韓式炸醬麵 Jjajangmyeon (짜장면)

        睇得韓劇同 Maangchi 姨嘅 video 多，真係覺得韓文發音好多都跟普通話好似，有啲甚至係完全跟廣東話一模一樣，大長今個 “今” 字就係其中例子。雖然大家未必識睇韓文，但睇吓個拼音，再讀一讀，就完全知道呢個係 “炸醬麵”。拼音都唔識睇嗎？聽吓 Maangchi 姨點讀啦！

 

        早排睇電視個韓國旅遊特輯，主持人試食咗韓國炸醬麵，話跟中式完全係兩回事，而且味道偏甜。其實睇個樣都知道跟中式炸醬麵應該係完全唔同味道，但味道偏甜就真係估佢唔到，可能係因為所有蔬菜料都係帶甜啦！

 

 

 
材料：
豬肉
薯仔
洋蔥
白蘿蔔
翠玉瓜
白麵條

醃料：
鹽
糖
紹酒

調味料：
韓國黑豆醬
生粉
糖

- 豬肉切成粗粒，用醃料醃好；薯仔去皮；洋蔥去衣。

- 蘿蔔切去頭尾、刨皮；翠玉瓜洗淨後同樣切去頭尾。

- 將所有蔬菜料切粗粒，大細與豬肉粒相約，翠玉瓜汆水備用。

- 燒熱油，將豬肉落鑊炒至半熟，之後加入洋蔥、薯仔同蘿蔔兜炒，最後加入翠玉瓜。

- 將材料向外撥開，鑊中央加適量油，爆香黑豆醬，然後與所有材料拌勻。

- 加入適量水，冚蓋，用中火煮至材料軟身及豬肉熟透。

- 生粉加糖開水，倒入材料內埋芡，煮至醬汁濃稠即可。

- 煲滾水、加鹽，放入白麵條煮至全熟，過冷河後瀝乾水份。

 

- 麵條放入碗內，將煮好嘅炸醬材料淋上即成。

食譜都係出自 Maangchi 姨哦！

 

 

上個月又去尖沙咀韓國街買辣椒粉整泡菜，終於都買咗

呢包韓國黑豆醬嚟試吓，$10 包有 250g，每次

用量都唔需要太多，可以煮好多次，

賣包試試味都無妨。

基本上依家食飯都係無辣不歡，無辣嘢食的話餐飯

就好似食唔落，所以要加埋泡菜一齊食。

我覺得個黑豆醬味道有啲似中國豆豉 mix 日本味噌，

無豆豉味道咁香濃，有味噌嘅醇厚感覺。 

 

 

Notes：
- 翠玉瓜汆過水後先落鑊炒可減低致癌物大量產生。

 

- 如果用豬腩肉煮的話，可將腩肉爆炒至金黃兼微微脆身，食落更加香口。

- 埋芡前可先試味，因應自己口味酌量加鹽調味。