2010年12月26日星期日

日式咖喱吉列豬扒

        一直都好想試吓自己整吉列豬扒,但係每次一諗起炸鑊油就驚,所以遲遲都無行動。直至早排「JUSCO」會員日時喺超市度買咗包日式麵包糠返嚟,今日都卒之起心整喇!



材料:
脢頭豬扒
紅蘿蔔
蘋果
急凍粟米粒
椰菜
乾蔥頭
日式麵包糠
麵粉
雞蛋


醃料:


日本醬油
清酒


調味料:
日式咖喱磚


- 豬扒洗乾淨,用抹手紙索乾水份後用刀背將豬扒兩面拍鬆,之後再推回原狀。


- 用醃料將豬扒醃好備用。


- 蘋果去皮去芯、切粒;紅蘿蔔刨皮,切去頭尾後切粒;粟米解凍後沖水洗淨。


- 將紅蘿蔔同粟米汆水,瀝乾水份;乾蔥頭去衣、切去頭尾後開邊;椰菜洗淨、
  切絲。


- 將雞蛋拂打成蛋液,豬扒沾滿麵粉後再蘸滿蛋液,最後沾滿麵包糠。


- 豬扒放入180 °C 滾油內炸熟至金黃色,其間需將豬扒翻轉。


- 炸好嘅豬扒放上吸油紙上,然後切件。


- 另燒熱油鑊,爆香乾蔥頭,之後加入蘋果、紅蘿蔔同粟米兜炒。


- 加入適量水煮至蘋果略軟身,然後加入調味料,煮至咖喱磚完全溶解即可。


- 椰菜絲鋪喺碟上,放上豬扒,然後淋上咖喱即成。



整起時熱辣辣又脆身,睇見都想死,可惜今日咁鬼死凍,
影完相之後都已經凍哂,仲有少少腍 o添呀!


 



食就好食喇,不過炸完嘢之後真係有排攪,成個爐頭都係哂油,
好彩地下唔係太多油咋,如果唔係就抹餐死喇,
食幾多都補唔番!真係炸一次驚一次!!


 


Notes
- 若豬扒周邊有筋膜的話,最好喺四邊輕輕切一下,咁樣煎出嘅豬扒就唔會鬈
  起。

豬扒炸好後最好趁熱切件,可避免炸面被切爛。

- 蘋果與日式咖喱係最佳配搭。



        你哋亦都可以喺
Facebook Fans Page 度搵我 o架,我間小店叫做 La Cucina di Kestrel 呀,快啲 click 入去做我個 fans


4 則留言:

  1. 我唔會專登去買麵包糠返黎整....成包用少少就放係度...
    用隔夜麵包或任何麥/方包,切丁,烘乾, 整碎就得了...份量可以自己控制...
    [版主回覆12/26/2010 16:47:00]        我之前都試過自己整麵包糠,但係整到中途先發覺唔夠用,唔通放低哂手頭上 嘅 嘢,煲油都熄埋火,再整多 啲麵包糠咩,真係蚊 瞓啦 !所以我覺得預得唔好一樣煩,預多 咗咪又係一樣要掉。而且最重要係,我依家多數係自己搓包,咁辛苦搓完個包出 嚟,拎去焗乾、 磨碎做麵包糠,我覺得有 啲 嘥囉,又無理為 咗整麵包 糠而走去買包 cheap 麵包 o架,所以都係買麵包糠算吧啦!買 咗之後就自然會用 嚟整 嘢 o架喇,除 咗整吉列,仲可以搓肉丸 嘅!         日式麵包糠自己整唔到呀!

    回覆刪除
  2. 無 得 食 就 想死....
    [版主回覆12/28/2010 17:15:00]         妳都幾為食 o架喎!

    回覆刪除
  3. 我都有兩大舊日本咖哩磚, 等我試吓做sauce 先.  我都係用日式麵包糠, 不過係煎, 吾係炸.
    [版主回覆12/29/2010 18:31:00]        其實我都想半煎炸 o架,因為唔想用咁多油,但係又驚自己控制得唔好,攪到 嚿 豬排勁索油!

    回覆刪除
  4. 這是我最愛阿,炸蝦,蠔都一流.
    [版主回覆12/29/2010 23:09:00]      估唔到醫師你都有興趣食炸 嘢喎!

    回覆刪除