埋門幾腳！！！

年頭嗰陣 Winnie 已經同我講，我哋個生肖今年流年麻麻哋，叫我自己小心注意。我諗番轉頭都算托賴，一齊算係平平，點知臨到年尾幾個月先至嚟破財兼勁黑仔，真係多到要列表出嚟呻吓呀！！

- 早一、兩個月個電視畫面突然變紅，心知都唔捱得耐喇，率之有一日開機後完全睇唔到嘢，一
  定要換過個，好彩 Louisa 間接識人賣電器，以超平價 $1,900 買過部新，都算啦，反正部「大
  牛龜」都已經用咗好耐喇，俾著其他人一早已經換咗高清囉！

- 跟住就到客廳個掛牆鐘時準時唔準，天氣潮濕時就更加嚴重，到依家都未物色到一個啱嘅，我
  已經上「淘寶」睇過，我要嗰類款都要過 $200 呀！

- 天氣凍咗之後，老竇就將把風扇洗乾淨兼包好，可能因為用咗一段時間兼長期受到西斜嘅「關
  照」，膠框外殼硬化變脆，攪到老竇一拆就幾乎粉碎，反正依家都唔會開風扇，暫時唔買住。

- 之前已經同大家講過買咗個新書櫃啦，cheap cheap 「宜家」貨色都成 $1,800 㗎！

- 早一個禮拜叫老竇換過個新濾水芯，大同細兩個都一次過換，點知大嗰個整極都出唔到水，後
  尾換過另外一個雖然正常無事出到水，但係個細濾水芯就攪到成個黑哂，好似發霉咁樣，即使
  係新換都要報銷啦！！之後拎番去「永安」換，佢哋話濕咗水之後就唔可以換，只係俾個代理
  商個電話我自己打去問，今日打咗去喇，點知唔接聽，只可以留言，到依家都未覆我！分分鐘
  $2XX 又無埋！

- 上星期四去佐敦間「永安」換濾水芯時，諗住喺新設嘅屯門轉車站轉車過去會平啲兼快啲，慳
  錢兼慳時間，點知企喺巴士門等落車時，個司機完全唔記得咗駛入去轉車站，繼續喺屯門公路
  前進，過後先至抓抓頭話唔記得咗，猛 say sorry，唉， say sorry 又點呀，攪到我出到荃灣後
  要轉搭地鐵，搭貴車之餘又用多咗時間。

- 逢星期六都要一早 9:00am 去到京士柏教琴，次次都係捱住眼瞓去教，都唔緊要啦，反正有錢
  收就頂硬上啦，點知上個星期六唔知醒起身，一掙開眼見到個天已經光哂，即刻嚇到彈起身，
  立即打電話俾個家長講聲唔好意思兼搵過個時間上番堂，點知個家長都係一貫作風，唔肯調時
  間、唔肯補堂、後加 15 分鐘都唔肯，咁都無辦法㗎，唔通𠼱地咩！咁咪唯有接受無咗幾百蚊
  呢個事實，當買個教訓囉！

- 噚日瞓醒起身時發覺條頸鍊個扣擘開咗，就斷就斷咁款，點知噚晚沖沖吓涼時卒之斷埋，成條
  鍊跌咗落嚟，好彩無跌落去水位沖走咋，咁即係又要拎去整啦，唉！想問問大家，係咪拎番去
  買嗰間金舖度整會平啲呀？

人哋就話埋門一腳，我就埋門幾腳，你話死唔死呀！！好彩今年仲有半個月多啲就過，之前搭地鐵時見到某堪輿學家幫佢自己本生肖運程書賣廣告，預告來年各生肖主要運程，話我屬嘅生肖來年旺偏財喎，睇嚟我都要出擊狂買六合彩、買馬、買波、過大海先得喇，補番哂呢個年尾蝕嗰啲嘛！！