烹飪課：印尼食品@煤氣烹飪中心 (補加相片)

        前幾日咪預告咗我會上堂學嘢嘅，其實係去咗煤氣中心度學整印尼食品呀！今次係我人生中第一堂烹飪課，覺得好好玩、好新鮮，學完又有得食，幾好呀！咁今次有呢個機會，我又要多謝好友 Louisa 喇，因為係佢出錢請我上課 o架！

        雖然今次係我第一次上課，但係對課程嘅導師就一啲都唔陌生，皆因之前我同導師都已經成日喺個 blog 度傾偈 o架喇，佢係邊個，咪就係好多人都識嘅 Rachel Yau 囉！如果有睇開我個 blog 嘅 blog 友都應該見到「我的 blog友」一欄都加咗佢個 blog 條 link 落去。

 

        好啦，言歸正傳，今次個課堂都好趕、好緊湊呀，事關要喺兩個鐘頭內學整 3 個食品，包括印尼糯米雞、印尼沙爹雞同椰汁班蘭糕。一入到中心，個環境已經一啲都唔陌生，因為喺電視成日都見到蘇施黃同 Jacky Yu 喺度教煮餸嘛，見埋 Rachel 就更加份外 "親切"，唔似以前去學嘢咁面對唔熟嘅學習環境同唔識嘅老師。不過當我見到其中一樣嘢時我就有啲標汗，都幾驚，就係果把傳統嘅中式菜刀喇！我喺屋企係用西式廚刀，即刻尖尖長長果隻呢！因為比較輕身，同埋望落無咁恐怖；而傳統嘅中式菜刀一向喺我心目中都係好重、好利，專係啲街市佬、癲佬揸住嚟 "斬人" 果隻，所以真係有啲驚 o架！！不過死就死啦，學 blog 友阿 Yen 話齋，都係要豁出去 o架啦！

        個印尼糯米雞同印尼沙爹雞係實習食品，即係可以落手落腳煮，但個椰汁班蘭糕就淨係睇 Rachel 示範，不過我哋都有得試食 Rachel 整果個o架！

        呢個就係色、香、味俱全嘅椰汁班蘭糕喇，係咪好靚呢，仲好好食 o添，煙煙韌韌，好香班蘭味同椰子味，正！咁啱之前我又買定個 6 吋方形 mousse 圈，諗住要嚟整 brownie，依家又可以用埋嚟整呢個椰汁班蘭糕啦，遲啲有時間我一定會整，因為真係好好食，唔知心急嘅 Louisa 等唔等埋我同佢一齊整呢？我諗佢多數都等唔切 o架喇，實會自己整先！

        跟住就係學整印尼糯米雞同印尼沙爹雞，整個沙爹雞時我又要 "豁多次出去"，因為平時喺屋企處理啲生肉時，我一定會戴手套，一來怕污糟，怕整到成手 "肥淋淋"、一陣味；二來因為我皮膚太乾，長期都會爆拆，怕會被生肉細菌感染之餘，之後要用洗潔精洗手時就越洗越乾，惡性循環，不過依家學嘢就無得再做 "少爺"，唯有再次 "死就死，豁出去啦"！

        呢度啲沙爹雞串同沙爺醬係 Rachel 整嘅，老師整嘅，當然好味啦！

        呢兩串就係我即時試做嘅，都 OK 好食喎，不過個沙爺醬就唔夠時間煮，所以就將啲材料拎咗返屋企慢慢整，今晚整好之後我就會影低張相，掟上嚟俾大家 "品評" o架啦！不過喺堂上睇 Rachel 整個沙爹醬，原來都唔難整喎，試食咗佢煮嘅沙爹醬，好正、好惹味，有些少似印尼沙律 Gado Gado 個花生醬咁味。

 

        最後就到印尼糯米雞喇，又係因為時間關係，喺堂上只可以蒸好啲糯米同煮好個餡料，一樣都係將啲半製成品拎咗返屋企，聽日有時間先包埋佢，到時再俾大家睇吓啦！當然，即時就梗係有得試食 Rachel 嘅手勢啦，同樣咁好食，加上我不嬲都鍾意食糯米整嘅嘢，所以我諗我得閒有時間就會整嚟食 o架喇！

 

        落咗堂之後，我同 Louisa 就梗係搵埋 Rachel 影番張相留念啦！

 

        咁難得見到 Rachel，我呢個小 fans 就當然把握呢次機會，帶埋之前買落 Rachel 寫嘅《為您做甜品》俾佢簽名啦！最衰 Vanlily 無出書啦，如果唔係，上次約佢拎啲玻璃曲奇時又拎埋本書俾佢簽名。

 

        Rachel 仲好好人，好有心思咁寫咗幾隻字俾我："Happy cooking！"  煮嘢食真係幾開心 o架，Yeah！所以下禮拜一我又會好開心喇，因為又整嘢食囉！整咩？咁大家就拭目以待喇。

 

        上完堂之後，我同 Louisa 就一齊返咗去佢屋企，正當我同 Arthur 上緊堂時， Louisa 就立即入廚房繼續完成埋堂上未整好嘅半製成品。整完出嚟都幾得 o架！之後我就幫佢擺到靚靚嚟影相，你哋睇，係咪好得呢！ Louisa 話我將啲食物全部放哂喺塊蕉葉上面好 gimmick 喎！

P.S.  當 Louisa 煮完個沙爹醬時，佢就同我講：「哎，我哋唔記得拎埋啲沙薑粉同芫荽粉返嚟呀！」我哋兩個食過個醬之後，都發現個味道真係差咁啲，事關沙薑粉個味好濃、好搶嘛！點解我哋咁失策 o架！

饅頭

        今日係舊曆十五，聰明嘅你梗知道係咩日子啦！今晚除咗有麥米番薯糖水之外，我仲整咗饅頭 o添！

材料：
中筋麵粉      250克
糖                  25克
黃豆粉          6克
速溶酵母      2.5克
泡打粉          4克
水                  110毫升

        食譜係參考自連愛卿嘅《一學就會做包子饅頭》。

 

- 將麵粉、黃豆粉、泡打粉、糖同酵母拌勻。

- 然後用打蛋器嘅麵糰攪槳邊攪邊加入水，慢慢攪成麵糰。

- 當麵糰攪至初步成形後，用刮板將麵糰拎出，放喺枱上用手搓至光滑。

- 將麵糰滾圓，收口向下，冚上保鮮紙發酵 10 - 15 分鐘。

- 之後將麵糰擀成扁平長方形，喺較長嘅一邊卷起成長條狀。

- 將麵糰切開到適當大小，靜置鬆弛 15分鐘。興此同時，煲滾定一鑊水。

- 將牛油紙剪開成同饅頭大小差唔多 size，用嚟做饅頭嘅墊底紙。

- 水滾後就將饅頭放上碟上或放入蒸籠，用慢火蒸約 8 - 15分鐘即成。

 

Notes：
- 我只係做咗原食譜嘅一半份量。

- 根據食譜，黃豆粉係用嚟增加饅頭嘅雪白，但我就唔多覺囉，反而顏色變得帶
  黃！不過食落口就有好香濃嘅豆漿味。

- 中筋麵粉係最適合用嚟整中式包點。

麥米番薯糖水

材料：
麥米
番薯
薑
片糖

- 麥米洗淨，用水浸過夜。

- 番薯刨皮後切件或大粒。

- 薑切厚片，備用。

- 除片糖外，將所有材料放入煲內煲滾，之後轉用中細火煲約 15 分鐘，然後校
  番大火再煲幾分鐘就放人真空煲內。

- 約 2 - 3 個鐘後，將番薯放上火煲番滾。與此同時，另外再煲滾水，放片糖落去
  煮溶成糖水。

- 將糖水倒入番薯裡面，拌勻，再次煲番滾就可以食喇！

Notes:
- 刨皮後嘅番薯要浸水，防止氧化變色。

- 麥米比較煙韌，所以用水浸過夜，等佢吸足夠水份就會無咁硬。

好興奮、好緊張呀！

        好耐都無試過上堂學嘢喇，真係好興奮、好緊張呀！因為我其實好 enjoy 學習自己有興趣嘅科目，聽日會去銅鑼灣上堂，上完堂先話俾大家聽我去學乜啦！

真係鑊鑊新鮮鑊鑊金！

        今日又要去廣播道教果兩兄弟，去到佢屋企門口，按鐘後佢哋老豆嚟開門，一見到我就話：「你嚟做乜呀？」 吓，我嚟做乜？我嚟得就梗係教琴啦！點知佢阿媽話，佢兩個去咗旅行，唔記得打電話通知我。

        頂，又唔早響，咁我早知就唔駛趕頭趕命啦！浪費哂我啲時間同車錢。

        點解佢哋咁經典 o架！真係鑊鑊新鮮鑊鑊金！

Amaronie's Little Italy @ 又一城

        星期二果日去 Louisa office 同佢上完堂之後，我哋就去又一城 join 埋學完溜冰嘅妹妹 Genevive 同 Frankie 一齊去食飯，今次 Louisa 就揀咗去 Amaronie's Little Italy 度食意大利菜，上次我同 Winnie 去唔成呢度食，今次終於有得試喇，真係多謝哂 Louisa！

        入到餐廳，果然好似 Miss 形容咁 "黑"，不過又未之於會瞓著覺！！

        牆上的大餐牌。

 

        Waiter 首先拎嚟餐前麵包伴意式油醋汁，個香草包好好食呀，我都已經唔知食咗幾多喇！如果無記錯，好似總共添咗 3 次。

 

        Frankie 幫我同 Louisa 影相時，因為影咗好耐，所以 Louisa 話我哋嚿麵包就嚟索滿哂醋，酸到唔食得！

 

        同 Arthur 影番張相先！

 

        姨媽同姨甥女幾好，攬到實影相！

 

        呢 "碗" 雜菜湯足夠成枱人飲喇。

 

        Louisa order 嘅飲品，唔知叫咩名，等佢自己嚟到先講番啦！不過佢話俾我聽係無酒精成份，仲有椰汁 o添。

 

        嘩，好大碟炸洋蔥絲呀！不過呢個小食就差啲喇，應該因為太多人嘅關係，廚房唔夠時間再翻炸，所以食落啖啖油。

 

        乜乜忌廉汁青口 ( 因為唔係我點菜，所以唔知叫咩名 )，好好食噃，特別係個忌廉汁，好香濃。

 

        Louisa 話要影吓隻肥嘟嘟嘅青口喎！

 

        呢個係芝士焗薯片。我知道面頭鋪滿哂芝士，所以我已經專登 "畢" 個底啲薯仔嚟試，但都係頂唔順，食得芝士嘅人應該覺得好食嘅。

 

        我一直都好想試 risotto，所以專登叫 Louisa 點一個俾我試，佢就揀咗呢個鮮雜菌 risotto。我以為食落口會好有 "生米" feel，但點知係好 "粉" feel，好似蒸蘿蔔糕裡面啲粉唔熟咁樣，Louisa 話應該唔係真 risotto，之前食過都唔係咁樣。不過個味道就調得幾好。  

 

        乜乜火腿意粉，啲 basil 味好香，不過碟粉就比較膩，食完成口都係油！

 

        食完哂主菜，就梗係要 order 個甜品先至叫做完滿嘅一餐啦！呢個 tiramisu 係 Arthur 點嘅，一送到埋嚟，個個就急不及待咁舉起匙羹 "畢" 嚟食，食到剩番咁多先至記得未影相。啲酒味好濃，可能因為呢個關係，所以唔係好食到芝士味。

 

        你睇，Arthur 食得幾開心，連剩喺碟上面果少少都唔放過，好似我咁有衣食。

 

        最後 Louisa 就幫我 order 咗杯咖啡，我揀咗杯 mocha。原來係連埋件小型 biscotti 一齊上 o架，不過我影相果陣就唔知道 ( 因為佢匿咗喺杯後面 )，所以無影到囉！杯咖啡好香濃、好滑，而 biscotti 就好香橙味，又鬆脆，好夾。

        今次呢餐食得好開心呀，之所以開心唔係因為唔駛出錢，唔係因為食到意大利菜，唔係因為食到我想食嘅 risotto，而係成餐飯個感覺好好，好開心，好 warm，自從媽咪離開咗之後，我都再無呢種感覺好耐，喺今次呢餐飯就搵番少少感覺，可能因為果晚好多人一齊食飯，好熱鬧啦！加上 Louisa 都係煮得之人，所以同佢一齊食嘢可以一齊研究味道、煮法、廚師手勢等等，第二個就唔得喇！

        其實平時喺 Louisa 屋企食飯都好好 feel，真係好似一家人咁，我當咗 Louisa 同 Frankie 係我父母， ( 雖然佢哋年紀做唔到我父母，但我一廂情願當係 o架啦，呵呵！) Arthur 同 Genevive 係我細佬妹咁，好有 "家" 嘅感覺，所以每次唔駛話要食到啲咩好餸都可以好有 feel、好開心，真係好羨慕佢哋有一個咁 warm 嘅 family，希望佢哋每個人都能夠好好珍惜對方，一直將呢個溫馨家庭維持落去。

夏果蜆肉炒四蔬

材料：
南瓜
西芹
馬蹄
乾蔥頭
急凍蜆肉
夏威夷果仁
蔥

調味料：
鹽
糖
紹酒
蠔油
黑椒粉
百里香 ( Thyme )
麻油

- 南瓜去皮、去瓤；西芹洗乾淨；馬蹄刨皮後浸喺喺水裡面，備用。

- 將南瓜、西芹同馬蹄切粒。

- 蜆肉解凍、洗乾淨，搾乾水份。

- 乾蔥頭去衣後一開四；蔥洗淨切段。

- 燒熱油，先爆香乾蔥頭，加入南瓜及西芹，灒酒、兜炒一陣間。

- 當南瓜同西芹軟身時，就放入蜆肉一齊炒，並加入鹽、糖同蠔油調味。

- 兜勻調味料後，就加埋馬蹄、蔥段落鑊、灑上黑椒粉同百里香。

- 灑上麻油，兜勻後就熄火，最後加埋夏威夷果仁就可以上碟。


Notes:
- 如果想南瓜同西芹較為腍身，可先將南瓜粒同西芹粒輕輕汆一汆水。

- 蜆肉唔駛太早落鑊，因為比較易熟，煮太耐會變韌。

- 記得熄咗火先至好加夏威夷果仁，因為溫度太熱會令到果仁變腍，唔鬆脆。

P.S.  其實今日呢個餸可以話係為咗 "清存貨" 而整！因為大部份材料都係啲剩餘物資：

        個有機南瓜係之前蒸咗一半剩低落嚟；乾蔥頭就上次整上海排骨菜飯時用剩嘅；而馬蹄就係星期三煲湯用唔哂。咁你話呢個菜係咪真係好似 "清貨大集匯" 呢！

 

雪菜肉鬆豆腐

材料：
硬豆腐
免治豬肉
雪菜
蒜茸
油爆紅椒粒

醃料：
生抽
鹽
糖
粟粉
油

調味料：
鹽
糖
紹酒
麻油

- 用醃料將豬肉醃半個鐘後，拌入粟粉同油，備用。

- 雪菜浸水 30 分鐘，洗淨後切細粒。

- 豆腐切粒備用。

- 先將豆腐粒煎到金黃色，盛起。

- 豬肉落鑊加少少水兜炒至 8 成熟及鬆散，盛起。

- 爆香蒜茸、雪菜同紅椒粒，灒酒，先將豬肉回鑊，兜炒至全熟，

- 加調味後，將煎香豆腐加埋落去，兜炒一陣，灑上麻油就可以上碟啦！

 

密實膜保鮮蓋

        噚日上去 Louisa 間 Office 前，去咗附近間「億世通」度買咗呢個密實膜保鮮蓋。

        早前喺「永安百貨」度都見到有得賣，單係最大果隻 size 已經要過百蚊一個，酬賓日果日見到減咗價都要成 $9X，依家呢個一套 4 件都只係 $38 咋，真係抵到爛，買嚟玩都抵！當然，永安賣果隻應該係 "來路" 貨，依家億世通呢隻係 "Made in China" o架！不過學 Louisa 咁講，即使牌子係外國都可能係大陸做，所以平平哋買套嚟試吓好唔好用先啦！

        用法都好簡單，只需將果保鮮蓋放上容器上面，跟住輕輕按下薄膜，容器內就呈真空狀態，將個蓋同容器迫到實一實，唔會咁易甩。要揭開嘛，只要喺個蓋果凹位手柄底下頂一頂起，疏一疏氣，咁就可以揭起喇！真係好方便，唔駛成日都用保鮮紙咁浪費兼唔環保。

        你睇，個蓋真係可以唔甩 o架！

屋企真係熱到爆燈！

        唉，間屋真係熱到嚇死人呀，早前放喺櫃裡面包淮山都冇乜點食過就 "au" 哂，仲攪到啲蟲飛到周圍都係；Winnie 專登買嚟送俾媽咪果幾枝蓮花，唔夠幾日就凋謝枯乾；最慘就係啱啱先買咗無幾耐果兩盆香草都遭殃，盆薄荷底部幾乎禿哂，啲葉就又燶又乾，盆羅勒仲死，三枝主幹中，其中一枝我諗應該報銷，成枝都乾旱，變成深啡色，另外兩枝啲葉就 "dup" 哂，不停脫落。個個都話香草好易種，我諗我呢兩盆香草都可以入健力士紀錄，係史上最快俾人種死嘅香草！

        依家勁唔開心囉，好 down呀，希望寄居喺 Louisa 屋企後有起色啦！

        真係記住唔好買西斜樓！！