鳥羽名古屋料理@銅鑼灣

        晏晝同 Miss 食完 lunch 之後，明仔就 join 埋我同 Winnie 一齊行街睇嘢，不過今次真係辛苦哂明仔喇，因為佢原來唔慣行咁多路，到臨走時仲頭痛 o添，見到佢 "紅都面哂"，真係幾驚佢爆血管呀，果陣我都唔知點算好喇！！ 明仔，你應該一早同我單聲你習慣四、五點後先出動嘛，不過下次我會醒水 o架喇！

        果晚我哋就去咗銅鑼灣嘅「鳥羽」度食日本嘢。呢間日本料理係明仔嘅心水之選，佢專登帶我同 Winnie 一齊去試吓 o架！ 

        一出 lift 見到呢個 feature wall，我就好肯定喺電視節目《大廚出馬》度見過呢間舖，我仲記得個節目度馬浚偉跟個大廚學整味噌關東煮，係呢度大廚嘅首本之作。原本我都想叫嚟試吓，不過因為明仔同 Winnie 負責點菜，況且我點咗佢哋又未必鍾意食，所以我就無出聲，留番俾明仔做推介啦！反正喺個節目度都有詳細教點整，一於下次自己試吓整嚟食。

舖內環境都好舒服。

 

呢碟味噌蘿蔔唔知係咪每枱都有嘅前菜呢？我同 Winnie 去到時已經
見到有一碟，到我哋兩個坐低時又再拎多碟過嚟。原本每碟都有
兩件 o架，不過因為明仔同 Winnie 各食咗一嚿我先至影相。

 

明仔推介嘅白桃乳酸特飲同巨峰乳酸特飲。

 

呢碟係「手羽先唐揚」，明仔話係鎮店之寶，果然真係好好食呀，唔會好肥，
香辣味又啱啱好，節目度都有介紹，係大廚首創 o架！

 

呢個炸蛋黃天婦羅真係一絕，好食到震！！ 外面果層腐皮炸到脆卜卜，
裡面個蛋黃就仲係流動 o架！節目度都有介紹製作過程。我見 Winnie
唔係太鍾意食蛋，所以我就食多一件，咁就可以讓佢兩個
食多隻雞翼啦，皆大歡喜。

 

呢個係雜菜天婦羅，又係勁好食，番薯同南瓜都好香甜，
仲有一件唔知係咩菇，香到呢 ……

 

        叫咗四款燒物，分別係露荀豕肉卷、雞肉丸、牛脷同廣島蠔。露荀豕肉卷好正，露荀 "好荀"，又爽又甜，外面豬肉唔覺得 "漏"；雞肉丸非常彈牙，因為節目度介紹係用山薯溝雞肉嚟整，唔會好似中式肉丸咁用生粉整而變得太過實。至於牛脷同廣島蠔我就無食到，不過 Winnie 食緊串蠔時都聞到好濃蠔味，難怪佢都話 "好蠔"！

 

呢碗係鯖魚茶漬飯，又係另一驚喜，咪睇見啲湯咁清，以為無乜
味道，查實好鮮味 o架，件鯖魚亦都好鮮甜、"好魚" o架！
屋企冰箱都雪咗條鯖魚，搵日試吓自己整先！

        明仔真係無介紹錯呀，非常好食，埋單每人差不多 $200。雖然呢一餐對我嚟講都係一餐 "出血" 餐，但就真係物有所值囉。我自己少出街食飯，唔係好知行情，佢哋就話算係平 o架喇，有興趣嘅朋友不妨一試，值得推介！你哋可以 click 番上面各條 link，睇吓各款食物介紹。

P.S.  食完飯之後，我哋三個繼續行街，行到以前「大丸」對出果條路時，明仔見到周麗淇喺條街度一邊唱歌，一邊拍 MV，佢話好少見到明星，於是就拎部電話出嚟影相，我同 Winnie 就無乜興趣。不過我同 Winnie 就見到啲勁攪笑嘅嘢囉，有條 "佬" 好似成世未見過 "靚女" 咁，一路揸住杯嘢一路行，個頭係咁擰歪望住周麗淇，突然間 "嘭" 一聲，佢撞咗落個路牌度，之後就一邊傻笑，一邊捽個額頭，街上有幾個人見到都喺度勁笑，當然，我同 Winnie 都勁笑爆嘴啦！！唉，真係一個行路唔戴眼嘅 "鹹濕佬"！好彩周麗淇見唔到咋，如果唔係，肯定笑到拍唔到落去呀！！！！