迷迭香紅莓乾意式果仁脆餅 Rosemary & Cranberry Biscotti

        之前整嘅 cupcake 都有送俾 Aaron 同 Bill，咁送得俾佢哋倆個，無理由唔送嘢俾 Miss Cheng 㗎！既然佢一向都鍾意飲咖啡，咁就整啲 biscotti 送俾佢啦！

        原本諗住用番上次整過嗰個食譜就算，但係突然間又好想 search 吓有冇其他方法，後尾睇到有唔少食譜都係用菜油而唔用牛油，對我嚟講已經係一個天大喜訊，點知搵搵吓，發現原來最傳統、最正宗嘅 biscotti 係完全唔用任何油脂！嘩嘩嘩，唔得掂喇，簡直開心到飛起啦！！！

        我唔係怕食油怕到呢個地步，而係喺呢個咁凍嘅天氣之下，真係唔係好想成日濕水洗嘢囉！清洗植物性油脂都好啲喇，掂過牛油嘅用具，都真係唔用熱水洗都唔掂，最弊係洗完熱水之後，我對手真係變到 “血肉模糊” 囉！！

材料：
低筋麵粉      400 克
泡打粉          4 克
糖                 240 克
鹽                 4 克
雞蛋             3 隻
杏仁             150 克
紅莓乾         50 克
橙皮茸         1 個橙份量
迷迭香         1 湯匙
  

- 粉類過篩 3 次，之後加入鹽、糖混合；雞蛋拂打成蛋液。

- 杏仁放入焗爐內，用 140 °C 焗 15 分鐘至香味出，之後切成粗粒。

- 將所有材料混合拌勻成糰，然後平均分成兩份。

- 麵糰撒上手粉，輕手將麵糰堆成長形，之後略為壓扁。

- 將麵糰放上已墊入爐防黏蓆上，放入已預熱至 180 °C 嘅焗爐內焗 15 分鐘。

- 拎出麵糰，略攤凍後切成粗條，之後將切口向上排放喺烤盤上。

- 放入焗爐，用同樣爐溫焗 5 分鐘，翻轉，再焗多 5 分鐘至完全乾身即成。

以上材料份量可做脆餅約 20 件。

食譜以仙姐推介嘅橫田秀夫 Biscotti 作為藍本。

 

好在烤盤夠大，兩個麵糰都可以同時一齊焗，咁就唔駛分兩轉嚟焗。

 
 
 
 

Biscotti 出爐喇！聞到香噴噴嘅迷迭香同橙香味，真係好想即刻食呢！


 
 
 
 

卒之都知道點解 biscotti 要蘸咖啡一齊食喇，原來正宗嘅

biscotti 係硬到石頭咁㗎，幾乎咬都咬唔開！

 
 
 
 

食譜用嘅糖份量可以再減，連我咁食得甜都覺得個餅甜咗啲。

 
 
 

Notes：
- 原食譜所用嘅迷迭香為新鮮香草。

- 由於麵糰係比較濕同黏，所以製作過程會用到較多手粉。

- 以上爐溫及入爐時間只作參考，成品以焗至完全乾身為準。