朱古力磚 Pavé au chocolat

        聽日就係情人節喇，一提起情人節，你哋會諗起咩呢？情人？呢層就當然啦，但我就即刻諗起朱古力囉！所以星期四果日去油麻地「二記」買嘢時，真係人山人海，俾錢都要排長龍，因為個個 DIY 友都買料整朱古力嘛！唔係講笑，驟眼望落，真係幾乎個個人手上都有包朱古力㗎，包括我自己都係呢，哈哈！不過我唔係專登走去買嚟整朱古力嘅，只係咁啱去入貨補倉啫！

        屋企啲現成朱古力都通通俾我食哂喇，咁我又唔想去買，咁就自己郁手整啦！所以，今次整呢啲朱古力係純粹整俾自己食㗎咋，只係咁啱得咁橋撞正情人節前夕啫，絕對唔係整嚟送俾情人㗎，哈哈！況且，我根本就無情人，我疊埋心水做王老五、老姑公㗎喇！！

材料：

55%朱古力      35克
70%朱古力      100克
淡忌廉              100毫升
麥芽糖              10克
可可粉              適量

- 將淡忌廉同麥芽糖倒入煲內加熱。

- 當麥芽糖完全溶解並與淡忌廉拌勻後，倒入朱古力內，拌至朱古力溶化。

- 將朱古力漿倒入已墊入爐紙嘅長形模內，輕輕掃平表面。

- 放入雪櫃雪至凝固後，喺表面灑上可可粉，之後反轉再灑可可粉。

- 將朱古力切成粒狀，之後逐粒放入裝有可可粉嘅碗內，將其餘表面均勻沾上可可
  粉即成。

以上材料份量可做 12 厘米 X 15 厘米朱古力一底。

同上次嘅和風朱古力比起，今次個味道
調校到甜番啲，無咁苦。

70% 朱古力我係用 Callebaut，味道果然同
Valrhona 唔同，有種好特別嘅香味。

加咗麥芽糖落去，果然喺室溫都無咁易受潮同溶化，
即使今日天氣咁潮濕，影咗咁多幅相
都仲係咁靚仔，掂！

Notes：
- 朱古力漿內加入麥芽糖，可令成品比較挺身，亦無咁易溶化。

- 時間許可的話，朱古力漿最好雪過夜，因為即使朱古力漿已經凝固，但仍然比較
  軟身，所以雪硬少少會比較容易切開。