照燒南瓜雞肉丼飯

        仲記得之前我喺「SOGO」度 “搶” 到個日本南瓜嗎？諗住天氣咁涼，而且南瓜就咁擺室溫都無問題，見佢都無轉過色，所以一直都無理佢。直到前兩日，發現外皮有多處開始變腍，係時候要整咗佢嚟食喇！

 

 

材料：
雞扒
南瓜
洋蔥
珍珠米 

醃料：
鹽
蠔油
胡椒粉
日式料理酒

照燒汁：
日本醬油
味醂
日式料理酒 

- 雞扒去皮及多餘脂肪，洗淨後切件，用醃料醃好。

- 南瓜洗刷乾淨外皮，切開去蒂去瓤，瓜肉切件；洋蔥去衣後切細塊。

- 燒熱油，爆香洋蔥，之後加入雞件兜炒。

- 當雞肉完全變色後，加入南瓜兜炒，之後加適量水。

- 當水煮滾後，轉中慢火，冚上鑊蓋煮至南瓜腍身。

- 倒入部份照燒汁，兜炒至汁乾即可熄火，將材料勺上飯面上。

 

- 將餘下嘅照燒汁煮滾並略為稠身，直接淋上材料及飯面即成。

正宗日本南瓜真係好好食，又香又甜，質地又夠粉。

食之前再灑上適量炒香芝麻及辣椒粉
或七味粉，更加滋味呀！

Notes：
- 唔鍾意食南瓜皮的話，可以將之切去，煮時會比較快腍。

- 參照咗日本名廚 Masa 個照燒汁做法，材料份量全部相同，即 1：1：1。

- 如果無味醂的話，可加適量糖調味。