乾燒海鮮雜錦

喺上年年尾嘅某一日，返到屋企開信箱時，發現管理處放咗張紙條喺我信箱，話我有份郵件寄存喺大堂 “實Q” 度，叫我憑紙條前往領取。“實Q” 叔叔俾咗一盒嘢我，大約係半張 A4 紙咁大、1 cm 厚，真係好好奇，薄薄一盒會係咩呢？

返到屋企拆開嚟睇，原來係一盒「李錦記」乾燒明蝦醬，當時真係覺得好神奇，無端端點解「李錦記」會送份方便醬包俾我呢？唯一解釋係，應該係我好耐好耐之前曾經去過佢個網站度唔知做乜，會送番份禮俾我，但相信應該事隔久遠，加上我老人癡呆嚴重，完全無記憶喇！

無端端免費得到份醬料包，梗係唔好浪費啦！

材料：
急凍蝦仁
急凍帶子
急凍青口
翠玉瓜
蒜片
乾蔥

調味料：
鹽
乾燒明蝦醬
辣椒醬
紹酒
粟粉
麻油

- 海鮮料解凍後清洗乾淨，蝦仁挑去蝦腸；帶子快手汆一汆水，瀝乾備用。

- 翠玉瓜洗淨，去頭尾，之後切件；乾蔥去衣後略沖洗，然後切圈。

- 燒熱油，放翠玉瓜落鑊兜炒，落少許鹽後加水冚蓋煮一陣，之後盛起待用。

- 爆香蒜片同乾蔥，將蝦仁及青口落鑊兜炒，灒酒後炒至八成熟，。

- 加1湯匙水，乾燒明蝦醬及辣椒醬拌勻。

- 將帶子及翠玉瓜回鑊，兜炒均勻後用粟粉水埋薄芡。

- 熄火後灑上麻油，兜勻後即可上碟。

呢盒方便醬應該係外銷到日本，包裝盒全部都係日文。
盒內包括一包乾燒明蝦醬及一小包辣醬。

 

 

味道唔錯喎，好香番茄味，酸甜中帶少少辣，夠哂惹味呀！