樂韻春風 50 年

今年係江老師從事聲樂教學 50 周年記念，所以一班師兄弟聯同江樺合唱團團員一齊攪咗個名為「樂韻春風 50 年」嘅記念音樂會，內容係以江老師嘅一生而寫成一部歌劇，講述老師由做電影演員、學習聲樂、遠赴意大利留學、回港演出到從事教學嘅經歷，由學生同團員一同演出，當然，老師都會演唱啦！雖然老師已經年過八十，但係依然寶刀未老，一開腔，所有非常出色兼具知名度嘅大師兄同大師姐都即刻被比下去呀！

 

成晚演出最令我感動嘅，就係老師居然著上和服演唱《蝴蝶夫人》當中最出名嘅詠嘆調 Un bel di，老師一開腔我就即刻喊咗出嚟，因為呢首
aria 可以話係老師嘅代表作兼成名作。喺 53 年前，老師就俾意大利歌劇院正式挑選擔網演出蝴蝶夫人一角，係當時全球第一位華人女高音演出《蝴蝶夫人》，喺當時嘅西方社會，佢哋都肯俾你呢個華人擔正成套 opera，你話老師佢係咪真係好犀利呢！！！所以對我嚟講，我根本無法想像到可以現場親身聽到老師演唱蝴蝶夫人㗎！！真係實在太興奮、太感動，如果媽咪都在場聽到的話，都一定會有同感。記得當年媽咪知道咗我喺演藝學院讀書時可以跟到江老師學聲樂，佢都非常開心，佢同我講，以前佢後生時喺電台都成日聽到江老師嘅歌，當時已經係好出名，同費明儀老師、 周文珊老師及楊羅娜老師都係香港知名嘅女高音，所以媽咪話佢自己諗都無諗過幾十年後自己個仔都有機會跟到名師學藝！

 

演出完之後各人於台上跟老師合照。

趁老師要招呼其他人時，即刻上台捉住老友 Li Kien 影相先。

要同老師影番張相留念真係一啲都唔易㗎，我呢啲咁弱不襟風嘅點夠人爭至得㗎！
於是我同 Li Kien 就唔理咁多喇，一於走埋去 “黐” 相影！

 

好彩後尾啲人走得七七八八，老師都仲企喺台上同學生繼續影相，
所以我同 Li Kien 一家即刻走過去再影過！

其實我都好想上番堂繼續學聲樂㗎，我始終都係好鍾意唱歌，比起彈鋼琴更加發燒呢！不過奈何依家無時間又無錢，自己身體狀況又唔好，人又蠢，真係都唔敢同江老師開口啦，就算老師唔介意肯教我呢個蠢材，我都怕會激嚫老師囉！哇咔咔咔咔咔 ………