日式雜菜薯餅

前幾日喺某食肆內見到有日式炸薯餅，我又即刻諗番起以前嘅 “兒時情景” (唔好意思，又試職業病發作)，媽咪第一次買日式薯餅返屋企整嚟食時，我一食就愛上咗，可能因為我係薯癡啩！咁媽咪知我鍾意食，所以簡中都會買返嚟煎。

 

依家已經好耐、好耐無食喇，咁見到食肆個薯餅，又鉤起條筋想整，噚晚卒之整咗喇！不過一向都好少整煎炸嘢嘅，好明顯呢個薯餅整得好樣衰囉！

材料：

薯仔

青椒

甘荀

洋蔥

急凍粟米粒

日式沙律醬

麵粉

蛋液

日式麵包糠

 

- 薯仔刨皮後切片，隔水蒸至軟身後，趁熱將佢壓爛成薯蓉。

- 青椒洗淨後切細粒；甘荀去皮後切粒，然後放入滾水內烚至稍腍。

- 洋蔥去衣後切細粒；粟米粒解凍後略沖洗，之後尒水，備用。

- 燒熱油，洋蔥同青椒先落鑊爆香，之後加入甘荀同粟米粒。

- 略加鹽、糖調味，兜炒均勻後盛起。

- 將雜菜料倒入薯蓉內，加適量沙律醬，之後攪拌均勻。

- 取適量薯蓉料放於掌心，搓圓後略為壓扁成薯餅。，

- 薯餅沾上麵粉，蘸蛋液後再沾上麵包糠。

- 用半煎炸方式將薯餅煎至金黃即可。

 

將用剩嘅雜菜料，加埋蘋果同日式咖喱磚，煮番個
日式咖喱伴食，正到無朋友啦！

雖然係燶咗啲，但都不至於喺非洲返嚟！不過用半煎炸方法都整到
脆卜卜吉列效果，唔駛我開鑊油炸，我都已經好開心喇！

 

Notes：

- 如果鍾意的話，可將部份雜菜料改成免治豬肉或牛肉，但事前必須將肉類炒熟。

- 如果薯蓉水份太多、太軟身的話，可以先放入微波爐內適當加熱以蒸發多餘水份。

- 薯餅亦可直接放油鑊內炸至金黃。