健脾番茄小米粥

        如果頭腦清晰兼無老人癡呆的話，咁你都應該會知道我家有個習慣，就係人日唔知點解會煲粥煎糕食！？雖然唔多明白點解會咁做，但我依舊年年照做，因為想將媽咪所做嘅嘢一路 keep 落去。

 

        呢個粥係之前睇電視嚴浩導演其中一條方，係一個健脾開胃養生粥，當時我只係抄低咗材料，無記低點整，所以我都係純粹用自己個方法去煲咋！導演條方原本係有落到瘦肉，但我就無喇，只係用香菇粉提味，我仲加埋原片燕麥一齊煲㖭。

 

 

材料：
淮山
茨實
薏米
小米
番茄
珍珠米
原片燕麥

- 淮山、茨實、薏米同小米沖洗乾淨，用清水浸一個鐘後再過一次水，淮山切碎。

- 番茄洗乾淨、去蒂，然後切粒；珍珠米洗淨備用。

- 除珍珠米同燕麥片之外，全部材料先凍水落煲，用大火煲至水滾。

- 加入珍珠米同燕麥片，攪拌均勻，翻滾後轉中慢火煲至粥綿。

- 落適量鹽及香菇粉調味，拌勻後熄火。

你睇，我用真空煲嚟煲粥，都一樣可以煲到好綿㗎！印象中

導演係純粹用小米煲成粥，但我自己真係唔多鍾意

小米嘅味道，所以只用部份，加入珍珠米

一齊煲，咁樣就食唔到嗰種味道。

 

Ernest 媽咪送我嘅年糕同蘿蔔糕。

噚晚人日嘅第三餐就係咁喇！