與 blog 友交流煮食心得，分享生活點滴。
最近同 Winnie 一齊夾份買咗幾款乾果，包括杏甫、紅莓乾同提子乾，講講吓，佢突然問我有冇興趣整 Motonako. A 個 health muffin，於是我就同佢講，我之所以搵佢夾份買咁多乾果，咪就係想整呢個 muffin 囉！！我噚日整定嘅糖漬橙皮都係為咗今日整呢個 muffin 咋！
材料：
自發粉 200 克
全麥粉 40 克
梳打粉 1 茶匙
肉桂粉 1 茶匙
鹽 1 茶匙
橙皮茸 2 個橙份量
香蕉 1 隻
鮮榨橙汁 250 毫升 ( 連果肉 )
鮮橙乳酪 100 克
原片燕麥 100 克
乾果、果仁 135 克
- 所有粉類過篩 3 次，加鹽及橙皮茸混合均勻；香蕉用叉壓成香蕉蓉。
- 香蕉蓉、橙汁及乳酪拌勻，之後拌入燕麥片。
- 將燕麥混合物一次過倒入粉料內，用膠刮略拌。
- 加埋乾果及果仁，拌勻後將麵糊倒入紙杯內約 8 分滿。
- 喺麵糊表面灑上少量肉桂粉，放入已預熱至 180 °C 嘅焗爐內焗約 25 分鐘。即成
以上材料份量可做大 size 鬆餅 8 個。
雖然個 muffin 既無糖又無油，但食落不單只夠甜，
仲唔會嚡口 o添喎，成功！
有咁健康嘅 muffin 同咁香濃嘅西茶，梗要同媽咪一齊分享啦！
Notes：
- 如果無自發粉的話，可以等量低筋麵粉加 2 茶匙泡打粉代替。
- 原片燕麥即 rolled oat，並非快熟麥片 oat meal。
- 果仁需預先放入焗爐，用140 °C 焗 15 分鐘至香味出。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
趁本《古風歐陸麵包》仲未還番去圖書館，再跟食譜整多款麵包，今次就參考咗黑朱古力酸櫻桃麵包嘅做法，做咗呢個西梅朱古力麵包。
材料：
高筋麵粉 175 克
裸麥粉 30 克
朱古力粉 15 克
橄欖油 10 克
即用酵母 3 克
鹽 7 克
水 約 150 毫升
黑朱古力粒 35 克
西梅 35 克
- 將所有粉類、酵母、鹽及水放入食物處理器內攪拌成麵糰，後加入橄欖油搓勻。
- 拎出麵糰，放上已灑粉嘅枱上，繼續搓揉及摔打成光滑麵糰。
- 將已剪細嘅西梅同朱古力粒包入，之後將麵糰滾圓。
- 放入已灑粉嘅兜內，用保鮮紙包好，發酵 1 個鐘。
- 將麵糰排氣後再次滾圓，靜置鬆弛 15 分鐘。
- 再次排氣並平均分割成 4 份，滾圓後放上已鋪入爐防黏蓆嘅烤盤上。
- 冚好保鮮紙發酵 90 分鐘；焗爐預熱至 220 °C。
- 發酵完成後，麵糰輕輕撲上麵粉，再用利刀割上十字紋。
- 焗爐預熱後將爐溫降至200 °C，放入麵糰焗 30 分鐘。
- 當焗至 15 分鐘時，噴入蒸氣，繼續焗至完成。
以上材料份量可做直徑 7 厘米麵包 4 個。
唔知點解，麵包裂口永遠都焗唔到好似食譜咁靚呢！
麵包有少少西梅嘅酸甜味，仲有半溶嘅朱古力，味道唔錯。不過可能因為
食譜無落到糖，加上我又用咗 70% 嘅黑朱古力，所以個包
有少少苦，再整的話，我諗要加番少少糖喇！
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
唔知點解，逢嚫係教整白麵包多士嘅食譜都多數係用直接法，用直接法整嘅麵包好快趣就會老化，第二日即刻變得又乾、又硬、又嚡，所以我自己整嘅麵包多士多數都只會食一、兩日，之後就會用嚟整西多士，因為索咗蛋液之後又唔會再乾身。
除咗用嚟整西多士之外，我都鍾意用佢嚟整麵包布甸，貪佢好食之餘又容易整，同西多士一樣，索哂布甸液之後就變得濕潤軟綿，簡直有過之而無不及呢！
材料：
麵包多士 2 片
肉桂牛油 適量
提子乾 適量
橙酒 1 茶匙
雞蛋 3 隻
糖 40 克
水 150 毫升
淡忌廉 150 毫升
橙皮茸 1 個橙份量
- 麵包多士先均勻搽上肉桂牛油，之後放入已預熱至 200 °C 嘅焗爐內焗約 10 分鐘至香脆
金黃。
- 用較剪將多士剪成細粒，再次放入爐用180 °C 焗多5 分鐘，備用。
- 提子乾加入橙酒拌勻；雞蛋加糖拂打，直至糖完全溶解為止。
- 加水及淡忌廉入蛋液內，拌勻成布甸液。
- 將多士粒及提子乾放入焗盤內，之後淋上布甸液，靜置 10 分鐘。
- 灑上橙皮茸後，將焗盤放上烤盤上，烤盤內注入凍水。
布甸表面焗得香脆，內裡軟綿濕潤，熱辣辣即食，好滿足呀！
Notes：
- 用隔夜麵包整布甸會比較好，因為乾硬麵包會更容易吸收布甸液。
- 肉桂牛油做法，可參考杏仁提子肉桂卷中嘅肉桂糖餡做法。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
腩排
栗子
素雞
乾蔥頭
沙薑
八角
醃料：
鹽
糖
生抽
老抽
玫瑰露
粟粉
油
調味料：
鹽
冰糖
蠔油
老抽
紹酒
- 腩排洗乾淨，用醃料醃好；栗子去殼去衣，放滾水內烚約二十分鐘。
- 素雞沖洗後用抹手紙索乾水份，然後切件。
- 乾蔥頭去衣後切半；沙薑刮皮，略沖洗後切片，備用。
- 燒熱油，放素雞落鑊兜炒至表面金黃，盛起。
- 將腩排及乾蔥頭爆香，灒酒，之後加入適量水。
- 水煮滾後，素雞回鑊，並放入其餘材料。
- 再次水滾後就加入調味料，拌勻，轉中慢火燜至乾水即可。
早幾日老竇個朋友俾咗啲新鮮沙薑我哋，於是我就加埋落去一齊燜，
再加埋八角獨有嘅香味，真係香上加香呀！
今次所有材料都燜得好入味，尤其係啲素雞，好味道呢 ………
Notes：
- 加入冰糖可以令到個汁更加 “令” 身、更加濃稠。
- 落調味料時勿太重手，因為當汁收乾後就會變得濃味。
- 煮到最後時乾蔥頭會完全溶入汁內，若果上碟時想食到乾蔥頭的話，就要預留部份後下。
你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！
