椰汁香茅燜南瓜

        本來打算用椰漿及其他香料煮南瓜，做成一道帶東南亞風味嘅素菜，但細心諗清楚，原來馬拉盞唔係素呢！咁就索性順手清埋雪櫃盒清雞湯啦！

 

 

材料：
洋蔥
南瓜
椰菜
上湯
椰漿

香料：

馬拉盞
檸檬葉
香茅
南薑
蒜片

- 洋蔥去衣後切塊；南瓜洗乾淨，切去瓜蒂及去瓤，然後切件；椰菜洗乾淨後切大塊。

- 馬拉盞放白鑊內烘香，之後樁碎成粉狀；香茅切去綠色部份，用刀將白色部份拍鬆。

- 燒熱油，將馬拉盞以外嘅香料及洋蔥爆香，加入南瓜件一齊兜炒。

- 加入馬拉盞，上湯及椰漿，兜勻後煮至翻滾，然後轉中慢火煮至南瓜微微腍身。

- 放椰菜落鑊兜炒至軟身即成。

細細件南瓜，唔使燜好耐都已經攪掂喇，如果遲一步先去

睇吓佢的話，肯定煮到過腍，嘥咗個南瓜哦！

完完全全就係東南亞嘅味道，加辣椒一齊煮仲醒胃呀！

Notes：
- 宜用日本種南瓜，除味道較甜外，肉質比較結實，適宜做燜菜，且熟後口感較粉。

- 上湯可改用清水加適量魚露代替。

 

- 若煮好後仍然有較多汁的話，可用生粉埋芡。