鹹味麵包布甸 Savoury Bread Pudding

        冷宮一有隔隔隔隔夜麵包，我就會用嚟整西多同麵包布甸，但都係唔想成日食甜嘢，始終對身體唔好嘛，所以今次就大膽一試整成鹹嘅麵包布甸，效果相當不俗，仲可以用嚟當主食哦！

 

 

材料：
西蘭花
鮮蘑菇
乾蔥頭
雞蛋
椰漿
清水
隔夜麵包

調味料：
鹽
糖
黑椒

- 西蘭花洗乾淨後切細朵，之後汆水，瀝乾備用。

- 蘑菇略沖洗後切片；乾蔥頭去衣後切細。

- 燒熱油，放乾蔥頭落鑊爆香，之後再加入蘑菇兜炒，盛起攤凍。

- 雞蛋拂打成蛋液，與椰漿及清水攪拌混合，加入適量鹽、糖拌勻。

- 將蛋漿倒入容器內，放入部份西蘭花、蘑菇同乾蔥。

- 麵包撕成細塊，放入蛋漿內，再將餘下嘅副材料放入，並灑上黑椒。

- 放置片刻，讓麵包吸收蛋漿。

- 烤盤內倒入適量水，然後將容器放上，放入已預熱至 160 ℃ 嘅焗爐內焗 20 分鐘。

 

- 將爐溫調至 180 ℃，再焗 10 分鐘即成。
 
 
 

就咁睇，係咪有啲似粵菜嘅魚腸炸麵蒸蛋呢！

我自己就覺得呢個鹹布甸比甜食更加正呀！！ ^^

 

 

 

 

Notes：
- 雞蛋與液體比例為 1:1.5，即一隻雞蛋 (以 50 克計算) 就加75 毫升液體，跟蒸水蛋

   一樣效果。

 

- 椰漿可用上湯、牛奶，甚至係清水代替。

 

- 如果鍾意的話，容器可預先掃油，避免蛋漿熟後黐實容器難以清洗。

 

- 最後將爐溫調高，除可確保蛋漿完全凝固之外，更可以令麵包焗得金黃香脆。