檸汁蜆肉扁意粉

       最近睇緊姚元浩嘅《元味好生活》，每集節目元浩都會邀請唔同嘉賓一齊體驗各種戶外活動，露營過夜及野外煮食。唔睇都唔知，原來台灣依家好興揸露營車到郊外露營，而且仲癲到每個家庭都為自己架露營車做出各樣主題，倒如民族風、all handmade decoration、法式風情等，真係大開眼界，最正就係架露營車可以變出一層角樓出嚟俾小朋友上去瞓。

 

        剛剛睇完男神王陽明同元浩玩越野飛車，超刺激，連周身肌肉、紋哂身，man 到爆嘅王陽明都全程乸埋塊面，用雙手掩護住個頭，皆因上落山坡嘅角度真係差唔多接近九十度咁滯，又無特別安全措施，仲恐怖過玩過山車，俾著我係座上客的話，我肯定暴斃車上，嚇都嚇死咗！！

 

        幾乎每一集元浩都會用到荷蘭鍋去煮食，佢勁讚好用，其實荷蘭鍋就係一隻戶外版嘅「Le creuset」或「Staub」，都係一種鑄鐵鍋，不過就係用支架吊起，直接喺柴火上面煮食，最特別係鍋蓋經特別設計，可以放上燒著嘅柴同炭，實行上下夾攻！前幾集男神高以翔露營時就煮咗個海鮮蛤蜊意大利麵，最特別係佢用咗檸檬汁去煮，真係從未試過食酸味嘅意粉，但元浩試過之後又話估唔到咁好味，攪到我都想試吓！反正屋企都有檸檬，又可以順便清埋上次整韓式海帶蜆肉湯時用剩嘅蜆肉，不過我就用自己個方法去煮，因為用料唔同，起碼高以翔係用新鮮帶殼嘅蛤蜊去煮哦！

 

 

材料：
急凍蜆肉
洋蔥
蒜片
番茄
辣椒
扁意粉

 

調味料：
上湯
鹽
黑椒
檸檬汁

- 蜆肉解凍後略沖洗，輕輕榨乾水份；洋蔥去衣後切碎。

- 番茄洗淨，去蒂切粒；辣椒切碎。

- 燒熱油，爆香洋蔥、蒜片同辣椒，加入番茄同蜆肉快手兜炒幾下，離火。

- 煲滾水，加鹽，依照包裝袋上指示煮熟意粉。

- 將意粉加入炒過嘅材料內，加適量上湯，兜炒至收乾水份。

- 最後加鹽、黑椒同檸檬汁調味即可上碟。

味道比想像中好好多，酸酸辣辣，加上蜆肉嘅

鮮味，最啱天時暑熱無乜胃口時食。

如果真係好似男神咁用新鮮蛤蜊加其他

海鮮料去整，肯定更加正呀！！