講樣恐怖嘢俾大家聽，上次我整芒果 mousse cake 時咪要專登清冰格嚟雪個蛋糕嘅，點知執執吓個冰格，居然俾我搵到上年整冰皮月餅時用剩嘅吉士餡，原來仲有少量未食哂，一路將佢越推越入，完全睇唔到佢，唔係要清冰格都摷唔到佢出嚟重見天日！
反正用剩嘅份量都唔多，即刻拎出嚟解凍，跟住就煮熟西米，然後加水落吉士餡度煮開，之後再將西米倒入拌勻就攪掂，一個字：快！！
啱啱好夠整三盅布甸。今次用咗新買嗰兩個疏乎里盅嚟焗。
出爐後就用火槍將個面略為燒焦。
一如既往，裡面加入紅豆餡，味道唔駛咁單調。
你哋記得留意一下聽日報紙頭條，有冇報導到：昨晚一對父子享用完自家製西米布甸後，跟手就入紙移民局申請移居西方極樂世界！！
陳年吉士, 零舍好味.
回覆刪除[版主回覆08/27/2012 01:46:22]陳皮都係越擺越值錢啦！
隔咁耐食唔食得架
回覆刪除[版主回覆08/27/2012 13:43:28]咁妳今日睇報紙見唔見到呢單頭條呀？
嘩
回覆刪除[版主回覆09/01/2012 00:21:03]咁妳都諗得到！！
[Mrs. Benz 班太回覆08/29/2012 13:13:49]哈哈，冒住要爭廁所危險
[版主回覆08/29/2012 02:41:09]有幾激先！！
[Mrs. Benz 班太回覆08/27/2012 15:56:38]我都食過期嘢, 不過無你咁激
[版主回覆08/27/2012 15:21:26]我不嬲都食過期嘢㗎，不過食極都死唔去，好可惜！！
過期食品 "Used by" 就真係唔好食喇，呢類多數都係乳類製品、豆類製品及容易變壞食品；至於 "Best before" 就真係無所謂喇，好多時都係因為法例管制而夾硬定個到期日，所以連腐乳、豉油、泡菜呢類發酵食品都迫住要加上到期日，好多驚死嘅人見到就即刻掉咗去，真係好浪費，所以較早前「鏗鏘集」都專登探討呢個問題，叫市民唔好浪費食物！
其實會整糕點既朋友好多時都會有呢類情況發生,但我無你咁勇,我要顧及一家大小老的平安,多數我會掉左去,但只過幾天或不是奶類的可以接受.但一定要看當時環境才可以決定,你仲要比老豆吃添...哈哈哈,好野,,咁有無肚痛呀???
回覆刪除[緊張大師-小女人回覆09/19/2012 20:03:09]叻仔,平淡是福,粗茶淡飯隨緣過,萬般自在不用愁呀.大家都係有福人啦
[版主回覆09/17/2012 23:05:47]咁我又無覺得唔開心，依家賺到夠洗、夠過活就算，閒時就整嘢食，我已經覺得好滿足㗎喇！我份人無乜要求，平平淡淡就滿足，平淡是福嘛！
[緊張大師-小女人回覆09/09/2012 06:38:41]有時候又唔雖要咁灰既,雖世事難料,但我們總要面對每一天不同的突如其來,那自然心隨遇而安係最好的,朋友我願你可以開心去過每一天
[版主回覆09/01/2012 00:39:01]唉，整定係要走就走，係要病就病，肺癌病人從來唔食煙；從來滴酒不沾嘅就肝癌死；「殺人放火金腰帶，修橋補路無屍骸。」妳唔係未聽過啦，自己知道做緊乜咪得囉，之後對自己所做嘅嘢負責就得啦！
[緊張大師-小女人回覆08/29/2012 11:02:41]唉,你的思想真係同我媽一樣,個月餅放入冰格可以攞幾年,咪玩啦,最怕係眼見唔到不代表無菌,你食了無事不代表食得,皆因要看看個人的身體抵抗力而決定,我就快比你激死啦.奶類盡量唔好,麵粉過了期無潮濕我都會用,但看那些食物而定啦.
[版主回覆08/29/2012 02:40:19]好可惜仲未歸西囉！！
放人冰格嘅嘢都好難變壞到中毒呀！
哈哈,好厲害!
回覆刪除[版主回覆08/29/2012 02:35:38]多謝呀！
西米布甸殺人事件？！？！？！
回覆刪除[版主回覆08/29/2012 02:38:29]Wakakakakaka
咁剩番一杯邊個食呀！又雪係冰格 ?
回覆刪除[版主回覆08/29/2012 02:38:14]放咗入雪櫃一晚，今晚食埋 lu！
自已整好吖，出邊食啲好鬼甜架
回覆刪除[版主回覆08/29/2012 02:37:32]係？我好少喺街外食嘢。
陳年吉士餡食左可能零舍有"吉士"
回覆刪除[版主回覆08/29/2012 02:37:33]嘩，係就好囉！
好有冒險精神呀
回覆刪除上次我食佐包過期半年既即食麵都肚痛呀...以後唔敢
[版主回覆08/29/2012 16:44:54]點會呀，即食麵都有事！？妳心理作用攪到肚痛咋！
你都得架喇....
回覆刪除[版主回覆09/01/2012 00:13:59]窮家仔有咩做唔出至得㗎！！
呢個我冬天都會整架。
回覆刪除[版主回覆09/06/2012 03:34:28]冬天食正呀，又幸福、又溫暖、又窩心，哈哈！