和味叉燒 & 豬頸肉

           大家千祈唔好誤會，以為我咁自大，讚自己整嘅嘢食和味哦！「和」字者，乃「日式」也。

 

        之前同大家分享過自製橘子醋，咁依家就同大家分享一下點樣去利用佢呀！睇完以下所用嘅醃料，你就會發覺真係好和風、夠哂「和味」呀！

 

材料：
脢頭豬肉

豬頸肉

 

醃料：

鹽

糖

味醂

清酒

橘子醋

七味粉

赤味噌

日式芝麻醬

 

- 豬肉洗乾淨，用抹手紙索乾水份。

 

- 將全部醃料材料拌勻，均勻塗於豬肉上，放雪櫃醃至少 3 個鐘。

 

- 用 200 ℃ 預熱焗爐；豬肉瀝乾醃汁放上烤架上，再放上烤盤；醃汁留用。

 

- 入爐先焗 15 分鐘，反轉後再焗 15 分鐘。

 

- 醃汁加入適量味醂，拌勻，然後掃上豬肉表面，焗 5 分鐘。

 

- 反轉豬肉，同樣掃上醃汁，再焗多 5 分鐘即可。

 

- 出爐後切件享用。

 

味道唔錯呀，有少少果酸味，可以平衡一下豬頸肉
嘅油膩感覺，仲有少少辣味，夠哂醒胃。

一向唔多鍾意食肥肉嘅我，今次居然覺得豬頸肉
好食過叉燒喎！皆因今次揀嚿脢頭太瘦喇，
所以肉質食起上嚟唔夠腍。

 

 

 

 

 

Notes：
- 可用其他味噌作醃料，但因赤味噌味道偏濃，較適合醃肉。

- 入爐烘焗時間只作參考，需視乎豬肉厚度而有所增加。

- 若果無醃汁剩的話，可直接掃上味醂或蜜糖。

 

- 橘子醋做法，請參考《和風橘子醋》。

 

- 日式芝麻醬做法，請參考《自家製日式芝麻醬》。