白痴，居然一生中比一般人學多幾種語言，真係攪笑！！讀書時 "被迫" 學習意、法、德三種語文，成績就當然唔好啦，依家就仲犀利，連手語都學埋，真係人都癲！！！！

 

        一直努力搵工，搵足年幾兩年都無著落，心都開始慌，因為穀種都睇住一直減少落去，所以都決定唔再淨係搵番老本行工作。上年一次搭巴士時，喺電視度睇到一個福利機構短片，話香港依家仍然好缺乏手語翻譯，好多聽障人士都好需要翻譯服務，鼓勵多啲人入行為聽障人士提供翻譯服務。當時即刻諗到呢樣工作都唔錯，一來可以幫到人，為聽障人士跟健聽人士互相溝通作橋樑，二來自己又可以多條出路選擇。正當我搵工搵到灰爆嘅時候，突然諗到早前幫過手做義工嘅組織，會唔會有工作機會或轉介，於是就 click 入網站睇睇，點知一入到網站，第一樣見到嘅嘢就係手語課程開班招生，而且學費都唔貴，負擔得起有餘，真係唔即刻報名都對唔住自己！！

 

 



雖然依家高班課程都真係好難，有好多嘢要兼

顧，希望盡力學習，若果學有所成，

幫到人又幫到自己啦！！

 
 
 
 
 
 

 

        對於我呢個語言白痴嚟講，雖然都有一定難度，特別係上課 drop notes 時要用文字去記低個動作，真係好困難，加上又老人癡呆嚴重，一下子要咁短時間記哂學過嘅手語都真係有難度。好彩阿 sir 好好人，肯俾我哋錄影，又會邀請聽障人士到課堂同我哋上課及傾偈，多啲實習，最終都慢慢開始上手。