2012年3月26日星期一

乾燒海鮮雜錦

喺上年年尾嘅某一日,返到屋企開信箱時,發現管理處放咗張紙條喺我信箱,話我有份郵件寄存喺大堂 Q” 度,叫我憑紙條前往領取。Q” 叔叔俾咗一盒嘢我,大約係半張 A4 紙咁大、1 cm 厚,真係好好奇,薄薄一盒會係咩呢?



返到屋企拆開嚟睇,原來係一盒「李錦記」乾燒明蝦醬,當時真係覺得好神奇,無端端點解「李錦記」會送份方便醬包俾我呢?唯一解釋係,應該係我好耐好耐之前曾經去過佢個網站度唔知做乜,會送番份禮俾我,但相信應該事隔久遠,加上我老人癡呆嚴重,完全無記憶喇!



無端端免費得到份醬料包,梗係唔好浪費啦!








材料:
急凍蝦仁
急凍帶子
急凍青口
翠玉瓜
蒜片
乾蔥



調味料:

乾燒明蝦醬
辣椒醬
紹酒
粟粉
麻油



- 海鮮料解凍後清洗乾淨,蝦仁挑去蝦腸;帶子快手汆一汆水,瀝乾備用。



- 翠玉瓜洗淨,去頭尾,之後切件;乾蔥去衣後略沖洗,然後切圈。



燒熱油,放翠玉瓜落鑊兜炒,落少許鹽後加水冚蓋煮一陣,之後盛起待用。



-
爆香蒜片同乾蔥,將蝦仁及青口落鑊兜炒,灒酒後炒至八成熟,。



- 1湯匙水,乾燒明蝦醬辣椒醬拌勻。



- 帶子及翠玉瓜回鑊,兜炒均勻後用粟粉水埋薄芡。



- 熄火後灑上麻油,兜勻後即可上碟。







呢盒方便醬應該係外銷到日本,包裝盒全部都係日文。
盒內包括一包乾燒明蝦醬及一小包辣醬。



 


 


味道唔錯喎,好香番茄味,酸甜中帶少少辣,夠哂惹味呀!




 


4 則留言:

  1. 有個疑問:其實急凍的海鮮好吃嗎?在香港,常常可以買到新鮮海鮮,所以一般少用急凍的。但在這邊,較難買到新鮮海鮮。在超市裏看見急凍的大蝦等等,都很想一試。
    [版主回覆03/30/2012 13:30:02]嗯,原來妳唔係住香港呀!可能妳講過我又唔記得咗喇!!妳睇我呢篇blog就知我老人癡呆有幾嚴重至得o架!!
    我自己有個習慣,但凡係煮濃味菜式時,我都一定唔會用新鮮肉類,因為我覺得調味料會奪哂肉質鮮味,嘥咗啲新鮮肉類,食唔到原本鮮味。況且,我份人唔係好識食o架咋,狗屎垃圾都食得一餐,食完一樣覺得好開心、好滿足,我唔會要求太高,當妳諗到世界嘅另一邊,有啲人連想飲啖乾淨水都係一個奢望時,妳就會好知足,唔會要求得咁奢侈!

    回覆刪除
  2. 咁你得閒無事就要多d去巡下佢既網站啦..兼留低幾粒字想試佢既乜醬物醬, 咁佢可能會不斷寄俾你試喎
    [版主回覆03/30/2012 13:19:21]嗯,又係喎,咁走去佢網站狂留言至得!

    回覆刪除
  3. 緊張大師-小女人2012年3月26日 下午10:30

    咁你用了這包醬汁好味嗎?但你好懂用材料變化又多,你好有心思呀
    [版主回覆04/03/2012 16:49:26]無錯,媽咪臨走前都同我講,知道我處事都好妥當、好有計劃,所以佢都唔會擔心之後我一個人生活,好會走得好放心,咁我以為佢真係可以放低我啦,但後尾我細佬同我講番,原來媽咪都有同佢講過佢唔會擔心我以後嘅生活,但就擔心我嘅心情,果然係知子莫若母!
    [緊張大師-小女人回覆04/02/2012 11:12:05]能夠理解你的心情,我好鍚父母,我層經想過媽媽她去世會點我都想到喊...明白你咁孝心,但人始於走不出這個終結.只能用心掛念著,現在趁他們都在我一定要好好陪他們同孝順.我爸爸以前做生意都幾好,但我老公無錢就同他一齊捱啦....這是樂趣.你也不要太傷心,媽媽見到你咁她都會傷心的
    [版主回覆04/02/2012 03:00:14]但係真係好離譜囉,杯麵燶都不特只,仲要著埋火,唔係真係不濟到咁嘅地步呀!!
    原來妳係千金小姐!咁做人老婆甚艱難囉!咁妳先生煮餸好食嗎?
    係呀,曾經有學生話我同我媽咪好到好似情侶!所以我媽咪剛離開的一段日子,真的很難受,真係心痛到痛不欲生,行街、搭車都會喊!
    [緊張大師-小女人回覆04/01/2012 20:09:33]你呢個笑話真的好逗人笑,係真的好多人不懂弄菜是真的.我由細到大都不用做的,直至嫁了才開始煑飯但.....十年後被老公炒了我,因為他受不了我的餸菜太難吃啦,他決定由他自己操刀.....到現在我休息在家才開始再弄飯.
    我感受到你對媽媽的愛,好欣賞你對媽的愛和生前的孝,皆因我亦是一個好孝順的女兒,能了解到你的心.你是一個男生這情好難得.
    [版主回覆04/01/2012 02:04:16]其實都唔係咩天份,始終以前媽咪仲喺度嘅時候,我都經常會入廚房幫手,減輕佢負擔,咁當時媽咪一定要講清楚俾我聽點做嘛!久而久之,咁咪無形中 "袋咗好多錢落袋" 囉!
    妳唔係唔識變化呀,只係妳無呢個需要嘛!
    講樣攪笑嘢俾妳聽,有次喺廚房做嘢時,聽到樓下有個人同家人講:「咩話,你個杯麵 "叮" 到燶咗!?吓,仲著埋火o添呀!!」呢個世界有無人咁不濟呀???相比起呢個人,咁我都真係幾掂呀!
    [緊張大師-小女人回覆03/30/2012 22:39:58]這就是你的天份呀,我鐘意咁樣,似我一點也不懂變化好多啦.但你真係比起好多家庭主婦要懂得弄菜就係真的
    [版主回覆03/30/2012 13:23:22]味道唔差呀,幾惹味o架!
    我邊度懂得將材料變化呀,我只不過係鍾意隨手有咩食材就用咩食材,唔會專登跟足食譜去買呢樣、買嗰樣,同埋我份人唔知點解好不甘於平凡,硬係唔多鍾意跟足食譜,硬係要改少少嘢,連我個鋼琴老師都曾經話過我好有自己一套,唔多鍾意觀摩、參考其他演釋手法!

    回覆刪除
  4. 老人癡呆咁嚴重...都識出咁正嘅乾燒海鮮雜錦...你都得架喇!
    [版主回覆03/30/2012 13:16:11]妳又潤我!!

    回覆刪除