朱古力磚 Pavé au chocolat

        聽日就係情人節喇，一提起情人節，你哋會諗起咩呢？情人？呢層就當然啦，但我就即刻諗起朱古力囉！所以星期四果日去油麻地「二記」買嘢時，真係人山人海，俾錢都要排長龍，因為個個 DIY 友都買料整朱古力嘛！唔係講笑，驟眼望落，真係幾乎個個人手上都有包朱古力㗎，包括我自己都係呢，哈哈！不過我唔係專登走去買嚟整朱古力嘅，只係咁啱去入貨補倉啫！

        屋企啲現成朱古力都通通俾我食哂喇，咁我又唔想去買，咁就自己郁手整啦！所以，今次整呢啲朱古力係純粹整俾自己食㗎咋，只係咁啱得咁橋撞正情人節前夕啫，絕對唔係整嚟送俾情人㗎，哈哈！況且，我根本就無情人，我疊埋心水做王老五、老姑公㗎喇！！

新春年花

        又係時候同大家分享一吓屋企啲年花喇！之所以咁遲先 post 出嚟，係因為要等佢哋開花囉！

雖然呢幾個月老豆因為身體問題，無去到農場幫手，
但佢嘅農場 friend 都有叫同事車咗兩盆花俾我哋。

 

呢盆蘭花好靚，有紫、白、黃三隻品種。

 

紫色品種紋理最靚。

 

黃色花瓣加紫色紋，色彩鮮豔。

 

白色花瓣中，點綴了紫色花紋，有種清雅高貴嘅氣質。

 

除咗蘭花，仲有呢束桃紅色嘅百合。

 

老豆話農場種嘅百合係荷蘭入口，所以特別貴，
盛惠每枝 $100，呢度值 $400 o架喇！

 

呢隻桃紅色嘅百合好夾過年插，好有氣氛呀！

 

呢朵白瓣紅紋嘅百合反而較為突出。

 

趁花蕊未剪影番張相先！

 

Winnie 送嘅水仙卒之都開花喇！ 我都送番兩枝百合俾佢做回禮。

 

每朵花都好可愛。

 

行近盆水仙就即刻聞到淡淡清香，好舒服。

 

聞到水仙花香就即刻諗起水仙茶！

 

最鍾意呢張大特寫，好清晰、好靚！

北芪黨參螺頭海參雪耳湯

        呢個湯其實係年三十晚煲 o架啦，不過因為要讓幾篇賀年 blog 出先，所以佢就唯有讓路喇！

        我之所以會煲呢個湯，係因為老豆係年廿八果日做咗個小手術，而我自己又唔係好識煲啲咩湯俾佢補一補，咁就唯有用滋陰嘅螺頭加豐富膠質嘅海參同雪耳煲湯俾佢飲囉！

材料：
海參
螺頭
豬腱
冬菇
雪耳
北芪
黨參
紅棗
圓肉

- 海參浸發好，清除內臟、內膜，用薑蔥水汆水，過冷河後切件。

- 螺頭去除內臟，洗刷乾淨，汆水後過冷河，切片備用。

- 豬腱洗乾淨，汆水後用清水沖洗；冬菇用清水浸軟身，去蒂後洗乾淨。

- 雪耳浸發後剪去底部，洗乾淨後汆水、過冷河。

- 北芪、黨參用熱水浸至軟身後洗淨，剪開兩份。

- 紅棗用熱水浸至軟身後洗淨，去核；圓肉用水浸軟後洗淨備用。

- 將所有材料凍水放落真空煲內鍋煲滾，之後參照真空煲用法將湯煲好。

- 最後落鹽調味即可。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

雜菜烤雞脾

        早前喺「大昌」買咗幾隻平價大雞脾，今晚就用佢嚟做餸，玩吓西式雜菜烤雞先。

材料：
雞脾
西芹
洋蔥
番茄
薯仔

醃料：
鹽
胡椒粉
黑椒粉
紅椒粉 ( paprika )
紹酒
羅勒 ( basil )
迷迭香 ( rosemary )
百里香 ( thyme )
奧勒崗 ( oregano )

調味料：
海鹽
橄欖油

- 雞脾解凍後洗乾淨，用抹手紙索乾水份。

- 雞脾搽上醃料，醃兩個鐘或以上。

- 西芹洗乾淨，摘去粗纖維；洋蔥去衣；番茄洗淨、去蒂；薯仔刨皮。

- 將以上所有雜菜切件，加入調味料，拌勻後平鋪喺焗盤上。

- 將雞脾放喺雜菜上面，雞皮向下，放入已預熱至 220 °C 嘅焗爐內焗約 25 分
  鐘。

- 將雞脾翻轉後再入爐焗多 20 -25 分鐘至雞肉熟透及雞皮金黃即可。

 

有齊各 "色" 蔬菜，十分健康。

 

今晚無煮到飯，整咗一個勁大嘅稞麥包。

 

稞麥包配雜菜烤雞脾，正！

 

今次個稞麥包都係跟《香軟的誘惑‧麵包》嚟做，
包肉同樣都係超軟熟，呢本食譜真係掂！

 

Notes：
- 雞脾可用全雞或淨雞翼代替，但烤焗時間就要有所調整。

- 想方便的話，可用意大利混合香草代替四種香草。

- 想更加西式的話，可用白酒代替紹酒。

- 要雞皮脆的話，喺雞脾翻轉後可轉用燒烤 ( grill )。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

新年糕，糕，糕！！

        噚晚晚餐係全糕宴，食齊哂三款唔同口味嘅賀年糕。

        不過，因為試用咗部新相機，仲未識用，求其影吓，所以質素勁差，不過我已經 edit 過 o架喇，請大家忍耐、忍耐！

首先出場嘅係自家制五香臘味芋頭糕。

 

跟住係 Winnie 媽咪親手整嘅蘿蔔糕。

 

繼續係自家出品，香甜紅豆糕。

 

一碗薏米腐竹糖水加三款賀年糕點，今次仲唔係新年糕，糕，糕！！

 

祝大家  步步高昇！

Winnie 嘅新年拌手禮

        一連幾篇 blog 都係同大家分享自家出品，今次想同大家分享一下 Winnie 送俾我嘅新年禮物。

首先係 Winnie 媽咪親自 "界" 嘅水仙頭，依家暫時都仲未開花，
到開花時再同大家報導一吓！

 

繼續係 Winnie 媽咪嘅自家出品蘿蔔糕。

 

        跟住呢個杞子桂花糕就犀利囉，係 Winnie 自己親手整 o架！佢仲 "斥資" 去「二記」買材料、買果凍模嚟整，而且仲試驗咗唔同材料嘅配搭 o添！對於一向 "十指不沾陽春水" 嘅 Winnie 嚟講，真係好難得 o架！不過話時話，味道都唔錯喎，讚好！

紅豆糕

        今日真係好充實，一早起身就整定嚿老麵，方便第時整麵包用；等緊老麵發酵時，就開始郁手整香草番茄全麥包；到等緊麵糰發酵時，我又繼續蒸糕呀！

        噚日整完芋頭糕，今日就蒸番個甜糕，係好啱農曆新年食嘅紅豆糕，祝大家 "紅" 運當頭，福星 "糕" 照！

 

 

香草番茄全麥包 Tomata & Herb Whole Wheat Bread

        自從「寒冷警告」生效之後，一直都凍到唔願郁，乜都唔想做，所以好耐都無整包包喇！今日 day-off 喺屋企兼天氣暖番好多，好啦，焗番個靚包食吓至得！

五香臘味芋頭糕

        到我喇、到我喇，卒之都輪到我蒸糕喇！

        上年農曆年我就已經整過蘿蔔糕，咁今年就唔再整喇，今年試整咗芋頭糕呀，你哋睇，個樣都幾 OK  㗎！

恭賀新禧！

        今日係新正頭大年初一，我喺度祝各位 blogger 龍馬精神、一本萬利、心想事成！

恭賀新禧，新年快樂呀！

 

每年農曆年，遠在加拿大嘅葉太都一定會寄個賀年卡俾我哋，
真係有心！

 

        每年年初一都秉承住媽咪嘅指定動作：咪就係煮南乳炆齋囉！不過今次有啲特別，加咗 Louisa 喺意大利帶返嚟嘅勁香牛肝菌，不過唔知係因為炆得太耐定係南乳味太濃，食唔到牛肝菌嘅香味。

 

        年初一必定會去伯伯、伯娘屋企拜年兼食晚飯，當中除咗我之外，表嫂 Polly 都會食齋，所以佢同表姐 Flora 呢幾年都有親手整少少素菜小食，咁我都唔可以次次都齋食唔整嘢 o架！今年就整番個齋鴨腎同佢哋一齊分享。

 

        好喇，趕住出去拜年喇，遲啲再見！恭喜發財！！