2013年11月17日星期日

陳醋雜菜燜豬腱

        估唔到上次 post 麥芽糖夾餅 blog 一個禮拜後,喺報紙度睇到港人十大喜愛零食,居然麥芽糖夾餅都榜上有名喎!我以為呢樣嘢都已經消失喺呢一輩嘅細路同年青人度,話得係我嘅兒時味道,都有番咁上下歷史啦,依家物資豐富,而且大部份家庭經濟都有番咁上下,真係諗都諗唔到仲會係呢代人嘅喜愛零食,可能投佢一票嘅全部都係六、七十後哦,哈哈!
 
        講番正題先,好多時見到 blog 友們整好多好吸引嘅菜式,我都好想試整,但係好多時都係牛、羊、鴨之類,我都唔食嘅,變咗都無乜興趣整。有次同 T&P 講開呢個問題,P 姐話可以用豬腩、豬腱、排骨等代替,豬腩同排骨要嚟煮餸都成日會用,但用豬腱嚟煮餸就真係未試過,平時買豬腱多數都係要嚟煲湯,估唔到用嚟燜餸的話,佢口感同煲完湯之後好唔同,食過第一啖之後,居然鉤番起十幾廿年前我仲食牛肉時,對牛腩肉質嘅模糊印象,真係有點驚喜!
 


材料:
豬腱
南瓜
青瓜
番茄
茄子
蒜頭
乾蔥頭
紅辣椒
新鮮羅勒 ( Basil )

醃料:


迷迭香
Dijon
芥末醬
粟粉

調味料:


茄膏
紅酒
意大利陳醋 ( Balsamic vinegar )

- 豬腱切去多餘脂肪,洗淨後用抹手紙索乾水份,切件、用醃料醃兩個鐘以上。

- 南瓜去皮、去瓤;青瓜洗淨,切去頭、尾;番茄及茄子洗淨後切去蒂部,全部切件。

- 蒜頭去衣,用刀略拍爛;乾蔥頭去頭尾、去衣後對半切開;紅辣椒洗淨、切粒。

- 燒熱油,放豬腱入鑊內,以中慢火煎至兩面金黃後盛起。

- 原鑊內加入蒜頭、乾蔥頭、辣椒及茄膏爆香,灒少量紅酒。

- 將豬腱回鑊兜炒後加適量紅酒、陳醋及水煮滾,之後轉中慢火燜至軟身。

- 加入茄子及青瓜,燜至半腍後加入南瓜一齊燜。

- 當南瓜燜至軟身後,加入番茄,再煮多兩至三分鐘;羅勒葉洗乾淨備用。

- 最後加入羅勒葉,兜炒均勻後熄火、上碟。

 


多咗份陳醋嘅香味及酸味,令到豬肉食起上嚟無咁 "漏"。
 
 
 
 
 

無論配飯或意粉都咁正,但對我嚟講,
都係雜菜好食過嚿豬腱!
 
 
 
 
 
Notes
-
醃肉步驟請參考《醃肉基本法》。

- 南瓜同番茄不應太早落鑊,煮得太耐的話會完全溶入汁料內。

- 加入羅勒後兜炒兩、三下就要即刻熄火,保留香味。

8 則留言:

  1. 整到咁靚,好似餐廳出品咁喎。

    回覆刪除
  2. 哩個好吸引呀~~我都未試過用豬腱煮餸呢~~

    回覆刪除
    回覆
    1. 係囉,我估十個人十個都未試過呀!

      刪除
  3. 幾特別嘅餸喎,中西合璧?

    回覆刪除
  4. 回覆
    1. 咁又唔好咁講,其實我都有好多失敗㗎,不過收埋收埋唔講俾大家知咋,嘻嘻!同埋我其實唔太有心機,個人好懶,不過懶得耐又好似有點過份,有悔疚感,迫住煮啲複雜少少菜式出嚟!

      刪除