紅豆糕

        今日真係好充實，一早起身就整定嚿老麵，方便第時整麵包用；等緊老麵發酵時，就開始郁手整香草番茄全麥包；到等緊麵糰發酵時，我又繼續蒸糕呀！

        噚日整完芋頭糕，今日就蒸番個甜糕，係好啱農曆新年食嘅紅豆糕，祝大家 "紅" 運當頭，福星 "糕" 照！

 

 

材料：
紅豆          150 克
粘米粉      113 克
糖             225 克
水             1000 毫升
油             2 湯匙

- 紅豆洗乾淨，用清水浸過夜。

- 第二日將紅豆放入煲內，倒入 750 毫升清水煲滾，之後用慢火繼續煲至豆腍。

- 加入糖拌勻，煮至完全溶解。與此同時，將剩餘嘅水與粘米粉混合，拌勻成粉漿。

- 將粉漿倒入紅豆糖水內，混合好之後加入油，拌勻。

- 當紅豆粉漿煮至濃稠時便可熄火，將佢倒入已搽油嘅模內，隔水蒸約 1 個鐘至熟。

 

以上材料份量可做 8 吋半 X 4 吋半 X 2 吋長型糕 1 底。

 
 

今次專登去「價真棧」度買呢包特大紅豆嚟整，噚晚浸豆之前清洗時
已經聞到有少少豆香，到今日煲豆時，香到呢…………

 

 

 

 

 

 

 

我用咗個防黏模嚟蒸糕，所以唔駛搽油都自動離邊。

 

 

 

 

 

 

你哋睇吓脫模脫得幾靚！我老豆見到都講咗幾聲好靚。

好期待聽晚煎嚟食呀！

 

 

 

Notes：

- 煮紅豆時，當水份與豆齊面即代表紅豆已經者腍。

 

- 煮紅豆粉漿時記得用慢火兼不停攪拌，以免黐底。

 

- 將糕放入雪櫃雪一晚，第二日先至切件煎香會比較實淨，無咁易爛。