紫薯冰皮月餅

噚日放假喺屋企瞓到黃朝八晏先起身，夜晚嗰餐又唔駛點煮，所以就有時間整冰皮月餅喇！

 

好耐之前
blog 友
Motonako A. 分享咗個冰皮月餅食譜俾我，裡面有教埋整紫薯餡，不過上年因為同 Winnie 一齊整咗其他味道，所以無試過個食譜，今年就落實整呢個紫薯餡啦。至於個月餅皮，同上年一樣，都係用番糕粉嚟整，唔駛蒸呀嘛，方便好多！之前煮黑糯米時，特登將浸過黑糯米嘅水留起，放上冰格保存，今次大派用場喇，解凍後就可以用嚟搓皮，咁就唔駛落色素啦！

 

紫薯餡

 

材料：

紫番薯  
   約 600 克 ( 去皮後計算 )

糖霜     2 湯匙

澄麵     2 湯匙

水   1 湯匙

油   2 湯匙

- 番薯去皮後切粒，之後隔水蒸熟，趁熱用叉壓爛成薯蓉。

- 之後加入糖霜拌勻；另用水將澄麵開勻成粉漿。

- 油同粉漿一齊加入薯蓉內拌勻。

- 將薯蓉放入鑊內，用中慢火不斷兜炒，直至黏性增加，並且可以摺疊成糰為止。

- 盛起薯蓉，攤凍備用。

 

 

月餅皮

 

材料：

浸黑糯米水  120 毫升

糖   50 克

糕粉     100 克

固體菜油     15 克

 

- 浸黑糯米水同糖放入煲內，以大火煮滾至糖溶，熄火後攤凍備用。

- 固體菜油加入糕粉內，然後將糖水倒入，邊倒邊攪拌，直至所有材料完全均勻混合成糰。

 

 

組合

- 將紫薯餡同餅皮粉糰分成細份，每份分別重 36 克及 24 克。

- 壓平粉糰，包入紫薯餡，捏緊收口。

- 粉糰滾上粟粉，輕手拍去多餘粟粉，放入膠餅模內，輕輕按下彈弓將粉糰壓實後即可脫模。

估唔到黑糯米水與糕粉混合後，顏色會變得偏紅，
唔夠紫色，不過總好過用人造色素啦！

因為內餡全用番薯蓉，無溝綠豆蓉，所以番薯味非常香濃清甜，讚！

Notes：

- 食譜所用嘅月餅模為 63 克餅模。

- 如果鍾意的話，可以將一半份量嘅水改為椰漿，而固體菜油用量則減至 10 克。

- 包好餡之後，可以將粉糰略為搓成長形，方便放入模內，以免被餅模邊緣刮破。

- 做好嘅冰皮月餅需放入雪櫃保存，如果要放更長時間的話，建議放上冰格，食之前放番落下
  格解凍即可。