慢煮三文魚配南瓜甜薯蓉

        前幾日見到網友鬼嫁整慢煮三文魚好吸引，網友 BK 都整咗，仲再做多過少油版做實驗，見到佢哋咁成功，攪到我都好想試吓！

 

        咁啱前兩個禮拜去「IKEA」買個浴室角架，臨走時去咗食品部買急凍三文魚柳同煙三文魚，咁我就可以跟住試整，所以前兩日又去嘉咸街買沙律菜時，就順手買多紮蒔蘿返嚟準備整呢個慢煮魚。

 

        至於個南瓜甘薯蓉呢，我之前都已經整過一次，效果好滿意，所以都想喺度同大家分享一下。因為南瓜嘅水份比較高，可以令到薯蓉無咁乾之餘，仲比較滑溜，所以唔使好似一般做法咁又加牛油、又加奶同 cream 都一樣好 smooth，只需加少少 mayonnaise 就已經夠哂順滑，咁整法真係健康好多哦！

 

 

焗三文魚
 

材料：
三文魚柳
乾蔥頭
蒜蓉
新鮮蒔蘿 ( dill ) 

醃料：
鹽
即磨黑椒
白酒
橄欖油

 

- 三文魚洗乾淨，用抹手紙索乾水份；乾蔥頭去衣後部份切圈、部份切碎。

 

- 將鹽同黑椒灑上魚身，倒少許酒搽勻魚身，最後搽上適量油醃好。
 

- 焗盤放入焗爐內一同預熱 200 ℃，之後拎出焗盤，放入乾蔥圈及一半蒔蘿。

 

- 放上魚柳，再將切碎乾蔥、蒜蓉同剩低嘅蒔蘿放於魚上。

 

- 用錫紙封好焗盤，放入爐內，將溫度調低至 150 ℃，焗約15 – 20 分鐘至剛熟即可。

 

- 將魚汁淋上魚肉後上碟。

 

南瓜甜薯蓉

 

材料：
南瓜
番薯
蛋黃醬 

 

- 南瓜去皮、去瓤；番薯刨皮，將兩樣材料切細粒。

 

- 分別將南瓜同番薯蒸熟，趁熱壓爛成蓉。

 

- 將南瓜蓉及番薯蓉混合，再加適量蛋黃醬調味即成。

 

 

將蒔蘿及乾蔥圈墊底，除可為魚柳增加
香味之外，仲可避免黐底。

 

 

 

 

 

 

比起煎同蒸真係嫩滑好多，如果我肯好似鬼嫁咁
用咁多油的話，效果應該更加理想。

 

 

 

Notes：
- 由於南瓜水份較高，最好唔好蒸得過熟，否則質地會變得過腍及大量化水。

 

- 魚肉面可放上任何香草、香料及蔬菜。

 

- 大家亦可參考一下鬼嫁嘅原食譜：

  《蒔蘿慢煮三文魚》焗爐版

  《慢煮三文魚 - 50度 ＠ Miele》蒸爐版