番茄南瓜黃豆餅

       唉，越嚟越無煮意，個腦越嚟越閉塞喇！！認真咁講，要自己煮飯的話，真係好難完完全全唔食肉，因為少咗肉食揀的話，更加少選擇，最慘係自己又唔多鍾意將菜式短時間內重覆再煮，起碼都兩、三個月後先再翻煮多次。如果有人煮埋俾我食的話咁又唔同，總之唔使自己諗煮乜餸就食乜都無所謂！

 

        依家開始乜到放埋一鑊熟就算，無乜點去深究過味道夾唔夾，總之入得口就算，簡單方便為上，呢個菜式就係其中一個例子！！

 

材料：
南瓜
番茄
發酵黃豆餅

調味料：
茄汁
白醋
辣椒粉

- 南瓜去皮去籽；番茄去蒂；全部材料切件，黃豆餅用少許鹽醃過。

- 調味料加水煮開，將南瓜同黃豆餅加入煮至腍。

 

- 落番茄，兜炒至收汁即可上碟。

 

 

 

由於煮呢個餸嘅當日係食齋，所以無用到喼汁，

如果唔係味道應該更加好味！

 

雖然只係求求其其將幾樣材料放埋一齊，

但好彩味道都唔太差！

Notes：
- 可參閱《香煎黃豆餅配參巴辣椒醬》知道更多發酵黃豆餅嘅資料。

 

- 如果煮好後汁料仍然好多的話，可用生粉水埋薄芡。