腰果薑餅 Cashew Ginger Cookie

想整薑餅好耐，上年年尾已經想整，不過怕大家誤會我係因為聖誕節而整，所以最終都無整到。之後就一直好忙喇，直到今個月先叫做好少少，之但係早排天氣又勁潮濕，100% 相對濕度都試過，咁點整呀！？唔通真係呢頭出爐，嗰頭就即刻受潮咩，咁就真係搵工夫嚟做囉！！

 

    依家天氣夠哂乾燥啦，我啲手指都已經爆開哂，依家都仲唔整的話，仲等幾時？又係跟本鬼佬食譜整，我自己再加入腰果，夠哂香口呀！

材料：
腰果   80 克
低筋麵粉   315 克
薑粉   1 湯匙
梳打粉     1 茶匙
肉桂粉     1 / 2 茶匙
鹽     1 / 2 茶匙
牛油   100 克
糖    180 克
固體菜油   85 克
雞蛋   1 隻
水     1 湯匙
金黃糖漿   4湯匙

- 腰果洗乾淨，用抹手紙索乾水份，放入焗爐用 140 °C 焗約 20 分鐘至香味出，然後切碎。

- 所有粉類同鹽過篩 3 次。

- 牛油室溫放軟，之後加入糖及固體菜油，用電動打蛋器打至發白。

- 雞蛋加入拌勻，再分次拌入水同糖漿。

- 將粉類倒入牛油霜內，用膠刮切拌成麵糊，再加入腰果碎拌勻。

- 將適量麵糊用手搓成球狀，放上已墊牛油紙嘅烤盤上，之後略為壓扁。

- 放入已預熱至 180 °C 嘅焗爐內焗約 8 - 10 分鐘。

- 曲奇於烤盤上略為放涼後先至移到架上攤凍。

以上材料份量可做直徑 7 厘米曲奇約 40 塊。

啲麵糰發到豬仔咁大，攪到啲曲奇黐住哂，所以第一盤勁樣衰，
之後第二盤就整細少少個麵糰，咁就靚仔番哂！





呢隻薑餅同街買嗰啲真係差唔多味，不過減咗糖都仲係好甜呀！
當然，比起聖誕薑餅，味道就稍為淡啲啦！

Notes：

- 可全用牛油 200 克代替固體花油；金黃糖漿則可用蜜糖代替；而水就可用牛奶代替。

- 曲奇麵糰放上烤盤上時，記得預留位置俾麵糰膨脹。

- 由於剛出爐嘅曲奇仲係軟身，所以記得等到曲奇稍為硬身之後先移放架上攤凍。



P.S.  今日晏晝 Winnie 過嚟我屋企交收，我有專登買咗扎好靚嘅太陽花俾我媽咪。

Winnie 真係好有心，我要代媽咪同妳講聲多謝呀！

南瓜豆腐包 Pumpkin & Tofu Bread

有陣時啲嘢真係可遇而不可求，你要專登去搵佢時就未必搵到，但無諗起佢時又會俾你發現到。

 

    正當我搵緊食譜整麵包嘅時候，突然見到 Rachel 個南瓜豆腐包食譜，真係開心到不得了，因為之前整南瓜栗子忌廉湯同一個超失敗嘅豆腐慕斯蛋糕時，都用剩咗啲南瓜同豆腐，咁呢個麵包就正好幫我 "清貨尾" 喇！

材料：
豆腐 100 克
南瓜 150 克
高筋麵粉 200 克
低筋麵粉 80 克
老麵 100 克
酵母 5 克
鹽 5 克
蛋液 40 克
糖 25 克
水 約 50 毫升
橄欖油 15 克

- 豆腐快手汆一汆水；南瓜去皮、切粒，隔水蒸正腍身。

- 除橄欖油外，所有材料放入食物處理器內攪拌成麵糰，後加入橄欖油搓勻。

- 拎出麵糰，放上已灑粉嘅枱上，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙包好，發酵約 1 個鐘。

- 將麵糰排氣後再次滾圓，放番入兜內發酵 30 分鐘。

- 再次排氣，並將麵糰平均分割成 2 份，滾圓後鬆弛 15 分鐘。

- 麵糰排氣後做形，放上已墊入爐防黏蓆嘅烤盤上，最後發酵約 45 分鐘。

- 放入已預熱至 180 °C 嘅焗爐內焗 15 分鐘。

- 出爐後放架上攤凍。


食譜出自 Rachel Yau 嘅《知廚之樂》。

可能因為水份勁高，整咁耐包，第一次做到稍為似樣少少嘅薄膜。





麵包質地好特別，超鬆軟之餘又帶點煙韌，可能因為老麵份量比較多嘅
關係。不過一如以往：咖啡包無咖啡味；甘筍包無甘筍味；
南瓜豆腐包無南瓜豆腐味！！

Notes：
-  老麵製作方法，請參考燕麥包食譜。

- 由於南瓜同豆腐嘅濕度相當之高，所以建議先唔加水搓麵糰，甚至連南瓜同豆腐都唔好一
  次過加入，視麵糰濕度再加水調節。我呢次不但無落到水，就連南瓜同豆腐都用唔哂，麵
  糰已經夠哂水份。

- 即使麵糰濕度啱啱好，但會越搓越濕，所以必須酌量加入高筋麵粉以搓至唔黏手為止。

- 原食譜係用牛油，但如果用液體油的話，記得同樣要逐少加入，以免令到麵糰過濕。

乾燒海鮮雜錦

喺上年年尾嘅某一日，返到屋企開信箱時，發現管理處放咗張紙條喺我信箱，話我有份郵件寄存喺大堂 “實Q” 度，叫我憑紙條前往領取。“實Q” 叔叔俾咗一盒嘢我，大約係半張 A4 紙咁大、1 cm 厚，真係好好奇，薄薄一盒會係咩呢？

返到屋企拆開嚟睇，原來係一盒「李錦記」乾燒明蝦醬，當時真係覺得好神奇，無端端點解「李錦記」會送份方便醬包俾我呢？唯一解釋係，應該係我好耐好耐之前曾經去過佢個網站度唔知做乜，會送番份禮俾我，但相信應該事隔久遠，加上我老人癡呆嚴重，完全無記憶喇！

無端端免費得到份醬料包，梗係唔好浪費啦！

材料：
急凍蝦仁
急凍帶子
急凍青口
翠玉瓜
蒜片
乾蔥

調味料：
鹽
乾燒明蝦醬
辣椒醬
紹酒
粟粉
麻油

- 海鮮料解凍後清洗乾淨，蝦仁挑去蝦腸；帶子快手汆一汆水，瀝乾備用。

- 翠玉瓜洗淨，去頭尾，之後切件；乾蔥去衣後略沖洗，然後切圈。

- 燒熱油，放翠玉瓜落鑊兜炒，落少許鹽後加水冚蓋煮一陣，之後盛起待用。

- 爆香蒜片同乾蔥，將蝦仁及青口落鑊兜炒，灒酒後炒至八成熟，。

- 加1湯匙水，乾燒明蝦醬及辣椒醬拌勻。

- 將帶子及翠玉瓜回鑊，兜炒均勻後用粟粉水埋薄芡。

- 熄火後灑上麻油，兜勻後即可上碟。

呢盒方便醬應該係外銷到日本，包裝盒全部都係日文。
盒內包括一包乾燒明蝦醬及一小包辣醬。

 

 

味道唔錯喎，好香番茄味，酸甜中帶少少辣，夠哂惹味呀！

 

南瓜栗子忌廉湯 Pumpkin & Chestnut Cream Soup

    近排摷食譜時，見到以前《Towngas Avenue》季刊裡面有個西湯食譜，係用上我至愛嘅南瓜同栗子去整，仲落埋肉桂粉o添，真係唔整都對唔住自己啦！Base on 原食譜，自己再加加減減，改一改做法，就成功煮到一個味道層次勁豐富嘅南瓜忌廉湯喇！

材料：
南瓜 600 克
栗子 約15 粒
洋蔥 1 個
乾蔥 3 - 4 粒
肉桂粉   1 茶匙
豆蔻粉   1/4茶匙
烚栗子水 500 毫升
清雞湯   300毫升
白酒 250毫升
淡忌廉   150毫升
鹽    少許
胡椒粉   適量

- 南瓜去皮、去瓤，之後切細件，蒸至腍身。

- 栗子去殼、去衣，烚熟後瀝乾，水留用；洋蔥及乾蔥切粒，備用。

- 燒熱油，爆香洋蔥、乾蔥及栗子，加入南瓜粒，兜炒數分鐘。

- 加入肉桂粉及豆蔻粉，拌勻。

- 將烚栗子水、雞湯及酒加入，煲滾後轉慢火煲 45 分鐘。

- 湯煲好後，倒入攪拌機內攪打至所有材料完全混合及幼滑。

- 將湯倒番入煲內，再次煮熱，並且拌入淡忌廉。

- 最後加鹽及胡椒粉調味即可。

 

以上材料為 4 – 6 人份量。

老竇都讚個湯好飲，當我話俾佢聽啲材料後，佢就即刻話：「嘩，
用上咁多材料，唔怪得之咁清甜啦！」

Notes：

- 若果烚栗子水唔夠的話，可以直接加入清水至 500 毫升。

- 栗子最好買較為腍的一種，方便攪打成蓉。

- 栗子去殼去衣方法，可參考《栗子去殼及去衣方法》

- 落鹽調味時記得應事先試味，因為清雞湯本身已經有一定鹹度。

咖啡磅蛋糕 Coffee Pound Cake

呢排又試好鬼死忙，唔好話巡 blog，連自己個 blog 都無時間寫呀！依家 post 番上個禮拜五整嘅磅蛋糕先。

 

    今次呢個咖啡磅蛋糕真係有驚喜之餘又有少少失望，點解會咁矛盾呢？因為呢個磅蛋糕個咖啡味比較出，連 Lily 都話今次就食得出咖啡味，而且個 texture 直情就係「莎莉」蛋糕室溫回軟後咁鬆軟，誇張啲講句，有少少偏向雪芳蛋糕嘅鬆軟，真係完全無諗到，surprise ~~~~~！！ 亦正因為咁，我咪有啲失望囉！整得磅蛋糕，當然係想食比較紮實嘅口感啦，但呢個較軟熟，食完之後覺得唔夠 “充實” 呀！

材料：
牛油 100克
低筋麵粉 100 克
泡打粉   1/2 茶匙
肉桂粉    1/2 茶匙
雞蛋 2 隻
淡忌廉   20 毫升
水   10 毫升
咖啡粉   2 茶匙
咖啡酒   1 茶匙
糖    80 克

- 牛油於室溫放軟；所有粉類混合過篩 3 次；雞蛋拂打成蛋液，備用。

- 淡忌廉、水及咖啡粉倒入杯內混合，放入微波爐內加熱至微暖。

- 將咖啡酒加入咖啡忌廉混合物內拌勻，待用。

- 牛油同糖用電動打蛋器打至發白成牛油霜，之後將蛋液逐少加入拌勻。

- 粉料與咖啡忌廉混合物分次交替加入牛油霜內，攪拌均勻。

- 將麵糊倒入已搽油並灑上麵粉嘅模內，然後將表面刮平。

- 放入已預熱至 170 °C 嘅焗爐內焗約 45 分鐘至熟。

- 出爐後脫模，放架上攤凍，之後切件享用。

 

以上材料份量可做 9 厘米 X 18 厘米 X 6 厘米蛋糕 1 條。

 

食譜參考自趙筱蓓嘅《磅蛋糕123》。

咖啡粉與牛奶或忌廉加熱過後，咖啡味即刻出好多；蛋糕內因為
加入少量濕性材料，所以比起一般磅蛋糕輕盈鬆軟。





今次無用到牛油紙墊模，所以焗完出嚟嘅蛋糕四周非常香脆，
中心鬆軟，好好食啊！

 

Notes：

- 原食譜係用 30 毫升牛奶，並非用淡忌廉及水；咖啡粉則與其他粉料混合過篩。

- 蛋液必須分多次逐少加入牛油霜內混合，否則容易出現油水分離現象。

- 粉料與咖啡忌廉混合物交替拌入牛油霜內，會比較容易混合。

硬式焦糖布甸 Hard Caramel Pudding

  食完糯米飯，歎番個飯後甜品先！呢期好鍾意食布甸，已經跟食譜整過幾款㗎喇，不過呢排真係完全無時間寫 blog，所以無 post 到上嚟。

        今次就參考咗食譜，加啲減啲，整咗個硬式布甸。

臘味糯米飯

成個冬天都無整到糯米飯食，到想整時又開始病，由年頭到二月尾都斷斷續續咁感冒兼失聲，啲人又話病緊唔好食糯米囉，所以一直都唔敢整。

 

       見依家好似叫做無乜事，係咪完全好番哂就真係唔知啦，不過唔理喇，想食就照食呀！！

前一晚浸定糯米過夜，噚日朝早就將糯米同臘腸預先蒸熟兼浸定冬菇，
到教完琴番嚟就將材料切粒，之後炒埋一碟就食得，夠哂快手。

 

咁啱噚晚天氣又涼番啲，呢碗糯米飯真係整得合時！

    你哋如果有興趣整的話，睇番《簡易生炒糯米飯》個食譜啦！

燒汁蔥爆雞柳

噚日執雪櫃時，執執吓發現仲有樽 N 年前用剩嘅日式燒肉汁，其實已經剩番好少，但係就擺咗喺度咁耐都無用，要快手清埋佢喇！

材料：
急凍雞扒
京蔥
青辣椒
蒜片
蔥段
炒香芝麻

醃料：
鹽
糖
雞粉
胡椒粉
紹酒

調味料：
鹽
糖
日式燒肉汁
紹酒
麻油

- 雞扒解凍後去皮及切去多餘脂肪，之後切成雞柳，用醃料醃好。

- 京蔥及青辣椒切去頭尾，洗乾淨後斜切片，備用。

- 燒熱油，將雞柳炒至約八成熟，之後灒酒，略兜炒後盛起。

- 放京蔥、青辣椒同蒜片落鑊爆炒至香味出，之後將雞柳回鑊，灒酒。

- 加入調味料，不斷兜炒至雞肉全熟，京蔥同青辣椒微軟。

- 最後加入蔥段，兜抄均勻後即可熄火，灑上麻油。

- 上碟後灑上炒香芝麻。

加咗日式燒肉汁一齊炒，寧捨惹味。

呢個餸簡單快手又好味，不妨試試。

Notes：

- 日式燒肉汁可用日式照燒汁或蠔油代替。

- 青辣椒及京蔥毋須炒太耐，要保持少許爽口感。