2012年3月20日星期二

硬式焦糖布甸 Hard Caramel Pudding

  食完糯米飯,歎番個飯後甜品先!呢期好鍾意食布甸,已經跟食譜整過幾款喇,不過呢排真係完全無時間寫 blog,所以無 post 到上嚟。

        今次就參考咗食譜,加啲減啲,整咗個硬式布甸。



焦糖漿

材料:
            50
           1 茶匙
熱水        20 毫升

- 將糖同水放入小煲內加熱。

- 開始煮滾時會產生大量氣泡,當氣泡減少時就代表焦糖開始形成。

- 繼續煮至自己喜歡嘅色澤時就可以熄火。
 
- 將焦糖漿立即倒入模內,攤凍凝固,備用。


布甸

材料:
             200 毫升
淡忌廉      100 毫升
             50

雲呢嗱枝   1/2
雞蛋          3
蛋黃          3

 
- 將水同糖放入煲內,然後切開雲呢嗱枝,刮出雲呢嗱籽,同放煲內,慢火加熱。

-
當糖完全煮溶之後就即刻熄火,拌入淡忌廉,攤凍。
- 雞蛋同蛋黃拂打成蛋液,但無需拂打至起泡,拌勻即可。

-
將忌廉糖水逐少加入蛋液內,邊加入邊拌勻。
- 將蛋漿過篩到已倒入焦糖漿焗模內,放上烤盤上,並於烤盤內倒入熱水。
- 放入已預熱至 160 °C 嘅焗爐內焗約 40 分鐘。

-
出爐攤凍後放入雪櫃雪凍。

-
食用時將布甸倒扣於碟上即可。

以上材料份量可做 9 厘米 X 18 厘米 X 6 厘米布甸 1 件
 
食譜參考自福田淳子嘅《我愛布丁》。



將布甸蛋漿倒哂入焗模內先醒起唔記得過篩,唔知係咪呢個原因,
攪到個邊咁
岩岩蠶蠶,勁樣衰!



 


個焦糖味道好正,布甸亦滲出淡淡雲呢嗱香,但係我自己就略嫌
個布甸實
咗少少,下次試試唔加淡忌廉,全用清水
嚟整,
睇吓會唔會軟滑少少先。


 

Notes
- 煮焦糖時要間中搖動煲身,令糖漿受熱更加均勻。

- 布甸材料中嘅水同淡忌廉可跟原食譜用牛奶代替。
 
- 布甸放入雪櫃雪凍後會更加容易脫模。


 

6 則留言:

  1. 流緊口水添
    [版主回覆03/21/2012 16:52:14]即刻俾條 "口水肩" 妳呀!

    回覆刪除
  2. 雞蛋布甸我掂呀,過黎踩下場先~~~XD

    如果你嫌硬的話,落多D奶,1公升6隻蛋咁上下就OK,

    我平時整20cm圓模的分量係 650ml奶 + 150 cream + 5隻蛋 ,唔落cream質感 就削d,至於你個布甸咁多洞洞,會唔會係焗耐左?因為模具大小,唔肯定布甸熟未,最好用竹簽篤下
    [Ghosy Lei回覆03/30/2012 22:17:47]好似牛油室溫放軟咁,好味~~
    [版主回覆03/30/2012 13:44:36]原來妳係咁樣發現到,果然係一覺醒來,晃然大悟喎!
    用朱古力軟心夾餅食!?唔怕溶咩?
    好,搵次試試妳個方法整布甸先!多謝妳分享呀!
    [Ghosy Lei回覆03/26/2012 04:27:45]焗布甸的溫度上面講錯左,睇返食譜係用180度
    [Ghosy Lei回覆03/26/2012 03:37:47]呢個比例我整左n次,20cm圓模都冇問題~~^^

    蒸水蛋我就1份蛋2份水,計落雞蛋布甸用蛋少d咁喎,就算冇cream果隻都可以完整脫模,不過運送途中好易"登散"。

    響爐內攤凍,其實都係睇你個爐火同模黎決定,我都係連整三兩個時,最後一個入爐就上床訓,事後發覺果個好食d,因為我用20cm模,又整得較高身,焗成個鐘再加埋餘溫就啱啱好,誤打誤撞發現的,你可以試下,但唔一定啱用~~

    果隻軟心餡室溫放軟後,用黎夾甜味的餅干都幾好食架~~
    [版主回覆03/25/2012 16:43:40]難得妳過嚟踩場,簡直歡迎至極啦!
    6 隻蛋用成公升水咁多?會唔會太削,脫唔到模呀?好似蒸水蛋咁喎!我呢度3隻全蛋加3隻蛋黃,都係用300ml水咋喎!
    嗯,乜原來個邊多窿係因為焗過火呀?真係要多謝妳話我知喇!
    我覺得蛋白杏仁露始終唔及純杏仁茶咁清、咁好味,所以整過一次都無整喇!
    點解要喺個爐入面攤凍嘅,咁咪有排都未攤得凍!?
    係呀,要整到完全符合自己口味,真係要整好多次先得出結論。
    我其實一直都好想再整心太軟,一來自己鍾意食,二來都想跟妳個改良方法試一試,奈何我個冰格長期爆滿,根本無位雪個軟心餡!
    [Ghosy Lei回覆03/23/2012 02:35:10]補充多樣~~

    有排成日食蛋白杏仁露,剩左好多蛋黃用黎整雞蛋布甸,試過幾次都覺冇咁好食,質感同平時有D唔同,所以最後只用全蛋。

    20cm圓模,165度焗1個鐘,響焗爐內放涼先放入雪櫃,好滑冇洞洞,唯一缺點係有結皮....試過連整兩三個,頭一個焗好就拎出爐,尾果個放涼先拎,尾果個明顯好食好多。

    呢個布甸真係整過好多次,由開頭試爐火預時間,隔5分鐘就用竹簽篤下,篤到而家放左入爐就唔駛點理佢,只係中途轉一轉個模。

    要整到啱自己口味,真係要試好多次,少d心機都唔得

    回覆刪除
  3. 緊張大師-小女人2012年3月23日 下午10:22

    我好少用雞蛋整布甸或整燉蛋之類...但芒果布甸我就愛死啦.可能經常用蛋做蛋糕,其他款式就無吃得咁多
    [版主回覆03/25/2012 16:29:17]哈,我就反而唔太好魚膠類布甸,比較鍾意燉蛋式或半蛋糕狀布甸。

    回覆刪除
  4. 好似好好味
    [版主回覆03/30/2012 13:39:31]好味o架,尤其個焦糖,更加係呢個布甸嘅靈魂呀!

    回覆刪除
  5. 真係好硬咁款噃......
    [版主回覆03/30/2012 13:38:40]咁又唔係好硬,雪過之後就當然再硬少少啦,但食落唔係想像中咁硬o架!如果唔夠硬身就唔可以倒扣喇!

    回覆刪除
  6. 一睇就知香滑好味道 ~~
    [版主回覆04/10/2012 13:22:27]掂喎妳,一睇就知!

    回覆刪除