2010年10月27日星期三

鳥羽名古屋料理@銅鑼灣

        晏晝同 Miss 食完 lunch 之後,明仔就 join 埋我同 Winnie 一齊行街睇,不過今次真係辛苦哂明仔喇,因為佢原來唔慣行咁多路,到臨走時仲頭痛 o添,見到佢 "紅都面哂",真係幾驚佢爆血管呀,果陣我都唔知點算好喇!! 明仔,你應該一早同我單聲你習慣四、五點後先出動嘛,不過下次我會醒水 o架喇!


        果晚就去咗銅鑼灣嘅「鳥羽」度食日本。呢間日本料理係明仔嘅心水之選,佢專登帶我同 Winnie 一齊去試吓 o架! 




        一出 lift 見到呢個 feature wall,我就好肯定喺電視節目《大廚出馬度見過呢間舖,我仲記得個節目度馬浚偉跟個大廚學整味噌關東煮,係呢度大廚嘅首本之作。原本我都想叫嚟試吓,不過因為明仔同 Winnie 負責點菜,況且我點咗佢哋又未必鍾意食,所以我就無出聲,留番俾明仔做推介啦!反正喺個節目度都有詳細教點整,一於下次自己試吓整嚟食。



舖內環境都好舒服。


 



呢碟味噌蘿蔔唔知係咪每枱都有前菜呢?我同 Winnie 去到時已經
見到有一碟,到我哋兩個坐低時又再拎多碟過。原本每碟都有
兩件 o架,不過因為明仔同 Winnie 各食咗一嚿我先至影相。


 



明仔推介嘅白桃乳酸特飲同巨峰乳酸特飲。


 



呢碟係「手羽先唐揚」,明仔話係鎮店之寶,果然真係好好食呀,唔會好肥,
香辣味又啱好,節目度都有介紹,係大廚首創 o架!


 



呢個炸蛋黃天婦羅真係一絕,好食到震!! 外面果層腐皮炸到脆卜卜,
裡面個蛋黃就仲係流動 o架!節目度都有介紹製作過程。我見 Winnie
唔係太鍾意食蛋,所以我就食多一件,咁就可以讓佢兩個
食多隻雞翼啦,皆大歡喜。


 



呢個係雜菜天婦羅,又係勁好食,番薯同南瓜都好香甜,
仲有一件唔知係咩菇,香到呢 ……


 



        叫咗四款燒物,分別係露荀豕肉卷、雞肉丸、牛脷同廣島蠔。露荀豕肉卷好正,露荀 "好荀",又爽又甜,外面豬肉唔覺得 "漏";雞肉丸非常彈牙,因為節目度介紹係用山薯溝雞肉嚟整,唔會好似中式肉丸咁用生粉整而變得太過實。至於牛脷同廣島蠔我就無食到,不過 Winnie 食緊串蠔時都聞到好濃蠔味,難怪佢都話 "好蠔"!


 



呢碗係鯖魚茶漬飯,又係另一驚喜,咪睇見啲湯咁清,以為無乜
味道,查實好鮮味 o架,件鯖魚亦都好鮮甜、"好魚" o架!
屋企冰箱都雪咗條鯖魚,搵日試吓自己整先!



        明仔真係無介紹錯呀,非常好食,埋單每人差不多 $200。雖然呢一餐對我嚟講都係一餐 "出血" 餐,但就真係物有所值囉。我自己少出街食飯,唔係好知行情,佢哋就話算係平 o架喇,有興趣嘅朋友不妨一試,值得推介!你哋可以 click 番上面各條 link,睇吓各款食物介紹。



P.S.  食完飯之後,我哋三個繼續行街,行到以前「大丸」對出果條路時,明仔見到周麗淇喺條街度一邊唱歌,一邊拍 MV,佢話好少見到明星,於是就拎部電話出嚟影相,我同 Winnie 就無乜興趣。不過我同 Winnie 就見到啲勁攪笑嘢囉,有條 "佬" 好似成世未見過 "靚女" 咁,一路揸住杯一路行,個頭係咁擰歪望住周麗淇,突然間 "" 一聲,佢撞咗落個路牌度,之後就一邊傻笑,一邊捽個額頭,街上有幾個人見到都喺度勁笑,當然,我同 Winnie 都勁笑爆嘴啦!!唉,真係一個行路唔戴眼嘅 "鹹濕佬"!好彩周麗淇見唔到咋,如果唔係,肯定笑到拍唔到落去呀!!!!


5 則留言:

  1. 睇見D相都想再去食過,最舒服係食完先多人入黎,之前無咩人好似包場真係好正!
    諗起個傻佬真係可惜...我掛住睇明星睇唔到佢撞柱呀!!><~
    你個曲奇自己改咁多野,我點整得返你比我個味呀?玩野呀?不如你打你個份量比我啦.....
    [版主回覆10/28/2010 00:46:00]        嗯,又變番宇治 嗱!         我都好想再食呀,不過唔想咁快又再出血囉!         咁咪係,睇個 "鹹濕佬" 好過睇周麗淇啦!         個 燕麥紅莓杏仁曲奇 食譜 喺度呀,你 click 入去睇 吓啦!

    回覆刪除
  2. d食物好吸引我呀!我好想試 手羽先唐揚  & 炸蛋黃天婦羅  呀...........
    [版主回覆10/28/2010 13:57:00]         呢兩個真係必試 o架!如果下次再有機會去食 嘢,我一定會試八丁味噌!

    回覆刪除
  3. 揀倒禮物未呢?
    [版主回覆10/30/2010 16:48:00]        本來揀定喇,不過,有突發事件呀 ………

    回覆刪除
  4. 真係值得一試喎, 味味都好吸引.
    [版主回覆10/30/2010 16:50:00]        係呀,你真係要同太太一齊試 吓,好味 呀!

    回覆刪除
  5. "有突發事件" 咪鬼吊引喇哀人.....

    回覆刪除