雲苓白朮冬瓜袪濕湯

        前兩日去街市買餸時，喺菜檔見到一樣貌似大節瓜嘅物體，問阿姐係乜嘢嚟，原來係冬瓜仔至真！！佢仲教我用雲苓、白朮、赤小豆同扁豆煲豬腱，話好袪濕喎！我同阿姐講我煲湯唔落肉，會唔會無味，佢叫我加紅蘿蔔同栗子，一定夠甜，我都係慌死無味，加多兩條粟米㖭！！ :D

 

 

材料：
雲苓
白朮
炒扁豆
栗子
冬瓜
粟米
紅蘿蔔

- 藥材用清水浸一個鐘後洗乾淨備用。

- 栗子去殼、去衣，略沖洗；冬瓜洗刷乾淨外皮，切開後去瓤、切件。

- 粟米洗淨後切段；紅蘿蔔刨皮，去頭尾後洗淨、切件。

- 栗子、冬瓜、粟米同紅蘿蔔凍水落煲浸半個鐘。

- 煲滾水後落埋其餘藥材，翻滾後轉中慢火繼續煲。

 

- 煲好後落鹽調味即可。 

 

 

切開裡面我覺得仲似節瓜呀！

 

咁啱又真係俾我搵到啲 "陳年" 嘅雲苓

同白朮，但赤小豆原來食哂！

 

估唔到味道又無乜藥材味喎，仲好甜㖭！

 

今晚仲整咗韓式混醬炒彩椒豆卜，混醬

有柚子蜜、韓國辣椒醬同大醬。

Notes：
- 我自己習慣將含有甜味嘅食材用凍水浸半個鐘之後先煲，因為大部份食材甜味
  都係只會溶喺凍水內。

- 栗子處理方法，可參考《栗子去殼及去衣方法》。