陳醋雜菜燜豬腱

        估唔到上次 post 完麥芽糖夾餅篇 blog 一個禮拜後，喺報紙度睇到港人十大喜愛零食，居然麥芽糖夾餅都榜上有名喎！我以為呢樣嘢都已經消失喺呢一輩嘅細路同年青人度，話得係我嘅兒時味道，都有番咁上下歷史啦，依家物資豐富，而且大部份家庭經濟都有番咁上下，真係諗都諗唔到仲會係呢代人嘅喜愛零食，可能投佢一票嘅全部都係六、七十後哦，哈哈！

 

        講番正題先，好多時見到 blog 友們整好多好吸引嘅菜式，我都好想試整，但係好多時都係牛、羊、鴨之類，我都唔食嘅，變咗都無乜興趣整。有次同 T&P 講開呢個問題，P 姐話可以用豬腩、豬腱、排骨等代替，豬腩同排骨要嚟煮餸都成日會用，但用豬腱嚟煮餸就真係未試過，平時買豬腱多數都係要嚟煲湯，估唔到用嚟燜餸的話，佢嘅口感同煲完湯之後好唔同，食過第一啖之後，居然鉤番起十幾廿年前我仲食牛肉時，對牛腩肉質嘅模糊印象，真係有點驚喜！

 

材料：
豬腱
南瓜
青瓜
番茄
茄子

蒜頭
乾蔥頭
紅辣椒
新鮮羅勒 ( Basil )

醃料：
鹽
糖
迷迭香
Dijon 芥末醬
粟粉
油

調味料：
鹽
糖
茄膏
紅酒
意大利陳醋 ( Balsamic vinegar )

- 豬腱切去多餘脂肪，洗淨後用抹手紙索乾水份，切件、用醃料醃兩個鐘以上。

- 南瓜去皮、去瓤；青瓜洗淨，切去頭、尾；番茄及茄子洗淨後切去蒂部，全部切件。

- 蒜頭去衣，用刀略拍爛；乾蔥頭去頭尾、去衣後對半切開；紅辣椒洗淨、切粒。

- 燒熱油，放豬腱入鑊內，以中慢火煎至兩面金黃後盛起。

- 原鑊內加入蒜頭、乾蔥頭、辣椒及茄膏爆香，灒少量紅酒。

- 將豬腱回鑊兜炒後加適量紅酒、陳醋及水煮滾，之後轉中慢火燜至軟身。

- 加入茄子及青瓜，燜至半腍後加入南瓜一齊燜。

- 當南瓜燜至軟身後，加入番茄，再煮多兩至三分鐘；羅勒葉洗乾淨備用。

- 最後加入羅勒葉，兜炒均勻後熄火、上碟。

 

多咗份陳醋嘅香味及酸味，令到豬肉食起上嚟無咁 "漏"。

 

 

 

 

 

無論配飯或意粉都咁正，但對我嚟講，
都係啲雜菜好食過嚿豬腱！

 

 

 

 

 

Notes：
- 醃肉步驟請參考《醃肉基本法》。

- 南瓜同番茄不應太早落鑊，煮得太耐的話會完全溶入汁料內。

- 加入羅勒後兜炒兩、三下就要即刻熄火，保留香味。