2012年8月12日星期日

菠蘿吞拿魚通粉沙律

雖然我真係好少食凍嘢,但係一踏入夏天,我就最鍾意整通粉沙律食,貪佢清新、清涼又清爽,仲夠哂飽肚。

聽晚要教到好夜先返屋企開餐,趁今日得閒就整定個沙律,聽晚晚餐就有著落喇!




全部材料都係屋企存貨,有菠蘿、吞拿魚、青瓜、粟米同薯仔,
加埋千島汁,再加些少糖、鹽同即磨黑椒粉調味,
撈勻哂就攪掂。








近排同個學生傾偈,先知道原來大律師公會係規定所有大律師要自僱執業,
唔可以以僱員身份工作,所以初入行跟師傅工作係無收入
㗎!佢依家
返工搭車、食飯、學琴暫時都係食老本,家人個個都要返工,
屋企無人煮飯,迫住日日三餐都要出街食。唉,見佢
咁鬼慘,整多少少俾佢,等佢聽晚學完琴
之後做晚餐啦




3 則留言:

  1. 緊張大師-小女人2012年8月12日 下午8:06

    我家最鐘意夏天整沙律通心粉....又簡單又好味又容易入口,你呢個我未整過可以考慮試下都好喎.你個學生有著落咁你爸爸食乜呀?老人家不會天天陪你食沙律通粉呀?
    [緊張大師-小女人回覆08/27/2012 17:30:48]不打緊,我同你一樣,但佛祖心中流,只要孝道同做人善良,我現在天天在家才可以學佛睇佛書要不是我才沒有時間啦.我也沒有去佛堂當義工,我只是在老心中心做義工而已.我們大家都是好人,說好話做好事,幫到人就全心去幫,無問題架,隨佛緣啦,自然而生.我都無受五戒,努力盡量去少吃肉,慢慢一步一步去做啦.共勉之
    [版主回覆08/27/2012 13:55:12]查實我真係一個極唔如法嘅佛弟子囉,又無拜佛、又無睇佛經、又無去佛堂做義工,只係每日做早、晚課,不過我知道小小佛家學說,正如話齋,做緊要做個好人囉!雖然我無受五戒,但自己都盡量去守到啦!
    [緊張大師-小女人回覆08/27/2012 08:00:25]咁你不能用口罩啦,咁嚴重後果.其實收斂咗,睇開咗、睇化咗,無咁激氣係好事,對你,對家人,對朋友全都是一等一的好.你不停在進步中呀,多看佛多學佛多聽佛,人都會唔同既,如你不是學佛我好少同你講,因為不是人人都會鐘意,但我覺隨緣啦,有感覺就順著去行去走,任何教都是教人向善.人最重要係善良.
    [版主回覆08/27/2012 02:02:17]哈哈,我老竇又係咁講,但係我呢世人最怕就係戴口罩,好似唞唔到氣咁,嚴重起上嚟重會頭痛㖭!一旦俾佢頭痛起上嚟就大鑊囉,學生們一定會當災!
    我依家脾氣都叫做收斂咗,因為睇開、睇化咗,無謂咁激氣!
    [緊張大師-小女人回覆08/26/2012 10:35:49]你如較容易被感染有無用口罩呀,因為我坐車一定用的,免被感染,你試下啦,每個人性格都不同,你惡頂時或許我比你勁十倍,但無論如何我們學佛也是有修維之人,所以幾惡頂無理臭脾氣都無問題的,這是一個給你好好練習的機會,學佛之人有包容心
    [版主回覆08/25/2012 23:21:12]哈哈,妳未接觸過我,未領教過我啲 "惡頂" 嘢!!
    唉,做我哋呢行係咁㗎喇,同覺生坐得太 close,好易中招。加上我又多數上門教琴,成日搭唔同交通公具,更加大機會中招啦!
    係囉,又要工作又要打理屋企,真係唔易,所以我好佩服嗰啲返朝九晚五嘅媽媽,都唔知啲精力喺邊度嚟!
    [緊張大師-小女人回覆08/23/2012 16:50:34]人人都會有自家的怪脾氣架,唔指係你.只要傷害唔到別人又無妨的,你做乜又失聲呀,你有無睇醫生,祝你早日痊癒.其實有頭家又真係好多功夫要做仲要照顧你父親呢
    [版主回覆08/22/2012 21:18:02]哈哈,難得妳咁讚我,其實我份人好難相處㗎,始終學藝術嘅真係會有藝術家脾氣!
    我依家直頭好似個單親阿爸咁囉,日頭忙屋企嘢,晏晝至夜晚就忙出外工作,有時返到屋企都仲要顧住整餐飯!
    我依家又失聲喇!!
    [緊張大師-小女人回覆08/21/2012 08:12:48]同你談天真係好開心,可惜你太忙,不要忙壞身體呀老人家,有時間休息保重
    [版主回覆08/20/2012 22:55:46]你估我係謝老四咩?佢個仔 "檸檬" 企出嚟仲穩重過佢!!
    [緊張大師-小女人回覆08/20/2012 10:29:14]哈哈哈哈.....嚟緊......哈哈哈,唔知點解個個都要認老,現在六七十都好年輕呀,後生仔.哈哈哈
    [版主回覆08/19/2012 18:04:15]唓,有幾細呀,4 張都嚟緊啦………
    [緊張大師-小女人回覆08/18/2012 14:55:48]我同意就係:人不犯我,我不犯人,但害人之心不可有,防人之心不可無,特別現今呢個世代,對嗎?咦,咁你爸都好年輕喎......咁你好細啦.....
    [版主回覆08/18/2012 01:21:39]我對個個人都咁好,一視同人,但當然大前提係人不犯我,我不犯人!
    我老竇都就快 7 字喇,我都好少理佢食乜,只係我煮飯時已經自動唔會煮無益嘅食物俾佢食!
    [緊張大師-小女人回覆08/16/2012 17:15:14]有你呢個好老師你的學生都好有福氣,每每都為人著想,太善心了.感恩.我唔知你爸爸多大,但若好似我爸媽七十五六,其實真係不錯,感謝他們行得走得食得瞓得,所以只要不過份我都唔介意他們吃,如樣樣都不給他們吃那還有乜意義呢.但若老人家身體有問題好膽固醇,糖尿,高血壓或尿酸咁就一定要多加照顧關懷他們飲食,這不是開玩笑了.你好乖又孝順,你擔心爸爸是對但要看他雖要的是什麼,多和老人家溝通和相聚,我好開心係可以經常陪伴他們,一錯失機會那以後想也補償不了.你瘦了一點點,但健康就無問題.陪爸爸吃飯可以煮些餸菜二仔爺撐下枱腳聊聊天幾開心架
    [版主回覆08/15/2012 19:38:15]點解咁講呢?我覺得我老竇唔錫身就真,乜狗屎垃圾都放入口,完全唔顧自己健康!
    點解要驚訝呢?妳不嬲都識煮嘢㗎,意粉煮得出色有何出奇?反而我想試試自己整 pasta 囉!但又無麵條機。
    其實我平時整沙律好少落肉㗎,不過因為今次順便整埋俾學生食,而佢又曾經講過自己係無肉不歡,我怕佢太齋頂唔順先落吞拿魚咋!坦白講,整嘢俾人食真係唔易㗎!至於雜豆沙律,我都成日整嚟做 lunch,不過好求其,紅腰豆、三角豆加罐頭粟米,有時再加牛油果或青瓜,加醋子醋或意大利陳醋拌勻就食,一個人整嘢食真係好求其!
    [緊張大師-小女人回覆08/13/2012 09:25:45]你父親好懂享受人生呀,同我媽一樣,我整乜佢就吃乜,帶佢食日本刺生Pizza等,好多老人家唔多鐘意但她乜都食架,最愛我家老公整的意粉,佢話外出吃唔到咁好既意粉喎.仲約一班老人家來我家吃.....驚訝嗎?
    我大多數用水果(時令生果),鮮水果切粒加紅腰豆再加椰果,然後用芒果醬汁(買的不是自家整)全家都愛,因為加了火腿,香腸,吞拿魚就未食過,我會試下你咁做法的,多謝好介紹呀
    [版主回覆08/12/2012 23:11:56]我老竇?照食囉!佢食得就食,完全唔錫身,從來唔會好似我咁為健康考慮太多,話佢佢又唔鍾意,所以咪由得佢囉!反正佢身體比我好千萬倍!
    妳唔係咁整,咁妳平時點整通粉沙律呢?

    回覆刪除
  2. 呢個簡單方便
    [版主回覆08/15/2012 19:39:12]係呀,超簡單,整一大兜食幾餐喇!

    回覆刪除
  3. 估唔到律師仔都搵唔到食..呢個真係唔知咩世界.
    [版主回覆08/15/2012 19:42:02]咪係囉,佢話呢個情況最少要維持半年喎,真係死得!!好心大律師公會就改例啦!!佢話有啲好嘅師傅會靜雞雞私底下 ……… 咩囉!!妳明我想講乜啦,我諗我唔方便咁揚講到咁白!

    回覆刪除