豐富的第一餐

        嗱嗱嗱，咪插我住呀，對我嚟講真係好豐富㗎喇！！！

 

        平日起身後都食得好簡單、好求其，麥皮、麵包、muffin、餅乾或者 cereal 就算數，總之叫做有嘢落肚就算㗎喇，好少可會攪咁多 "花臣"，又多士又蘋果，仲沖埋杯檸茶㖭，因為噚日切咗個檸檬煮意粉嘛。

 

 

清補涼栗子節瓜湯

        絕大部份時間我都只會係煲齋湯，對於好多人嚟講，如果煲齋湯的話，可能會勁落蜜棗增加甜味，但我自己就唔會咁做，而且已經無用蜜棗好耐，成日都形住蜜棗唔知係咪有加糖製過。

        想啖湯夠甜的話，我通常都會落紅蘿蔔、粟米、栗子或粉葛，有時就會加紅腰豆同三角豆一齊煲，都可以增加一定甜度，但始終最重要嘅一點係：所有甜味材料必須凍水落煲。因為食材嘅甜味物質只會溶係凍水內，而我自己就習慣再浸多一段時間先煲，確保大部份甜味物質溶於水內，自己都已經做過實驗，材料凍水落煲跟水滾後先落料，甜度真係差好遠。
 
 

檸汁蜆肉扁意粉

       最近睇緊姚元浩嘅《元味好生活》，每集節目元浩都會邀請唔同嘉賓一齊體驗各種戶外活動，露營過夜及野外煮食。唔睇都唔知，原來台灣依家好興揸露營車到郊外露營，而且仲癲到每個家庭都為自己架露營車做出各樣主題，倒如民族風、all handmade decoration、法式風情等，真係大開眼界，最正就係架露營車可以變出一層角樓出嚟俾小朋友上去瞓。

 

        剛剛睇完男神王陽明同元浩玩越野飛車，超刺激，連周身肌肉、紋哂身，man 到爆嘅王陽明都全程乸埋塊面，用雙手掩護住個頭，皆因上落山坡嘅角度真係差唔多接近九十度咁滯，又無特別安全措施，仲恐怖過玩過山車，俾著我係座上客的話，我肯定暴斃車上，嚇都嚇死咗！！

 

        幾乎每一集元浩都會用到荷蘭鍋去煮食，佢勁讚好用，其實荷蘭鍋就係一隻戶外版嘅「Le creuset」或「Staub」，都係一種鑄鐵鍋，不過就係用支架吊起，直接喺柴火上面煮食，最特別係鍋蓋經特別設計，可以放上燒著嘅柴同炭，實行上下夾攻！前幾集男神高以翔露營時就煮咗個海鮮蛤蜊意大利麵，最特別係佢用咗檸檬汁去煮，真係從未試過食酸味嘅意粉，但元浩試過之後又話估唔到咁好味，攪到我都想試吓！反正屋企都有檸檬，又可以順便清埋上次整韓式海帶蜆肉湯時用剩嘅蜆肉，不過我就用自己個方法去煮，因為用料唔同，起碼高以翔係用新鮮帶殼嘅蛤蜊去煮哦！

 

 

健康版班尼迪蛋 Egg Benedict (healthy version)

        見冷宮仲有 English muffin，於是又玩吓整 egg benedict。

 

        一般人都覺得 egg benedict 非常邪惡，火腿嘅肥美不利健康，如果用片裝醃製火腿的話就更加無益；雞蛋又話高膽固醇，個荷蘭醬 (Hollandaise) 仲係用蛋黃做㖭，但其實最惡魔都仲係溶牛油，要拂打到個醬汁濃稠的話，用量都真係唔少！！

 

        所以，自己整的話，都係整番個健康版好啲喇！

 

 

憑歌寄意，憑花表心意！

        話咁快就已經八年，一切都好似剛剛發生無耐，所有眼前影像仍然歷歷在目！呢幾年可以做嘅，就只係可以 ……
 
 

鹹味麵包布甸 Savoury Bread Pudding

        冷宮一有隔隔隔隔夜麵包，我就會用嚟整西多同麵包布甸，但都係唔想成日食甜嘢，始終對身體唔好嘛，所以今次就大膽一試整成鹹嘅麵包布甸，效果相當不俗，仲可以用嚟當主食哦！

 

 

雙色迷你缽仔糕

        Blog 友小月話唔知點解整缽仔糕時啲紅豆會沉哂落底，我自己都唔明白，因為我上次整時真係全部浮面，但我依家應該估到係咩原因喇，因為今次自己都中招嘛！！！

 

        唔知大家有無遇到相同情況，依家啲紅豆好難煲得腍，甚至係煲極都唔腍，初時以為自己買啲紅豆 cheap 先會有呢個情況，但原來朋友同學生家長都係咁講。唔記得喺邊度聽過話紅豆越大粒就越難煲得腍，之但係依家好似都幾難搵到細粒紅豆嚟買，周圍賣嘅都係大大粒，所以我每次煲完紅豆都會先放上冰格雪至結冰，之後先再用嚟整嘢，咁就一定會腍，跟十分鐘就煲好粥嘅原理一樣。

 

        呢次就係因為偷懶無做到放冰格呢個 step，紅豆唔係真係完完全全煮腍哂，仲帶點實，有點重身，所以最終全部沉哂底！！

 



  

橙香朱古力 biscotti

        印象中好似 N 年無用可可粉整過嘢，biscotti 都一樣好耐無整，就將呢兩樣嘢結合埋一齊啦！

 

 

瑞士汁豆腐乾

        上次鹵完雞翼同雞腳之後，跟住就買咗塊豆腐乾返嚟繼續鹵，原本想買埋雞腎、鴨腎之類物體，但凍肉店無得賣，得火雞腎，未食過又唔知好唔好食，所以最終都係無買到，加多兩隻蛋落去算數。

 

 

十五的齋 pizza

        今日係十五，所以整 pizza 時不單只唔落肉，連洋蔥、蒜頭之類嘅五辛都無落到。