與 blog 友交流煮食心得，分享生活點滴。
班戟好軟熟，仲有淡淡嘅香蕉味。
用糖漬橙蜜伴食都係一個唔錯嘅配搭。
一直都好想試吓自己整吉列豬扒，但係每次一諗起炸嘢鑊油就驚，所以遲遲都無行動。直至早排「JUSCO」會員日時喺超市度買咗包日式麵包糠返嚟，今日都卒之起心整喇！
材料：
脢頭豬扒
紅蘿蔔
蘋果
急凍粟米粒
椰菜
乾蔥頭
日式麵包糠
麵粉
雞蛋
醃料：
鹽
糖
日本醬油
清酒
調味料：
日式咖喱磚
鹽
糖
- 豬扒洗乾淨，用抹手紙索乾水份後用刀背將豬扒兩面拍鬆，之後再推回原狀。
- 用醃料將豬扒醃好備用。
- 蘋果去皮去芯、切粒；紅蘿蔔刨皮，切去頭尾後切粒；粟米解凍後沖水洗淨。
- 將紅蘿蔔同粟米汆水，瀝乾水份；乾蔥頭去衣、切去頭尾後開邊；椰菜洗淨、
切絲。
- 將雞蛋拂打成蛋液，豬扒沾滿麵粉後再蘸滿蛋液，最後沾滿麵包糠。
- 豬扒放入180 °C 滾油內炸熟至金黃色，其間需將豬扒翻轉。
- 炸好嘅豬扒放上吸油紙上，然後切件。
- 另燒熱油鑊，爆香乾蔥頭，之後加入蘋果、紅蘿蔔同粟米兜炒。
- 加入適量水煮至蘋果略軟身，然後加入調味料，煮至咖喱磚完全溶解即可。
- 椰菜絲鋪喺碟上，放上豬扒，然後淋上咖喱即成。
啱啱整起時熱辣辣又脆身，睇見都想死，可惜今日咁鬼死凍，
影完相之後都已經凍哂，仲有少少腍 o添呀！
食就好食喇，不過炸完嘢之後真係有排攪，成個爐頭都係哂油，
好彩地下唔係太多油咋，如果唔係就抹餐死喇，
食幾多都補唔番！真係炸一次驚一次！！
Notes：
- 若豬扒周邊有筋膜的話，最好喺四邊輕輕切一下，咁樣煎出嚟嘅豬扒就唔會鬈
起。
- 豬扒炸好後最好趁熱切件，可避免炸面被切爛。
- 蘋果與日式咖喱係最佳配搭。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
本來逢星期二都要去 Louisa 屋企教 Arthur，但係 Arthur 噚晚打電話俾我，話佢今日唔得閒上堂，所以今日就無端端變咗 dayoff 喇！
噚晚臨瞓前原本諗住今日反正無嘢做，不如解凍定啲材料今日整蛋糕，但係我都好有自知之明，好清楚自己會懶得就懶，尤其天氣咁凍，到最後都係會唔願郁，所以都係無將材料解凍，費事解完凍後唔整又放番上冰格。果然，今日真係無整啦！仲一瞓就瞓到差唔多成點鐘先起身，真係好耐都無試過咁瞓法喇！完全體現到 Motonako A. 所講，瞓到自然醒果種爽法！
我不嬲都好懶落街，唔駛出去教的話，盡可能都唔會出街，所以好習慣一日買定幾日嘅餸，但係因為無諗過今日會唔駛出街兼要喺屋企煮嘢食，所以之前買餸就無預備到今日，咁就唯有食屋企存貨喇！
晏晝好簡單，食兩塊麵包，仲杯咖啡就算喇！
睇吓我幾懶，焗番熱個麵包就當一餐，連咖啡機都懶用，
即沖三合一攪掂。
呢個麵包來頭不少，喺台灣坐飛機返嚟 o架！係 Louisa 個姨甥買返嚟嘅，
叫做「天下第一包」喎！Louisa 叫我自己切啲拎走，
咁我就唔客氣咁切咗一角。
用錫紙包住焗番熱嚟食，真係唔錯喎，皮脆肉軟。最特別係啲餡，
有合桃同乾果，如果無估錯的話，啲乾果應該係圓肉嚟 o架，
真係未試過，下次整包包時都試吓用圓肉先！
至於夜晚果餐，當然又係屋企有乜就食乜啦！所以材料都好簡單：risotto、乾菌、蒜頭、乾蔥頭、煙肉同香腸就攪掂！
好簡單嘅一個小食，香腸煙肉卷，無論點茄汁定係芥末蛋黃醬，
都一樣咁好食。
仲有簡化版嘅雜菌 risotto，蒜茸同乾蔥茸起鑊炒香姬松茸同牛肝菌，
又無用白酒，又無落雞湯，淨係用咗浸菇水，加啲雞粉、
鹽、香料同黑椒粉調味就算數。
食完飯，整個蘋果做飯後果，咁就完成咗全日嘅飲食，我係咪好懶呢！
懶咗一日，瞓醒後就要迎接每星期最討厭嘅一日，就係星期三嘅清潔日，咁多種家務之中，我最憎就係做清潔 o架喇，洗碗都一樣咁憎！！ 依家諗番起上嚟，以前媽咪真係好叻，正確啲嚟講，應該係話佢好捱得，因為以前我都無乜點幫佢做清潔，淨係做埋哂啲好 "輕 can" 嘅嘢，老豆都只係一年一度嘅大清洗，媽咪佢一個人攪掂哂全屋，又拖地、又抹地方又抹窗，依家自己同老豆 share 各做一半，我都覺得好辛苦，唔怪得之以前媽咪有時唔開心或激氣時，真係會乜都鬧得出口，梗係啦，佢做嘢做得咁辛苦，又要煮飯，仲要全部都係 "義工"，我哋都只係幫得少少手。唉，可能就係因為咁而積勞成疾，所以咁早就離開咗我哋！依家先後悔已經太遲喇，一切已經返唔倒轉頭喇！！！！
原來已經半年有多無整過韓國年糕喇，今晚又再整嚟食先！
不過今次煮法同上次唔同，我諗呢次煮法應該正宗啲，因為我喺 YouTube 度睇到好幾位韓國人示範，佢哋嘅煮法都係差唔多，所以我估應該係正宗韓式煮法。當然，配料我就無跟足啦，都係跟自己口味而選擇啫！
材料：
韓國年糕
翠玉瓜
急凍雞扒
蒜茸
醃料：
雞粉
糖
生抽
紹酒
粟粉
油
調味料：
鹽
糖
生抽
韓國辣椒醬
辣椒粉
雞粉
- 雞扒解凍後切去皮及脂肪，沖洗乾淨後切成雞柳，用醃料醃好。
- 年糕放入滾水內煮約 4 - 5 分鐘，之後過冷河，瀝乾水份。
- 翠玉瓜洗淨後去蒂，切件備用。
- 慢火熱鑊，將調味料及蒜茸放入鑊內拌勻，加入雞柳用中火兜炒至半熟。
- 加入年糕及適量水，用中慢火繼續煮。
- 當年糕煮至軟身及汁開始變得濃稠時，就加埋翠玉瓜落鑊一齊煮。
- 翠玉瓜煮到適當腍度時就可以熄火上碟。
-上碟後灑上炒香白芝麻即可享用。
今次跟咗正宗嘅方法去整，年糕不但軟糯凐韌，連味道都好味好多呀！
食完辣嘅炒年糕，最好就係整番碗桂花海底椰雪梨糖水潤番下，
咁就唔駛怕熱氣啦！
Notes： - 若果用上湯代替水就唔駛再落雞粉。 - 想翠玉瓜保持爽口的話就唔好煮太耐。
- 煮年糕時記得間中兜炒一下，以防黐底，若中途水份唔夠的話，需酌量加水。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
今晚煲咗個桂花海底椰雪梨糖水，簡直又暖、又甜、又滋潤呀！
材料：
雪梨
新鮮海底椰
南北杏
糖桂花
冰糖
- 海底椰切去外皮後切粒；南北杏洗淨後用清水浸15分鐘；雪梨去皮、去芯，切
粒備用。
- 將以上三樣材料凍水落煲，煲滾後轉慢火繼續煲。
- 差不多煲好後就加入冰糖，直至冰糖完全溶解。
- 最後加入適量糖桂花，拌勻即可。
Notes：
- 想方便的話，可買現成糖桂花代替。
- 新鮮海底椰用唔哂的話，可放入冰格保存，解凍後即用。
- 加入糖桂花後可先試味，若果唔夠甜的話，可再加冰糖。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
繼續整餅，今次試整嘅係和風餅乾，仲要玩埋螺旋雙色 o添呀！
材料：
牛油 100 克
糖霜 80 克
低筋麵粉 165 克
抹茶粉 15克
雞蛋 1隻
以上材料份量可做 20 - 25 塊餅乾。
食譜出自福田淳子嘅《我愛和風洋菓子》。
- 牛油於室溫放軟；麵粉及抹茶粉分別過篩；將蛋黃及蛋白分開。
- 牛油同糖霜用電動打蛋器打至發白，之後加入蛋黃拌勻，平均分成兩份。
- 將 100 克麵粉篩入其中一份蛋油混合物內；剩低嘅 65 克麵粉與抹茶粉混合好，
篩入另一份混合物內。
- 兩份混合物分別搓成麵糰，用保鮮紙包好，放入雪櫃內雪約 1 個鐘。
- 拎出雪凍麵糰，用擀麵棍將麵糰分別幹開成3毫米厚、約 20 厘米長嘅方形麵
皮。
- 蛋白略拂勻，然後均勻地搽適量喺白麵皮上。
- 放上綠色麵皮，切齊四邊，之後再喺綠色麵皮上搽適量蛋白。
- 捲起麵皮，用保鮮紙包好，放入雪櫃內雪約 1 個鐘。
- 拎出麵糰，每隔5毫米闊切開，然後放上已鋪牛油紙嘅烤盤上，放入已預熱至
170 °C 嘅焗爐內焗 15 - 20 分鐘。
- 出爐後攤凍即可享用。
爐溫唔得平均，有啲焗得比較深色，而且捲麵皮時又唔係咁熟手，
所以捲得唔夠靚，下次要留意。不過味道絕對唔差，
好濃綠茶味呀！
Notes：
- 原食譜係用糖粉而唔係糖霜。
-麵糰放入雪櫃雪凍時間以麵糰雪至硬身為準。
-麵糰放上烤盤時，麵糰之間記得預留位置膨脹。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
接到 Winnie 嘅 order 要幫佢整曲奇送禮，今日 dayoff 喺屋企就試做咗個花生醬曲奇。呢款曲奇簡單易做，而且花生醬又夠香口，對方應該都會鍾意。
材料：
牛油 100 克
花生醬 100 克
糖 100 克
雞蛋 1 隻
低筋麵粉 150 克
泡打粉 1/2 茶匙
鹽 少許
以上材料份量約可做20塊曲奇。
食譜嚟自潘行莊嘅《妙趣曲奇》。
- 牛油於室溫放軟；雞蛋拂打成蛋液；麵粉及泡打粉過篩 3 次。
- 將牛油、花生醬同糖拌勻，加入蛋液混合，之後篩入粉類及鹽，搓成麵糰。
- 將麵糰分別搓成直徑約 2 厘米嘅小球，放上已墊入爐紙嘅烤盤上，然後壓平。
- 烤盤放入已預熱至 190 °C 嘅焗爐內焗約 12 分鐘即成。
鍾意花生醬嘅朋友，真係唔好錯過呢個花生醬曲奇呀！ - 搓麵糰時覺得比較軟身，所以額外加多咗少少麵粉。 - 如果鍾意食到有花生碎的話，可用粗粒花生醬製作。
Notes：
- 個人覺得成品較甜，所以糖嘅份量可以酌量減少。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
