與 blog 友交流煮食心得，分享生活點滴。
材料：
珍珠米
鹹蛋
皮蛋
瘦肉
陳皮
水
鹽
瘦肉洗淨，預先用鹽醃過夜；米洗淨後，用清水浸半個鐘；烚熟鹹蛋，同皮蛋一齊切粒備用；陳皮用熱水浸軟，去瓤、洗淨。煲滾水，先落米，煲到米粒開花後，加埋陳皮、瘦肉同蛋落去，煲多大約 10 分鐘就可以熄火，放入真空煲內繼續煲。食之前，將舊瘦肉拎出嚟，用叉將佢撕成肉絲，然後放番入啲粥度，同煲湯一樣，啲粥要拎出嚟煲多十零分鐘，記得邊煲邊攪，因為好易黏底。試味後如果覺得唔夠鹹，可酌量加鹽調味。
好多人都認為真空煲唔似得明火煲嘢咁好，認為只係焗喺個煲度 "隅 " 熟佢，其實如果用得其法，煲出嚟嘅食物同普通明火煲無異，仲可以慳番唔少燃料費 o添！你睇吓我用真空煲煲嘅粥都一樣可以咁綿 o架！
星期五放工返到入嚟屯門，架巴士去到碼頭後司機叔叔就好大聲咁嗌：「美樂花園度爆水管呀，啲車駛唔到過去，要去美樂嘅就喺呢度落車！」雖然我唔係住美樂，但係我諗條湖翠路封咗，即係連我屋企都去唔到啦！所以我就跟埋人落車，順便去海趣坊間百佳兜個圈，睇吓有冇嘢減價又啱使先。
行到雪櫃果度，見到有隻乳酪做緊特價，賣 $3.9 啫，心諗，梗係第二日到期喇，如果唔係都無咁好死啦，睇真啲，原來都仲有成 3 日先到期，咁睇吓有咩味道先！啲味道都幾特別喎，除咗有最大路嘅士多啤梨同藍莓之外，仲有橙、蘆薈綠茶同 cappuccino 噃，首先就敲定咗蘆薈綠茶，跟住原本想揀 cappuccino 嘅，但睇吓個成份，根本就無咖啡粉，只係得 flavoring，咁我就寧願揀真材實料嘅橙味 lu。
前日就試杯蘆薈綠茶，一揭開見到啲乳酪我就知道 this is not my cup of tea！因為啲乳酪好濃好 "杰"，估到會好濃奶味，個心當堂冷咗一截，食落口果然好重奶味，一啲綠茶味都無，心諗仲以為可以用啲綠茶味冚過啲奶味 o添，好驚自己會 "捱" 唔到最後一啖就掉落垃圾桶，好彩最後都 "捱" 得到 (真係折墮，用個「捱」字去形容食嘢)。 係人都知我係好怕嘥嘢，尤其係浪費食物，之但係羶味嘅嘢就有時真係頂唔順，好惡哽，所以以前媽咪見到我食到啲好重奶味嘅嘢就會叫我唔好死頂，走去吐 / 嘔咗佢，唔好為咗唔浪費就夾硬食埋佢，免強無幸福。
因為今日到期，所以就一定要食埋杯橙味喇！不過今日我醒目啦，撈埋啲青蘋果同香蕉一齊食，可以溝淡啲奶味。
好攪嘢，啲橙肉攪到碗生果好似蟹籽沙律咁！
溝埋生果一齊食果然好好多，不過我都有試過淨食少少乳酪，就無之前杯綠茶咁難食，可能係因為啲橙肉比較酸同濃味，可以冚到唔少奶味。
材料：
急凍三文魚扒
醃料：
鹽
胡椒粉
即磨五色胡椒
橄欖油
芥末籽醬
奧勒崗 (Oregano)
羅勒 (Basil)
三文魚扒解凍後打鱗、洗淨，用抹手紙索乾水份，於上下兩面先灑上鹽、胡椒粉同即磨五色胡椒醃一陣；另外將橄欖油、香草同芥末籽醬混合好，搽喺魚扒上面，醃半個鐘以上。將魚扒放入烤爐內，烤至金黃色後，反轉魚扒烤另一面至相同顏色，完成。
因為芥末醬本身有醋，所以酸酸嘅味道正好中和番烤魚嘅 "熱氣"，不過可能因為掛住煮豆腐，無乜點理到佢，所以烤得過熟，魚肉變嚡，嘥咗！
喺將軍澳教完琴，行過去連理街間山崎麵包睇吓有冇啱食，買嚟做 lunch先。
嘩，又加咗價！呢半年內山崎都唔知加咗幾多次價啦，啲價錢好似火箭咁係咁升，雖然通脹係犀利，但係其他麵包店都無佢加得咁密。之前啲特價麵包 $ 12 兩個，後來加到 $13，依家仲 $14 o添！特價咗都唔平得去邊。
不過我又犯賤，明知貴都係要幫襯，原因係今次有份做特價嘅麵包當中，有齊我最鍾意食果兩隻：丹麥菠蘿包 & 蘋果丹麥卷。
呢個係丹麥菠蘿包，酥皮焗到脹卜卜，我諗有成 3、4 吋高，好吸引，不過呢間整啲菠蘿皮就麻麻啲，一啲都唔靚。返到屋企，我當然會烤番熱嚟食啦，個菠蘿皮脆卜卜，一咬落口就散哂，好過癮。麵包裡面就好酥、好熱、好軟熟，我諗肯定好食過即刻買果陣。
蘋果丹麥卷，外面個皮有少少硬硬哋，烤脆咗之後就當然香口好多啦，仲有少少脆 o添，裡面啲蘋果餡酸酸啲，配合個包少少甜，好夾。包質比菠蘿丹麥麵包密啲，無咁鬆散，比較有質感，又唔會太甜，加埋杯咖啡就正哂！
今日晚煮咗兩個餸，一個係香草芥末籽烤三文魚扒 ，另一個就係呢碟碧綠滑蛋豆腐：
材料：
豆腐
真姬菇
西蘭花
雞蛋
薑茸
紹酒
芡汁：
蠔油
粟粉
水
鹽
糖
豆腐用水略沖洗，原件放喺碟等佢慢慢出噉啲水，煮果陣就唔駛驚佢不停標水；真姬菇洗淨備用；西蘭花用洗米水浸洗乾淨 ( 媽咪教落用洗米水浸洗西蘭花可以洗咗表面果層 "白濛濛 " 嘅物質 )，將莖切粒、花切件，之後用鹽水汆一汆水，可以預先煮腍少少，到回鑊炒果陣時就唔駛炒咁耐，同埋保持翠綠；跟住用番同一煲水將真姬菇汆水，等佢裡面啲多餘水份走噉啲出嚟，你會明顯見到即刻縮咗水 ( 原來呢隻菇好香 o架，汆水後煲水有好香嘅菇味 )；雞蛋拂打成蛋液備用。
燒熱油鑊，先將西蘭花回鑊炒一炒，盛起後圍住碟邊放好；之後爆香薑茸，放真姬菇同西蘭花莖粒落鑊炒，贊少少酒後，放埋豆腐一齊煮，冚鑊蓋煮約 1 分鐘，之後加入芡汁，最後將啲蛋液慢慢倒落豆腐度，輕輕兜勻至蛋熟就可以上碟 ( 太大力會將啲豆腐整到好爛 )。
今次我覺得都幾滿意，因為食完之後碟底都無剩低好多水份，證明啲菇係要預先汆水，咁就唔會煮好之後仲不停咁出水。
又係 " 補飛 " 時間，呢個係上個月 12 號整 o架啦。
材料：
鮮腐皮
紅蘿蔔
榨菜
木耳
翠玉瓜
炒香芝麻
調味料：
糖
鹽
素鮑汁
糖醋汁：
鎮江醋
紅糖
生抽
先將所有材料洗淨切絲；榨菜要用清水浸約 10 分鐘，去除過多嘅鹹味；木耳浸軟後就要汆水，去除 " o翕" 味。
燒熱油鑊，先爆一爆木耳，加入紅蘿蔔炒至軟身，之後再落埋翠玉瓜同榨菜，加調味料炒一炒，灑上芝麻後熄火，備用。
鮮腐皮用濕布略抹淨，剪成適當大小。
將已經炒好嘅材料包入，摺好腐皮後，喺收口位用粟粉水黏好，之後就放上平底鑊度用慢火煎，將腐皮煎至表面金黃色就完成。
最後煮埋個糖醋汁，將所有材料放煲內煮熱，慢慢試味，加減份量，直至適合個人口味為止。
表面煎得好香脆，裡面就味道十足，所以素菜其實都可以好好食！
咪以為我咁凍天氣仲整冷盤，其實係差唔多成個月前整落 o架啦，不過因為之前部腦拎咗去整成個月，我無得寫 blog，所以依家先至 post 番出嚟，仲有好多等住我去 update 呀。我打中文又慢，點趕呀！！
材料：
盒裝豆腐
三色彩椒
泰國金柚
檸檬皮茸
調味料：
日本芝麻醬
蜜糖
檸檬汁
鹽
簡簡單單嘅一個涼拌菜，做法都好簡單，味道亦唔錯，好清新。彩椒洗淨、切粒，然後拖一拖水 ( 唔好太耐，其實我只係唔想咁爽口，太腍會唔好食，所以如果鍾意食爽口嘅就唔駛拖水啦 )，盛起，瀝乾水備用；金柚起肉、撕碎，然後用蜜糖、檸檬汁同檸檬皮茸醃一陣間，呢招係跟 Jamie Oliver 學嘅，有次佢整沙律菜之前都係咁樣預先醃一醃。跟住就可以加埋啲彩椒，再加少少鹽調味，就完成咗柚子沙律。至於豆腐，肥媽就喺「肥媽私房菜」節目度教過，豆腐喺盒度倒咗出嚟之後，就用抹手紙包住，然後放啲重嘅物件喺上面，將啲水份壓咗出嚟，咁就唔會 " 猛標水 "，試過又真係幾得噃。之後就切片，上碟後就倒啲麻醬落去，擺少少檸檬皮茸喺上面做裝飾，再放埋啲柚子沙律係兩邊，就可以上菜啦！係咪色彩好靚呢？仲好似好 pro 咁 o添。
我都係純粹諗吓、試吓，今次當係做實驗，睇吓咁整 O 唔 OK，估唔到兩樣嘢嘅味道都幾夾。
