2012年2月19日星期日

自家製焗燒肉

    原本都諗住唔寫番呢個燒肉食譜,因為其實已經係做冬嗰日整 o架喇,不過有 blog 友話佢跟書整燒肉覺得比較繁複,見我呢個方法好似方便啲,希望我可以分享食譜俾佢參考吓,加上之前喺 Facebook post 過張相,個舊同學即刻問我點整,咁我就應承佢遲啲有時間寫好食譜就通知佢啦。


 


    既然應承得人會做,咁就一定要做到 o架啦!你哋知啦,家吓好講誠信 o架嘛,如果你無誠信的話,分分鐘俾幾廿架吊臂車高抄嚟影呀!
   





材料:
五花腩   1 1/2 - 2
粗鹽   適量


 


醃料:
玫瑰露   1 茶匙
  2 茶匙
  5 茶匙
沙薑粉   1/2 茶匙
五香粉   1/2 茶匙
磨豉醬   1/2 湯匙


 


- 五花腩洗乾淨,去毛後放滾水內汆水 10 分鐘,過冷河後抹乾水份。


 


- 先用豬皮插喺豬皮上插孔,然後將玫瑰露搽勻豬肉部份。


 


- 2 茶匙糖、鹽、沙薑粉及五香粉拌勻,再搽上肉面。


 


- 磨豉醬及剩餘 3 茶匙糖拌勻後喺豬肉底部。


 


- 用錫紙包好腩肉底部及四周,然後喺豬皮上鋪上粗鹽,要完全蓋住整塊豬皮。


 


- 將腩肉放入雪櫃內醃過夜。


 


- 第二日將腩肉直接放入已預熱至 220 °C 嘅焗爐內焗 20 分鐘。


 


- 拎出腩肉,將表面粗鹽刮走,再放番入焗爐內。


 


- 繼續焗多 30 - 60分鐘至豬肉熟透即可。






呢個就係豬皮插喇,用佢嚟插豬皮真係易如反掌,
如果用叉插的話會嘥好多氣力呀!







豬皮起哂泡,勁鬆脆,化皮燒肉都可以自家焗製喇!




Notes


- 豬皮一定要保持乾爽,否則焗完之後就唔可以做到鬆化脆皮效果。


 


- 豬皮插孔可以令豬油滲出,將豬皮焗至鬆脆。


 


- 豬肉放入雪櫃時毋須封蓋豬皮,藉此將豬皮水份抽乾。


 


- 包錫紙時,錫紙必須高出豬皮約一吋長度,方便撒上粗鹽覆蓋豬皮。


 


- 留意避免粗鹽跌落豬肉度,否則焗好之後豬肉味道會非常鹹


 

- 入爐時間需視乎腩肉大細及爐溫而作出適當調整。

5 則留言:

  1. 呢味野我成世都唔會食.
    [版主回覆02/22/2012 16:19:56]點解?怕肥?

    回覆刪除
  2. 我用鹽醃住嚟焗都好正哦!
    [版主回覆02/23/2012 01:25:09]即係全程由生到熟都係連埋鹽一齊焗?

    回覆刪除
  3. 謝謝分享食譜!待我拿到豬皮插之後,便會試做。熱切期待!
    [版主回覆02/26/2012 12:35:50]咁又唔駛鳴謝咁誇張,我都只不過係同大家分享一下啫,不過我都好想知道其他人可唔可以做得比我更好,或者有更好心得交流呀,因為我呢個食譜其實係綜合咗三個唔同做法於一身,所以我知道其實個成功率都幾高。
    期待睇妳嘅傑作出爐呀!
    [熊貓泰山回覆02/26/2012 11:28:23]好的。到時一定要鳴謝你啊!不過最快要三月底才能做。
    [版主回覆02/26/2012 00:51:17]咁妳如果成功整到之後記得話我知喇!最好有相睇o添啦!

    回覆刪除
  4. 想問下, 我飛水後點插都插唔入, 塊皮好硬呀 ?? 係唔係我飛水唔夠耐 ?? 定係過咗龍 ?? 攪到焗完之後塊皮好硬又唔脆 ?? 請指教 ~
    [版主回覆04/18/2012 17:33:53]指教就唔敢當,大家分享一下吧!
    妳係用乜工具嚟拮窿呀?豬皮真係幾難插o架,用叉都唔係好插得入,除非用好尖嘅叉啦!所以做好都係用豬插,夠快又夠效率,如果真係無的話,咁要用利針先插得入喇!
    焗好之後豬皮硬而唔脆,就係因為拮窿拮得唔夠多,水份同油份都走唔到出嚟,妳可以試試刮走鹽後搽少少油上豬皮面,之後先入爐焗,應該會有改善。
    希望成功!

    回覆刪除
  5. 有呀, 我買咗豬插, 就係插都插唔入, 要成個人瞓身出力先可以入咗少少, 係唔係我飛水唔夠耐呢 ?? 我都唔係飛水, 係將煲起熱水沖落塊豬到, 唔知係唔係咁樣出事呢 ??
    [版主回覆04/20/2012 15:56:05]係要將嚿腩肉放入滾水煮10分鐘o架,一來將個皮稍為煮軟,二來將油份盡可能迫出,唔可以就咁沖水落去o架!妳再試多次啦,個豬插咁鬼利,我洗番乾淨時都好驚拮嚫手,點會插唔入豬皮呀!

    回覆刪除