2015年3月3日星期二

唉,有排捱呀!

        之前見到 blog Moonmoon 話佢去開賣餸嗰個屋邨街市要封咗嚟大裝修,只係留番每樣一、兩檔繼續營業,當時聽到都戥佢慘,但估唔到呢一日居然都會發生喺自己身上!
 
        咗農曆新年頭嗰幾日,屋企附近個屋邨街市就正式被「領匯」完全封閉,聽聞原本有百多個檔位,依家就只係提供得二十二個臨時檔位繼續經營,咁即係話,基本上每種產品嘅售賣檔位都只係得番一、兩檔。其實檔位數目少都唔緊要,只要產品種類夠齊全都 OK,但最慘係啲檔位 size 超迷你,有啲直情係比我屋企個廚房、廁所仲要細,唔好話擺多幾種嘢嚟賣,就連檔主企喺度想轉身都難,最簡單不過想買幾隻番薯煲糖水都無,皆因檔口地方少,菜檔阿姐話無可能放啲咁嘥位嘅嘢喺度賣!  
 
 
臨時街市背面向街的一排舖位,原本係幾間醫務所、便利店同洗衣舖,
部份被迫結業,有啲就搬入商場內,都唔明「領匯」做乜唔開放埋
做臨時街市檔位,只係將以往的舖位一半位置改建成檔位,
仲要一開四至六,你話每個檔位有得幾大呢!!






喺呢個少少嘅角落就已經係四個檔位喇,有菜檔、
水果檔、芽菜檔同肉枱,每個檔口都
一細,真係唔擺得幾多嘢賣。






咗幾個主要出入口有幾條窄窄通道之外,基本上成個臨時街市
都係密封,依家行入去都覺得有啲侷促,遲啲天氣熱時
都唔知點算!菜檔、雞檔、魚檔都迫埋一齊,
到時真係又熱、又焗、又臭!
 
 
 
 
 
       
商場部份其實都只係剛剛翻新咗無幾多年,都唔知做乜依家
又要翻身多一次,攪到連鎖快餐店要縮細一本面積,
酒樓、超市、藥房、連鎖凍肉店通通
結業,成個場都無得幾多嘢賣!






地下嗰層商舖一樣通通無得留低,商場無嘢賣,街市又
無得選擇,呢一年多時間都真係唔知點捱!!






        其實我住嗰區都仲有四個街市,但係有兩個係超迷你兼十室九空,成世都唔會去一次;另外兩個居屋屋苑街市就比較大少少,但比起蝴蝶邨個街市真係蚊髀牛髀,而且仲要行十幾廿分鐘先到,行得遠都唔係問題,咪當做運動囉,但拎住一袋二袋好天曬落雨淋嘅時候行十幾分鐘返屋企,你都咪話唔甘,所以成個蝴蝶灣區十個屋邨屋苑,超過十萬居民都係習慣去最中心點嘅蝴蝶邨街市買餸,一來種類多、選擇多,而且係位處區內中心位置比較方便。
 
        平時我幫襯開嘅粉麵檔檔主哥哥早前都有接受媒體訪問,其實佢講得好啱,蝴蝶邨街市面積大到分兩期,點解唔分開兩期重建,等其中一期裝修好,檔位搬入去營業後再重建另一期,咁就無咁擾民,都唔知「領匯」班負責人點諗!!

        行完個街市一轉之後,我嘅感覺係頭都大哂兼倒抽一口涼氣,唔通真係要好似 Facebook 群組啲蝴蝶灣居民咁講,買一餐餸要行勻幾個街市!?睇嚟我都要試吓去開學生屋企教琴時順道喺附近街市買埋餸返屋企囉!


6 則留言:

  1. 我平時都會因要快齊餸,行勻幾個街市超市架。

    回覆刪除
    回覆
    1. 我好少會咁,因為原本街市夠大,可以一次過買齊所需。

      刪除
  2. 舊年我屋企對面個屋村街市大裝都係咁,唯有每星期要出城入貨,勁慘。畀領匯裝修的街市、商場都面目全非

    回覆刪除
    回覆
    1. 原來妳都經歷過呀,真係好苦哦!

      刪除
  3. 好彩您返工時間彈性,可以經過其他街市買都得。

    回覆刪除
    回覆
    1. 係呀,依家硬係勝在比較多時間量地,呢日我都已經去兩個街市先買得齊哂呀!

      刪除