紅麴方包 Red Fermented Rice Loaf

           早前 Ernest 媽咪同我講，有次問 Ernest 想食乜，諗住買俾佢食，點知佢居然話想食自家製麵包！食自家製麵包本來係一個理所當然嘅指定動作，基本上日日都新鮮出爐，但自從工人姐姐走咗之後，Ernest 媽咪就做到一腳踢，根本無多餘時間拎出嚟整麵包，頂上嗰個工人又乜鬼都唔識做，仲越幫越忙，難怪 Ernest 咁掛住以往嘅 “美好時光”！所以我呢幾個禮拜如果有整麵包的話都一定分一半俾佢哋。之前整嘅無花果合桃鄉村包同 foccacia 都有俾佢哋，但原來Ernest 淨係食白麵包！所以我今次要特登整個 toast 俾佢哦！

 

        唔知點解，我成世人做好多嘢都係事與願違：要搭嗰架巴士就永遠都送車尾，到唔使搭佢時就梗係第一架到，要搭嗰架就反而等好耐先嚟；平時去街市買餸時成日見到嘅嘢，到想買嚟食時就居然全個街市都無得賣；平時整嚫方包都唔多成功，而且最少都要用成兩個鐘以上先發酵到八成滿，今次諗住整個靚靚山形多士俾 Ernest 啦，點鬼知一粒鐘都唔使就已經發到黐實咗個模蓋，仲黐到實一實，開都開唔到，咁就唔想整方包都唔得啦！頂，真係激鬼死呀！！！

 

 

 

 

湯種

 

材料：

高筋麵粉    16 克
紅麴           約 1 湯匙
水               80 克

 

- 紅麴放入石樁或攪拌機內打磨成粉狀。

 

- 將所有材料倒入細煲內，用中慢火邊加熱、邊攪拌直至達 65 ℃ 並變得稠身。

 

- 熄火後攤凍，待用。

 

主麵糰
 

材料：
高筋麵粉    300 克
鹽               5 克
糖               35 克
即用酵母    5 克
水              約 150 毫升
橄欖油       20 克

 

- 除橄欖油外，所有材料連湯種混合攪拌，逐少加水搓至起筋，之後加油搓成麵糰。

 

- 搓揉及摔打成光滑麵糰後滾圓，放入已灑粉嘅兜內，用保鮮紙封好，發酵 45 分鐘。

 

- 麵糰排氣後平均分割成 2 份，分別滾圓，靜置鬆弛 15 分鐘。

 

- 壓平麵糰，用擀麵棍擀薄成長橢圓形，將兩邊向內摺入。

 

- 將麵糰反轉，再次擀薄至與多士模闊度相約，然後由上而下捲起麵糰，捏緊收口。

 

- 將兩個麵糰放入上多士模內，蓋上模蓋發酵至八成滿。

 

- 模蓋完全合上，放入已預熱至 180 ℃ 嘅焗爐內，焗約 35 分鐘。

 

- 出爐後立即脫模，於架上攤凍。

以上材料份量可做 450 克方包 1 條。

 

呢個紅麴湯種唔使落色素都超鮮豔，仲好有營養價值哦！

 

 

 

 

唔知係咪因為今次用咗新買嗰包法國酵母，發酵力特強，
所以天氣咁涼都發到咁勁呢？

 

 

第二日用嚟整沙律多士，又靚又好食，滿足哦！