焦糖南瓜雪糕 Caramel Pumpkin Ice-Cream

每年一踏入夏天，我就好想整雪糕。雖然我一向好少飲同食凍嘢，但係雪糕就好多時都會食，行行吓街，想食嘅時候就會走入「麥記」買杯新地食。

 

今年遲遲都未整雪糕，皆因個冰格成日都 ”常滿” ( 如果荷包係咁就好囉 )，根本無位放雪糕。咁啱之前要整芒果 mousse cake
咁就迫住要清倉，騰空個位出嚟雪個蛋糕。

 

趁個冰格依家都仲有個 “窿”，仲未回復爆棚狀態，快快手整咗我一直好想整嘅焦糖南瓜雪糕先！

 

南瓜雪糕

材料：

南瓜肉  
450 克

水 
160 毫升

蛋黃    
4 個

糖   100 克

淡忌廉  
350 克

- 先將 100 克南瓜肉切成細粒，之後隔水蒸至剛好腍身，攤凍後放入雪櫃保存。

- 剩餘嘅南瓜肉蒸至完全腍身，之後用叉壓爛成南瓜蓉，備用。

- 蛋黃加糖，用電動打蛋器打至發白濃稠；與此同時，將水煲至就快水滾嘅狀態。

- 將熱水逐少加入蛋糖混合物內，邊倒邊攪拌，之後兩倒回煲內，用慢火加熱煮至濃稠。

- 煮好之後略為攤凍，之後拌入南瓜蓉，當完全冷卻後就放入雪櫃雪約 4 個鐘或過夜。

- 淡忌廉座冰水打發至 9 成企身，然後將南瓜蓉混合物倒入，完全混合後就放入冰格。

- 約 2 個鐘之後，雪糕開始雪硬，用電動打蛋器打鬆，然後放番入冰格內，再雪約 1 個鐘。

- 當雪糕再次就快變硬時，再一次打鬆，放回冰格。

- 約半個鐘後，再次打鬆，之後再重覆做多一次即可。

 

 

焦糖漿

材料：

糖   120 克

水   2 茶匙

熱水     4 湯匙

- 將糖同水放入煲內加熱，邊煮邊搖動煲身，令糖水均勻受熱。

- 當煮到自己鍾意嘅焦糖色澤時就可以熄火，立即倒入熱水拌勻，攤凍備用。

 

組合

- 先將南瓜粒加入雪糕內，用膠刮拌勻。

- 之後倒入焦糖漿，大致拌勻就可以停止。

- 將雪糕倒入容器內，放番入冰格雪到完全硬身即成。

本身南瓜味唔係太出，但當一食到南瓜粒時就即刻知道，
反而個焦糖味就好突出。

你話依家天氣幾熱呢，一路影相，個雪糕就一路影一路溶！

Notes：

- 如果想雪糕食落更加順滑的話，可以將蒸熟南瓜肉放入攪拌機內打成南瓜蓉。

- 煮蛋糖混合物時，一定要用慢火耐心地煮，否則蛋黃好易被煮熟並凝固成粒狀。

- 若果大部份蛋糖混合物真係煮到凝固的話，可以先離火，稍為攤凍後倒入攪拌機內攪打，之後倒番入煲內再次煮至濃稠即可。

- 由於焦糖溫度非常高，倒入熱水時一定要小心，避免被焦糖液濺到身上。

- 若果用雪糕機整的話，可以將淡忌廉同南瓜蓉混合物直接倒入機內製作，完成後再拌入南瓜粒同焦糖漿。

- 將焦糖漿倒出後，煲內仍會留著一層已凝固嘅焦糖，你可以倒入適量水或奶，再次加熱至焦糖完全溶解，之後用嚟沖咖啡，就能夠做出一杯焦糖咖啡喇！