2015年11月8日星期日

又做義工

        老表話我呢排多咗出街 (其實佢意思係話我多咗出外活動),梗係啦,依家大把時間量地同拍烏蠅,吃喝玩樂同 shopping 又唔多啱我,咁做義工就最好不過啦,有意義之餘又可以打發時間,幫到人又幫埋自己,何樂而不為呢!俾著以前,請得郁我呢個宅男都真係唔易㗎!! :D

        上次幫 Pinkdot 做義工時,周圍都係英文人,估唔到今次就全場都有好多 "煲冬瓜" 人,因為其實好多台灣同內地嘅 LGBT 團體飛過嚟參加遊行,加上本地好多專上學院都有收內地學生,所以國語人多都唔出奇嘅!反而值得欣賞嘅係見到都有啲父母帶埋自己仔女一齊嚟參加遊行,從小就教識佢哋社會上嘅多元性,對自己人多啲理解同明白,就可以減少誤解同恐懼,繼而減少歧視!


起點係喺維園,好彩噚日都唔算好曬好熱,仲曾經落過雨,
如果好似今日咁熱就死得囉,肯定又好似上次咁曬傷哂啲皮膚
 
 
 
 
 
 
大會場刊,今年大會揀咗長頸鹿做吉祥獸,寓意等
香港嘅平權及反歧視條例等到頸都長!
 





我呢啲完全唔可以做搬、抬、托嘅人,自然要揀啲無咁
heavy 嘅工作,所以選擇做宣傳物品派發。
 





 
 
 
據我所知,每年遊行都有好多唔同團體參加,大專院校學生
就佔好大部份,仲有其他唔同組織,不過因為要工作
嘅關係,所以無暇周圍影相做個記錄。
 





攪掂好哂手頭上嘅工作之後,組長就叫各位
義工一齊加入遊行隊伍,出發!
 





行到灣仔油站位置,見到長毛喺度幫手喊口號。
 
 
 
 
 
 
真係好佩服施先生,咁大年紀著住套 "晚裝" 同高踭鞋嚟遊行,我自己
著住對波鞋,企足、行足全日都好辛苦,行緊嘅時候腰都
痛埋,我問佢做乜唔著波鞋,佢話費事拎起條裙時
見到對波鞋咁難睇喎,真係夠哂專業!
 





終點係行到添馬公園,大會喺嗰度搭咗個舞台,有一連串
嘅表演,開場第一個節目係 pole dance
 





 
 
跟住係 drag queen show
 





今年嘅彩虹大使係藝人梁梓禧 (梁奕倫) 及立法會議員
張超雄,不過張議員工作關係未能出席!
 





大會邀得美藉華裔模特兒兼健身教練,男神 Peter Le 到場給大家一個驚喜,
平時上網睇片就睇得多,真係完全無諗過會咁近距離見到男神
而且佢真係好有專業精神,原來前一日仲係病得
好嚴重,不停咁嘔吐,噚日仲係帶病撐場!
 





 
無意中發現,中環其中兩幢商廈外牆都打上不斷變色嘅彩燈,唔知
關唔關呢次 function 事呢?因為六色彩虹係 LGBT community
嘅代表,其實係都唔出奇,因為做得 LGBT function
贊助商大多數都係外資大行、投行及商業機構。
 





 
 
走到添馬公園最出嘅位置,見到呢個咁靚嘅夜景,仲咁好彩俾我
見到鴨靈號駛過,所以就即刻拎起手機影低佢,不過可惜
相片影得唔多靚,唔知係我唔識用部手機
定係部機個鏡頭解像度唔高呢!
 
 
 
 
大會官方網站:香港同志遊行
 
 
 

6 則留言:

  1. 香港真係好難做到平權。咁多無謂人出來 ''亞支亞阻''。

    回覆刪除
    回覆
    1. samwei 妳講得啱,其實依家喺香港無論做任何事都總會有人企出嚟 ''亞支亞阻''!!

      刪除
  2. 原來香港都有呢啲活動,真係開放咗好多!

    回覆刪除
  3. 做義工係好好咖,有意義之餘又可以打發時間,唔好諗住係您去幫人,極可能係人幫返自己咖。
    都唔知個隻"鴨靈號"係可以參觀,早知帶班"竹升仔"去睇吓喇。

    回覆刪除
    回覆
    1. 係呀,呢個世界真係你估唔到,到頭來可能係自己得益都未定!

      之前係旅發局管理時就肯定可以上船參觀,依家唔太清楚呢!

      刪除