新街市

        歷時超過一年，「領展」喺蝴蝶灣嘅 "皇宮" 卒之都重建完成，以後買餸就好似以前咁方便同多番好多選擇，起碼檔位大番好多，檔主都可以入番多啲貨品俾居民選購。

 

        翻新後嘅街市當然靚好多啦，但都係嗰句，羊毛出自羊身上，貨品價格明顯比之前貴咗。見麵檔哥哥唔單只照舊賣粉麵，依家仲賣埋豆腐芽菜㖭，佢話無辦法，要買多啲嘢先可以賺多啲去 cover 租金，我問佢加咗幾多租金，佢話同舊街市比較貴咗差唔多一陪哦！！

 

 

 

時間都去哪兒了

        呢一、兩個禮拜都好忙，忙到今日係母親節都唔記得，所以連花都唔記得買！

        早前同老表傾開偈，佢驚覺原來咁快已經九年，係呀，時間真係過得好快，眨吓眼就已經九年！！

素烤鴨沙律

        近排其實無乜動力做嘢，乜都唔想做，連瞓都唔想瞓。但唔煮又無得食，尤其係夜返嘅時候，隔夜餸就變得好珍貴，唔使煮，翻熱就即刻可以食，所以習慣咗一餐煮埋兩餐食，幾唔想整都係要整！

 

        好彩天氣開始熱，買啲生果蔬菜整沙律都可以，只需要洗洗切切，唔使開火煮食已經慳番唔少功夫，連鑊同煲都唔使洗！整緊蔬果嘅同時，放件素烤鴨入焗爐焗到個面脆卜卜，之後再灑上焗香咗嘅花生同椰絲，攪掂，好好醜醜又一餐！

 

 

橙汁蜂蜜雪芳蛋糕 Orange Honey Chiffon Cake

         幾個禮拜前上網睇 HKTV 一個清談節目，節目臨完結之前，主持人劉玉翠介紹咗嘉賓周家怡睇一本書，書名係《愛他也要愛自己》，周家怡當堂即刻喊哂，眼淚完全不受控制。係咪我其實都要搵下呢個世界會唔會有本書叫做《對人好也要對自己好》呢！？睇完之後可能就唔會再俾你哋話我要學識對自己好啲、要錫自己多啲，唔好淨係顧住人感受，我諗我依家會更加清楚知道，當年媽咪話我「只會窮自己而唔會窮人哋」呢句說話嘅真正含意！

 

        無工開，無嘢好做，就自自然然會諗好多嘢，的確，教緊學生、做緊家務、上緊網時係完全無機會俾自己去諗嘢。好啦，就學你哋咁講，得閒就整吓嘢食，唔好俾自己個腦咁 "得閒"！

 

        有日無聊拎起本《我愛和風洋菓子》嚟睇，見到個橘子蜂蜜戚風蛋糕食譜，咁啱早兩日十五又將供過佛嘅橙換咗落嚟，咁就索性整呢個蛋糕啦！橘子蜂蜜我就無喇，只係用老竇拎番嚟嘅蜂蜜，係佢個農場 friend 自家出品，同埋部份低筋麵粉我都用咗全麥麵粉代替。

 

 

警署

        仲以為呢世人都唔會有可能踏足警署㖭！又唔係俾差佬盤，又唔係領好市民獎，仲要唔見錢，真係越窮就越見鬼，帶埋錢打工！！

 

 

肉桂橙朱古力鬆餅 Cinnamon & Orange Chocolate Muffin

都唔明白自己點解永遠都淨係識得對人好，唔識對自己好，

永遠都係先顧及人哋感受，將人哋放喺第一位，

對任何人都係不問收穫地付出，

自己就好少顧及自己，

但最終受傷害嗰個咪又係自己！！！！

 

 

一料兩食

        之前真係勁潮濕，乾嘅衫掛喺度都變到又濕又軟身，牆身似俾人潑完水，地下又好似倒瀉水咁，仲濕到爆燈㖭呀！"爆燈" 唔係純粹加重語氣嘅比喻，而係真係濕到燈膽都爆埋，應該係因為濕氣太重而短路，一撳燈掣就即刻 "pop" 一聲燒咗個膽喇！！

 

        今日又整普羅旺斯燴雜菜 (ratatouille)，仲特登留起咗少少雜菜嚟整咗個 open sandwich 㖭！

 

 

韓國石鍋飯 Dolsot Bibimbap (돌솥 비빔밥)

        老竇買咗個石鍋返嚟幾年，都完全無咗件事，年年到咗天氣回暖時先記得又無整到韓國石鍋飯！趁呢個禮拜又凍番，快啲試整一次先！

 

 

素蘿蔔糕

        呢兩年過年 Ernest 媽咪都有送我蘿蔔糕，所以我自己都懶得整。

 

        大年初一去老表家團拜，表姐特別整咗個素蘿蔔糕俾我同大表嫂食，真係食過番噚味，其他食肉人都爭住要食！趁依家都仲買到靚蘿蔔，等我都自己整吓先！

 

        其實都知道唔用臘味整的話，應該要大大多加調味料，但因為我一向食得清淡，而且又怕榨菜會好鹹，所以都唔敢大刀闊斧咁落調味，結果係唔係好夠味囉！不過咁有咁好，反而食得出蘿蔔嘅清甜，係食咗幾廿年蘿蔔糕以來從未有過嘅滋味，始終不時不食係智慧，冬天白蘿蔔當造特別清甜好食！

 

 

烤焗茄子 Aubergine al Forno

        Facebook add 咗 Jamie Oliver 個專頁，原來佢都整好多 vegetarian recipes。呢個 Aubergine al forno 食譜一睇就已經覺得好吸引，而且材料又好簡單，不過有少部份食材我手上無，所以改用其他材料代替。

 

        整呢個烤焗茄子唔單只簡單，又唔使開鑊，最啱好夜先放工返到屋企時整，唔怕炒鑊聲音嘈到隔離上下左右。最正係灑面啲麵包糠料，有香又脆！