2012年2月26日星期日

蔬果蛋糕 Vegetable & Fruit Cake

呢個蛋糕其實係美式甘荀蛋糕嘅變奏,加入咗翠玉瓜同乾果,令到蛋糕材料更加豐富,味道更多層次。


 


我點解會諗到咁樣整呢,主要係因為發覺好多細路,甚至大人都唔鍾意食菜同水果,咁我就即刻諗到上次個甘荀蛋糕,食落都唔係太覺得食到甘荀,咁如果加入其他蔬果,咁咪一樣神不知鬼不覺,間接食咗都唔知囉!


 


    好,今次就先搵學生 Ernest 做測試對象先!因為我記得佢媽咪話佢係食肉獸一族,唔多鍾意食菜。







材料:
甘荀       100
翠玉瓜
   100
橙皮茸    1 個橙份量

雜乾果    60
雞蛋       2

黃糖       100
黑糖
   65
橄欖油   100

低筋麵粉      120
泡打粉    1 茶匙

梳打粉    1/4 茶匙
肉桂粉    1 茶匙
豆寇粉        少許
薑粉       1/2 茶匙
      少許
燕麥片    適量


- 甘荀去皮,翠玉瓜洗乾淨,同刨粗絲,之後將兩樣材料與乾果及橙皮茸拌勻。


- 雞蛋拂打成蛋液;所有粉類混合好後過篩 3 次,備用。


- 黑糖、黃糖同放盆內,加入油徹底拌勻。


- 將一半粉類加入糖油混合物內拌勻,之後將剩餘嘅粉類與蛋液分次交替拌入。


- 蔬果材料加入麵糊內,拌勻後將麵糊倒入已墊牛油紙嘅模內,灑上適量燕麥片。


- 放入已預熱至 180 °C 嘅焗爐內焗約 40 - 45 分鐘至完全熟透。


- 出爐後稍為攤凍,之後切件享用。


以上材料份量可做 5 1/2 X 5 1/2 吋方形蛋糕一個。



 









蛋糕表面嘅燕麥片焗到好香好脆,令鬆軟濕潤
嘅蛋糕多一重口感層次。






蛋糕內加入咗提子乾、杏甫乾同無花果乾,
比起一般甘荀蛋糕更加好味




    原來 Ernest 唔鍾意肉桂味,但係我問佢嚿蛋糕係咪好難食,佢就話唔難食,最後仲食哂成嚿蛋糕o添!講真,呢隻蛋糕佢就一定唔 buy o架喇,但佢真係無留意到蛋糕內有甘荀同翠玉瓜囉,所以大家都可以考慮用呢類 絕招” 去 "對付" 嗰啲唔願食蔬果嘅人。




Notes


- 若果所選用嘅乾果比較大粒的話,最好事先略為切細。



-
由於黑糖嘅濕度係比黃糖同白糖高,所以蛋糕會較淨用黃糖濕潤。



-
甘荀絲同翠玉瓜絲要略為榨一榨乾水份,否則蛋糕會過濕。



- 肉桂粉、豆寇粉同薑粉嘅份量可依個人口味增減。

10 則留言:

  1. 好高纖維呀, 一定好香又好味!
    [版主回覆03/03/2012 23:52:41]哈哈,咁都俾好估中,妳都唔弱喎!
    [芹菜回覆02/27/2012 16:05:42]好似唱緊 : 我是一個大蘋果 ! 好有音樂細胞喎!
    [版主回覆02/27/2012 12:31:36]又香又甜又好吃……

    回覆刪除
  2. 好健康的一個蛋糕呀
    [版主回覆02/27/2012 12:33:50]不單只用蔬果做材料,而且又唔用牛油,用上橄欖油,再加上唔用精製白糖,改用黃糖及黑糖,真係夠哂健康哦!

    回覆刪除
  3. 呢個食多幾件都無問題呀
    [版主回覆03/01/2012 00:21:17]係呀,食得開心又放心呀!

    回覆刪除
  4. 緊張大師-小女人2012年2月28日 下午5:12

    好多謝你的提供,好有用呀,我鐘意焗蛋糕但又唔懂,多得你咁詳細介紹同講解,令我明白好多,在網上能找到咁有心既人真係難得,謝謝你呀.
    [版主回覆03/01/2012 00:30:00]妳唔好俾頂咁大嘅高帽我戴啦!
    好多大師級人馬都好樂意同大家分享食譜,我呢啲只係小小分享,將失敗經驗話俾大家聽,等各位可以行少啲冤枉路!其實我都只係一個入廚初哥咋,所以仲有好多嘢要慢慢學呀!
    希望妳有熱誠繼續慢慢學習、嘗試,最終都能夠焗到一個稱心滿意嘅蛋糕同家人朋友一齊分享。

    回覆刪除
  5. 係健康........but........我唔多like....hehehe...
    [版主回覆03/07/2012 01:03:16]上次整carrot cake 都係咁o架啦,又唔見妳話謀殺?
    [毛豆回覆03/05/2012 12:24:32]係呀.係呀...百幾g糖....謀殺咩
    [Motonako.A回覆03/04/2012 10:07:23]少甜點都健康過吓嘛?
    [版主回覆03/03/2012 23:51:43]咁唔食糖又唔代表好健康啫,原食譜用同樣份量白糖咪仲恐怕!唔夠甜的話就不如唔好食囉!
    [Motonako.A回覆03/01/2012 13:25:33]嘩....黄糖加黑糖成165g 唔見得有幾健康囉!
    [版主回覆03/01/2012 00:23:27]健康食物妳都多數唔like o架喇!

    回覆刪除
  6. 翠肉瓜都整埋蛋糕度...下次整雪菜肉絲呀
    [版主回覆03/01/2012 00:23:24]喂,妳唔似咁out 喎,好多食譜都有教整 zuchini cake / muffin 呀!
    妳又嚟!! 我下次整個豉椒蛋糕過妳歎!

    回覆刪除
  7. Son Cheung 正 義2012年3月1日 上午6:38

    ♥ ~ 祂 要 祝 福 關 懷 您 們 ~ ♥
    [版主回覆03/04/2012 00:04:50]Thanks!

    回覆刪除
  8. 緊張大師-小女人2012年3月1日 上午10:40

    Kestrel其實我在網上找過好多食譜,但好多都不成功,可能係我整得唔好或有些你一看比例都不太合乎理想,但你的真係十分有用,好開心可以在這認識你和跟你學整蛋糕.我係一個白痴,我去返學三年,但都不及我女友自學咁叻,我要慢慢去做做做,可似卷蛋我差不多爛了接近四十條...無講錯係四十幾條卷爛,到現在才可以成功卷到.所以慢慢向你學習.我好有興趣睇你的blog得益不少.謝謝你.祝你和爸爸幸福愉快.
    [版主回覆03/05/2012 12:15:09]應該掉番轉,我向妳好好學習就真啦,我真係無妳咁好毅力、咁認真去研究整餅呀!
    中國人傳統:"家傳秘方" 嘛,點會咁輕易話妳知呢!係我咁蠢先至公告天下咋!
    喂喂,乜妳又誤會我係女仔呀!!上面張相,媽咪抱住嗰個係男仔嚟o架!!
    [緊張大師-小女人回覆03/05/2012 10:11:44]我好多時在blog上見到有人整到好靚,留言請教但...好多都無乜點解釋,那就算.遇上你太好了,可以和我一起談整蛋糕,我超鐘意愛整蛋糕,可能家人喜歡食.所以我學了幾年,有工聯會,有港專有官塘那間職業訓練局也有私人單對單教授,現在就上網找食譜來做,其實我壞了好多的,只是心有甘...哈哈,要再整到成功為止
    [緊張大師-小女人回覆03/04/2012 17:34:43]但我每天慢慢欣賞你的作品,你仲有好多弄菜的功夫,我要向你好好學習.我都好開心可以和你談天,因為你是一個孝順的女.我喜歡孝順的朋友.
    [版主回覆03/03/2012 23:30:05]我都好開心認識到妳呀!又可以有多個朋友交流交流!
    其實我自己都有好多失敗經驗,只不過我只係將啲成功例子掟上blog度同大家分享,所以造成每個食譜都成功嘅錯覺!
    妳女友應該好有talent,所以自學都咁叻,不過其實我自己都無乜去過上堂,多數都係自己睇食譜試做,之後自己再加入變化。
    嘩,妳真係好有毅力呀,捲爛咗四十條卷蛋都繼續嘗試,好佩服妳呀,我整過幾次失敗就唔敢再整喇!
    唔好話向我學習,大家彼此交流、分享啫,我真係唔係太叻o架咋,我都要成日向人請教呀。
    多謝妳的心意,我都祝妳同妳女友生活愉快。

    回覆刪除
  9. 賣相很好啊﹗
    [版主回覆03/03/2012 23:17:11]多謝讚賞呀!

    回覆刪除
  10. 呢個蛋糕, 好正喎, 我又想試吓!
    [版主回覆03/04/2012 17:11:36]咁趁放假試試啦!

    回覆刪除