Kestrel's Blog

2013年2月26日星期二

從日本抵港的手信

新年假期時，Ernest 一家人去咗日本過年，除咗吃喝玩樂之外，Ernest 媽咪亦趁機入貨，講緊嘅當然係烘焙用品及食材啦！我都有幸可以分享到呢！

全部都係日文，真係全靠看圖辨認哦！

呢兩包係薑粉同南瓜粉，可以用嚟整麵包同餅乾。

呢盒就係傳說中嘅白神山酵母喇！真係要好好咁利用佢，唔係就嘥料喇！

用咗仙姐喺《頭條日報》個白麵包多士食譜嚟試吓個酵母威力，
你哋覺得點呢？

摵開個包包俾大家欣賞吓啦！

仲要多謝 Ernest 指定要買俾我嘅薑糖呀！

法式貝殼蛋糕 (蜂蜜綠茶味) Madeleine (Honey & Green Tea Flavor)

跟住到蜂蜜綠茶貝殼蛋糕出場。

材料：
低筋麵粉 50 克
綠茶粉 1 茶匙
泡打粉 1/2 茶匙
雞蛋 1 隻
糖霜 30 克
蜂蜜 20 克
橄欖油 50 克

- 麵粉、綠茶粉與泡打粉混合過篩 3 次；雞蛋拂打成蛋液。

- 將糖霜加入蛋液內，用打蛋器拂打至糖完全溶解後再拌入蜂蜜。

- 粉類加入蛋液內攪拌均勻，跟住加入橄欖油，攪拌成柔滑麵糊。

- 用保鮮紙包好，放入雪櫃雪至稠身。

- 蛋糕模搽油，然後篩入高筋麵粉直至完全覆蓋整個模，之後將多餘嘅麵粉倒出。

- 將蛋糕模放入雪櫃雪凍 10 分鐘；等候時將麵糊放入已放 1 厘米唧嘴嘅唧袋內。

- 將麵糊唧入模內至 8 分滿，放入已預熱至 200 ℃ 嘅焗爐內，焗 7 分鐘。

- 將爐溫降至 170 ℃，再焗多 8 分鐘即可。

- 出爐後趁熱脫模，放涼後即可享用。

以上材料份量可做 4 厘米 X 7厘米蛋糕 10 個。

如果齋睇外表顏色，真係唔會知道係綠茶味囉！
Winnie 仲以為係朱古力味呢！

切開裡面就睇到好靚嘅綠色喇，而且綠茶味仲好香濃㖭，
Miss Cheng 都讚好味呀！ (thumbs up)

Notes：
- 請參考《法式貝殼蛋糕》內嘅製作要點。

法式貝殼蛋糕 (咖啡味) Madeleine (Coffee Flavor)

趁出門前有小小時間，打番咖啡貝殼蛋糕個食譜先。

材料：
低筋麵粉 50 克
咖啡粉 1 茶匙
泡打粉 1/2 茶匙
雞蛋 1 隻
糖霜 50 克
咖啡濃縮液 1 茶匙
橄欖油 50 克

- 麵粉、咖啡粉與泡打粉混合過篩 3 次；雞蛋拂打成蛋液。

- 將糖霜加入蛋液內，用打蛋器拂打至糖完全溶解，之後拌入咖啡濃縮液。

- 粉類加入蛋液內攪拌均勻，再將橄欖油加入，攪拌成柔滑麵糊。

- 用保鮮紙包好，放入雪櫃雪至稠身。

- 蛋糕模搽油，然後篩入高筋麵粉直至完全覆蓋整個模，之後將多餘嘅麵粉倒出。

- 將蛋糕模放入雪櫃雪凍 10 分鐘；等候時將麵糊放入已放 1 厘米唧嘴嘅唧袋內。

- 將麵糊唧入模內至 8 分滿，放入已預熱至 200 ℃ 嘅焗爐內，焗 7 分鐘。

- 將爐溫降至 170 ℃，再焗多 8 分鐘即可。

- 出爐後趁熱脫模，放涼後即可享用。

以上材料份量可做 4 厘米 X 7厘米蛋糕 10 個。

唉，始終都有一、兩件整得唔靚仔，可能搽得太多油，
聚集喺個模最深位置，再整時要多多留意至得！

自從用咗濃縮咖啡液之後，整嚫咖啡味嘅嘢都香濃好多，
咖啡味出好多喇！ (rock on!)

Notes：
- 咖啡粉宜選用 espresso，否則咖啡味唔會太出。

- 咖啡濃縮液製法，請參閱《自製咖啡濃縮液》。

2013年2月25日星期一

三色貝殼蛋糕

聽晚中心春茗聚餐，難得全部導師同職員齊集，整啲小蛋糕請大家食，當係同大家拜年啦！

你哋可能會問：得兩種味道，點解叫做三色呢？其實真係有三種
味道㗎，只不過其中一種焗完之後變到好深色啫！

三隻味道分別係：蜂蜜綠茶、原味同咖啡。

今次隻原味蛋糕用番溶牛油同檸檬皮茸整呀！

包裝好嗰兩盒係送俾 Miss Cheng 同 Winnie，因為佢哋兩個都有
送禮俾我，我回番禮俾佢哋，剩低嘅就大家一齊分享啦！

食譜遲啲先後補啦，今日已經攪足成日，由朝做到晚，未停過手，夜晚餐飯都攪成點鐘先食，依家已經好攰喇，要瞓覺喇！！ (sleepy)

2013年2月24日星期日

無蛋朱古力蛋糕 No Egg Chocolate Cake

呢個蛋糕都唔係第一次整喇，好耐之前已經整過一次，效果唔錯，好好味，所以前兩日煮咖喱雞時就特登留起適量椰漿嚟整呢個朱古力蛋糕，咁今日農曆十五就一樣可以有蛋糕食喇！

材料：
低筋麵粉 100 克
可可粉 15 克
梳打粉 1 克
泡打粉 3 克
橄欖油 50 克
糖 80 克
鹽 2 克
椰漿 160 克
入爐朱古力粒 30 克

- 所有粉類混合過篩 3 次。

- 橄欖油、糖同鹽攪拌均勻，之後將粉類篩入，用膠刮邊切邊混合。

- 拌入椰漿，徹底攪拌均勻後再加入朱古力粒，拌勻。

- 將麵糊倒入已墊牛油紙嘅蛋糕模內，放入已預熱至 180 ℃ 嘅焗爐內，焗約 30 – 35 分鐘。

- 出爐後脫模放架上攤凍，切件享用。

以上材料份量可做直徑 14 厘米蛋糕 1 個。

食譜參考自陳明裡嘅《無奶蛋素西點》。

因為蛋糕本身個面都有少少裂，所以脫模時手快快整爛咗個面都唔知！！ (crying)

咪睇只係用得咁少可可粉呀，朱古力味都好濃呀，而且質地濕潤，
食落感覺特別香濃，但係椰子味就一啲都食唔到！

Notes：
- 原食譜材料及用量：高筋麵粉；葡萄籽油 70 克；糖 110 克；入爐朱古力粒 50 克。

與 blog 友飯聚

寫咗 blog 都已經有好幾年時間，噚日都係第一次約 blog 友出嚟見面食飯。

同 blog 友緊張大師-小女人都只係識咗大約半年度，但係大家就好似已經係好熟嘅老朋友咁，不但分享煮食烘焙，就連生活鎖事都會傾到，更重要嘅係，我哋大家都係佛教徒之餘，仲係主要以食素為主，所以噚日我哋就約埋一齊去食素食自助餐喇！

緊張大師-小女人真係客氣，專登整咗個芝麻雪芳蛋糕俾我，
蛋糕又靚又好食，手勢唔錯哦！ (thumbs up)

唔單只有蛋糕，仲有廚具㖭呀！佢話啱用就即管開聲，唔使怕唔好意思，
反正都係要送人喎。最後就揀咗呢個不銹鋼漏斗同小刀一把。好彩
我都一早準備定見面禮，如果唔係就真係唔好意思喇！
小女人，好多謝妳呀！！ (big grin)

香茅咖喱雞

上次整完冬蔭功之後，用剩咗啲香茅、檸檬葉同青檸放雪櫃，都要盡快用咗佢。呢個時候，我就走去揭吓本娘惹食譜，睇吓有邊個食譜會用得著呢幾樣嘢，俾我發現到有個椰汁咖喱雞真係會用到香茅、檸檬葉，就連青檸都加埋落咖喱，哈，真係天助我也！！於是就參考咗佢部份用料同煮法，用咗現成港式咖喱醬，/再結合自己嘅做法，就做出呢味香茅咖喱雞喇！

材料：
雞
薯仔
洋蔥
番茄
椰漿
椰絲

醃料：
紹酒
生抽
蠔油

香料：
芫荽籽粉
香茅
南薑
咖喱醬
檸檬葉

調味料：
鹽
糖
魚露
青檸汁
辣椒油

- 將雞洗乾淨，切件後用醃料醃好；薯仔刨皮後切件，小部份切碎，將大件薯仔略炸至金黃。

- 洋蔥去衣後切件，留起小部份切碎；番茄洗淨，去蒂後切件。

- 香茅洗淨後用刀拍鬆，然後切小段；南薑去皮後切片。

- 燒熱鑊，放入芫荽籽粉，白鑊烘香，盛起；椰絲用白鑊炒至金黃色。

- 燒熱油，除檸檬葉外，將其餘香料及洋蔥碎全部爆香。

- 加入雞件兜炒至完全沾上香料後，將薯仔及洋蔥落鑊繼續兜抄一陣間。

- 倒入椰漿及適量水，兜炒均勻後，轉中慢火燜至材料全熟，其間不時兜炒。

- 將番茄、椰絲及調味料落鑊，不斷兜炒至咖喱汁變得濃稠即可上碟。

加咗香茅、南薑同檸檬葉一齊煮咖喱，味道帶點東南亞風味。

上碟後再加多少少辣椒油，更加香濃惹味哦！！

Notes：
- 切碎薯仔會比較容易煮至溶化，可令咖喱更加濃稠；而炸過嘅薯仔則比較硬身，無咁易煮爛。

- 洋蔥碎除作為香料用之外，亦因為比較容易煮溶，可令咖喱更加香甜。

- 炒椰絲時必須用慢火，否則好易炒燶。

- 番茄最好最後加入，否則會煮得過腍而且煮爛。

2013年2月17日星期日

受寵若驚的厚禮

收到呢盒名牌朱古力當然好開心啦，但係送禮人地位超然，份量又重，接過手的一刻真係有啲受寵若驚，幾乎唔識反應呢！

知我鍾意食黑朱古力，特登送俾我做新年禮物，多謝 Miss Cheng 呀！ (kiss)

法式貝殼蛋糕 Madeleine

今日算係好得閒，的起心肝試吓用個貝殼模整蛋糕，原來整貝殼蛋糕都好簡單、好好玩哦！

因為怕失敗，所以噚晚已經睇定哂手頭上所有 madeleine 食譜，原本已經敲定用其中一個食譜，但係到實戰時真係有差池，當然要即刻急謀對策啦！即刻諗番哂噚晚睇過嘅食譜，之後剩低落嚟嗰份麵糊就立刻有改善喇，仲做到外脆內軟㖭呀！所以最終都係集合咗幾個食譜做出嚟呢！

心水清嘅朋友都應該會留意到，凡嚫用溶牛油整嘅嘢我都一定會用液體油代替，慳功夫之餘，之後清潔工作都易好多，仲可以無咗我唔鍾意嘅臊味㖭！一般食譜都會用到檸檬皮茸，但係我唔想為咗嗰少少檸檬皮又走去買個檸檬，反正屋企有橙，就用橙皮茸代替算數，焗出嚟有勁香橙味，一樣咁正呀！