玻璃曲奇

        今日又有禮物收啦！不過今次特別啲，份禮物唔係由對方親手送俾我，而係要我自己親身去拎呢份禮物。點解，因為我住屯門囉，哈哈！

        係咁嘅，因為 Louisa 早前同 blog 界餅后 Vanlily ( 我稱佢做屯門整餅天后 ) order 咗啲玻璃曲奇用嚟送禮，咁我同 Vanlily 大家都係屯門人嘛，所以咪先由我同 Vanlily 喺市中心交收，然後我再拎去俾佢囉，不過 Louisa 話預埋我一份，叫我自己先攞起一份，所以我就唔客氣啦，即刻攞咗一份出嚟影相，仲急不及待先食為快 o添！

        你哋睇吓，啲曲奇係咪好靚呢？真係好別緻呀！

 

        呢張相嘅感覺好有教堂玻璃窗 feel！

 

        你睇，真係透光 o架！

 

        Vanlily 真係有心思，連包裝袋都附送埋，仲款款都好靚 o添！唔怪得之對上一期《新假期》嘅 《結婚完全手冊》都搵咗佢拍攝有關回禮西餅同回禮包裝啦！

        今次知道有機會見到 Vanlily 覺得好開心，做咗三十幾年人，第一次有種 fans 見偶像 feel，唔係講笑，我真係好認真 o架！ ( 呢方面我諗 blog 友阿 Yen 會好明白我心情 ) 小弟都係最近先開始學人做 "阿茂"，咁新仔整餅，自然遇到唔少問題同失敗啦！除咗經常請教 "御用糕餅顧問" 明仔之外，好多時我都會去 Vanlily 個 blog 度搵資料，有時甚至留言直接向佢請教。好似之前整咗好多次都失敗嘅海綿蛋糕，一跟咗 Vanlily 個方法即刻成功做到；而係人食過都讚好食嘅橙香經典朱古力蛋糕，都係跟佢個食譜做，所以對我嚟講，Vanlily 嘅糕餅屬於信心之選。

        同 Vanlily 傾咗一陣間，佢個人都好 nice，覺得佢果然人如其名 ( 自己慢慢諗吓點解啦 )！佢仲有少少 bonus 送俾 Louisa o添，真係唔話得！

        喺呢度，同樣要多謝 Louisa，多謝佢送份咁別緻、咁靚嘅禮物俾我，仲俾我有機會見到餅后個真身 o添，真係要講多幾聲：Merci！Grazie！Danke！Thank you！多謝 ……… 

海帶綠豆沙

        自從天氣熱咗之後，額頭同面都生哂 "豆豆"，仲成日都唔散，都未試過咁耐唔好，所以今日試吓食番碗綠豆沙涼一涼佢，睇吓會唔會好啲先！

材料：
綠豆
海帶
臭草
片糖

- 綠豆放筲箕內、沖水洗淨，將沙石雜質洗走後，用水浸過夜。

- 海帶徹底洗淨後，浸水至發大；臭草洗淨備用。

- 煲滾水，先放綠豆落煲，等到煲番滾之後，就落埋海帶同一半臭草。

- 再次煲滾後，轉中火繼續煲多 10-15 分鐘，之後校番大火煲約15秒鐘，就可以
   放入真空煲度。

- 約 3 個鐘後，拎番上火上面煲番滾，並用湯舀將綠豆稍為壓爛，方便起沙 ( 呢招
  係 Louisa 教我 o架 )；與此同時準備煲片糖水。

- 當片糖完全煮溶後就倒埋入綠豆沙裡面，放埋剩低果一半臭草，煲多十零分鐘就
  得啦！

       

Notes：

- 呢棵就係臭草喇，簡直係煲綠豆沙嘅靈魂所在，無咗佢，硬係食落差咁啲！其實
  咁清香，都唔知點解會叫做臭草。

 

- 海帶毋需用太多，因為佢浸水後會發大好幾倍。原本我只係拎咗大約我掌咁大度
  嘅海帶，浸完水之後就發大到變多咗咁多。

 

- 海帶一定要徹底洗乾淨，因為好多沙石同鹽喺表面，你睇，洗完之後幾恐怖！

 

- 抆哂啲臭草葉出嚟之後，剩低果枝粗莖唔好丟咗去，可以擺喺屋企當香薰乾花用
 ，因為枝莖都有香味 o架！

 

荔枝紅茶凍

        呢輪 blog 友阿 Yen 成日都整果凍，睇到我心郁郁都想試吓整，於是就問佢喺邊度可以買到蒟蒻粉，原來喺二記已經有得賣，平時都無留意到。所以上次又再幫 Louisa 買 cream cheese 時，就順便買包蒟蒻粉返嚟試吓整。買咗返嚟之後，又咁啱得咁 "橋"，老豆又拎咗啲樹上摘嘅荔枝返嚟，咁就啱哂喇，要嚟整果凍啦！但係無理由就咁將啲蒟蒻粉煮溶，加啲砂糖就算 o架！諗咗好耐，最後就決定用紅茶配荔枝啦！

材料：
新鮮荔枝      3粒
蒟蒻粉          10克
砂糖              2湯匙
水                  1杯 (240毫升)
紅茶茶包      1包

- 荔枝剝殼、去核，切碎粒備用。

- 先煲滾水，放茶包落煲度，後轉中細火將茶葉煲出味。

- 茶葉煲出味後，就將爐火校到最細，然後加入砂糖攪拌至完全溶解。

- 唔好熄火，繼續以最細火保暖，並加入蒟蒻粉 ，慢慢攪勻至完全溶於水。

- 將切碎荔枝肉逐粒放入冰格裡

- 之後就將啲蒟蒻溶液倒入製冰模內，放入雪櫃雪到凝固就得喇！

 

        好睇又好食，淡淡哋嘅紅茶裡面，粒荔枝就為呢個平凡果凍生色不少。學阿 Yen 話齋，天熱時食完果凍就即刻舒服哂！

        我始終鍾意蒟蒻多過大菜、啫喱，因為佢唔似大菜咁爽口，比較煙韌同有 o趙頭；又唔會好似啫喱 ( 魚膠 )咁軟滑，恰到好處。

 

Notes：
- 蒟蒻粉同水嘅比例係參考包裝袋上嘅 suggection，如果想再煙韌啲嘅話，就需要
  減少水嘅份量或增加蒟蒻粉嘅份量。

- 砂糖嘅份量可依據自己口味調校，不過就建議大家可以落多少少，因為雪凍之後
  會無咁甜。

- 將混合液預先倒入量杯，然後先至斟落冰格度，咁樣會方便好多！

- 紅茶包我係用 Twinings English Breakfast Tea，貪佢唔會太濃而有苦澀味。

蔥香豆豉爆雞球

        上次為咗做上海排骨而買咗一袋乾蔥頭喺度，之前好多時都因為用唔切而攪到變質或者爛哂，所以今次就諗吓有咩方法可以快啲用哂佢，費事又擺到爛哂就嘥咗啦！呀，有喇，就加埋豆豉一齊炒雞球啦！

材料：
急凍雞扒
豆豉
乾蔥頭
蒜茸
蔥
紅椒粒

醃料：
鹽
糖
生抽
老抽
孜然粉
玫瑰露
粟粉
油

調味料：
鹽
糖
蠔油
麻油
玫瑰露

- 雞扒解凍後去皮，切去多餘脂肪，沖洗乾淨，切件備用。

- 用醃料拌勻雞件，先醃半個鐘，之後再分次加入粟粉同油拌勻醃過夜。

- 豆豉略洗、乾蔥頭去衣開邊、蔥洗淨切細段。

- 燒熱油，將雞肉放入鑊內炒至八成熟，盛起。

- 爆香蒜茸、豆豉、乾蔥頭同紅椒粒。

- 將雞球回鑊、灒酒，加入調味料，將雞球炒至全熟，最後加埋蔥段、灑上麻油，
  就可以上碟。

        好香、好惹味，雞肉仲保持到嫩滑，加上辣辣哋，刺激食慾，真係可以食多碗飯！

繼續挑戰整 muffin

       整 Pizza 仔果日咪預告咗今晚又做實驗嘅，之唔係又死心不息，繼續研究點樣整 muffin 囉！

        今日都係繼續用「美味 DIY」個 recipe，貪佢夠簡單，減少份量嘅比例又易計，不過就乜配料都唔落，齋做原味 muffin，費事又再失敗時浪費哂我啲食材。

        今次嘅實驗目的，主要係測試吓問題係咪在於我唔識用個膠刮攪拌，所以今次全程都用拂蛋器去攪拌。

        出爐啦！好心急知道今次成唔成功，齋睇過樣就掂過上次喇！ 

 

        嗯，掂喎！今次鬆散啲喇！

       

        換個角度影多張，係咪睇到鬆散嘅 texture 呢！

        咁就有咗初步結論喇，果然真係唔用膠刮攪拌就做到，死未！！

        唉，你話係咪老人癡呆得交關呀！其實之前我個 "御用糕餅顧問"  (咁樣講佢會開心啲、飄飄然啲  ) 明仔都教過我，佢話用拂蛋器攪拌麵糊係會比起用膠刮均勻得多，同埋快好多，容易將所有粉粒攪勻。今次我用拂蛋器攪時，明顯係容易咗好多去拌勻，攪兩、三下已經完全唔見粉粒，同埋快手咗好多，成個過程都快過上次，所以一路做，一路都已經 feel 到今次成功機會大好多。

        你話死唔死呀，人哋都一早點咗條捷徑俾你，自己又死無記性，攪到失敗完一次又一次！今次唔係同學生講啦，係要同番自己講：「間屋四面周圍都係牆呀！！！」

        都係成日教學生 aural training 時講果句：「唔理你用咩方法同手段，總之出嚟個結果係啱就得喇！」我唔識用膠刮攪拌唔緊要，可以用拂蛋器成功咁做到鬆身嘅 muffin，咁咪以後都用拂蛋器囉！又無話唔用膠刮攪拌做 muffin 要打靶嘅，right？

        下次實驗就用 muffin 專家 Motonako.A 最新俾我個香蕉 muffin 食譜，但就全程都用電動打蛋器攪拌，睇吓又係咪好似上次果香蕉蛋糕咁鬆先！

P.S.  原來原味都幾好食 o架喎！不過就甜咗啲啫。

香腸 Pizza 仔

        今晚老豆唔喺度食飯，咁我咪又可以做 "實驗"！哈哈，好，就決定整 Pizza 啦！

        因為係實驗品，所以做得好求其，最主要都係想睇吓可唔可以做到個鬆軟厚批底啫！最終都成功做到啦，你哋覺得點呀？

        我當然覺得 OK 啦！Pizza 個邊焗得好香口，有少少脆；成個批底都好鬆軟，簡直可以用海綿嚟形容

        因為係做實驗，所以無正式整個茄醬，只係搽咗啲千島醬上去上面，灑上 Oregano 香草，再放上香腸片就算數。試過今次成功，下次就會正正式式整番個茄醬，仲會加埋 Mozzarella Cheese o添！為咗整呢個薄餅，攪到我成 10:30 pm 先有得食。

        識得整，以後就唔駛出去 "乞" 食喇！明無？ 星期日晚老豆都唔喺屋企食，到時又再做實驗！整乜嘢，到時咪知道囉！成日做實驗，屋企個廚房就嚟變咗個 Food Laboratory！

P.S.  因為實在太求其喇，所以唔出食譜，到下次認認真真再整時先打個食譜啦！

         仲有，最開心嘅唔係整到果 Pizza，而係之前整法包仔時用剩嘅酵母，到依家仲咁活躍，睇番個日字原來已經係 4月果陣時 o架啦！咁即係証明可以放入冰箱度一段時間都無所為啦！

唂咕包

        真係好，美心西餅不斷有 coupon，我就可以慢慢試各種麵包，今次就睇中新出嘅唂咕包。

        我覺得真係無改錯名，叫做唂咕包而唔叫做朱古力包，係我嘅字典裡面，唂咕係比朱古力濃，而且無咁甜，呢個包就正正係咁樣。

        表面一粒粒焗到金黃色嘅就係所謂嘅牛油曲奇？但我唔覺係曲奇囉！

 

       最開心就係麵包裡面有啲朱古力粒，食落特別有朱古力味！如果包質硬番啲就更加好喇！

 

        今次個實物同廣告張相算係分別唔大 o架喇，值得一試！

飲食 Mix & Match

       我習慣咗每次煮餸都會煮多啲，一次分兩餐。一來我唔係晚晚都得閒煮飯，所以當我唔得閒喺屋企煮嘅時候，我老豆只需將剩低嘅餸煮番熱就攪掂，唔駛重新煮過樣新嘅。其次就係買兩人份量嘅餸都幾難，所以一次過買定兩餐餸嘅份量會易啲。

        好似呢碟炒雜菜咁，係之前食剩嘅，今晚就只需要加啲青口，再加入黑椒汁同鮮醬油重新調味，已經變身成另一款惹味菜式。

 

        你睇，唔講都真係估唔到係一碟隔夜餸！

       

        情況就好似 fashion 咁，將幾套衫拆開嚟重新互調配搭，就可以做出唔同 style 嘅新款式，大玩 Mix & Match ，烹飪都係一樣 o架，不妨大膽嘗試，創造出自己獨有嘅 fusion 菜！

木瓜枝竹冬菇眉豆湯

        今次係喺一個叫做 「103種蔬菜湯水食譜」嘅網頁度搵到依個湯 o架！茹素嘅朋友不妨去睇吓呀，起碼多啲煲齋湯嘅 idea嘛！

材料：
木瓜
枝竹
眉豆
花生
冬菇

- 除木瓜外，其餘全部材料沖洗乾淨，用水浸過夜。

- 花生去衣、冬菇去蒂。

- 木瓜去皮後切開邊，用匙羹將裡面啲核刮走，然後切件。

- 煲滾水後，將所有材料一齋放落煲，大火煲滾後轉中慢火繼續煲多廿分鐘度。

- 熄火後放入真空煲內，約兩個零三個鐘後再放番上火煲多廿分鐘，落鹽調味，
  完成！

 

Notes：
- 處理木瓜時記得戴手套，今日唔記得咗先戴手套就摸咗落個瓜度，即刻 feel 到痕
  痕痛痛，即刻走去沖水。

- 冬菇蒂可剪去硬底木頭部份，一齊加埋落去煲湯。其實冬菇蒂係熬素上湯嘅常用
  材料。

P.S.  我卒之都知道點解啲人成日話生完 BB 嘅媽咪要飲多啲木瓜湯，因為今日我將個木瓜頭尾切去後，個瓜不斷咁滲啲白色汁液出嚟，好似奶咁，一點一點咁凝聚哂喺表面，後尾仲多都滴哂落個砧板上面 o添！可能根據中醫學說嘅以形補形，會幫到啲媽咪有多啲人奶喂 BB。

         以前聽過媽咪同老豆講，話有啲人用木瓜嚟走私，切開個瓜，去瓤去核後，就放啲手表入去，之後就即刻將兩邊瓜合番埋一齊，咁個瓜就會自自動黐番埋，完全唔覺俾人切開過，高招！可能都係因為果啲汁液咋！

潮州魚蛋紫菜湯

        今晚整完排骨菜飯之後，仲有清雞湯剩，包裝盒上又寫住要 5 日內用完，最方便、最快手嘅方法就係要嚟滾湯囉！

材料：
紫菜
蟹柳
潮州魚蛋
冬菜
清雞湯

- 紫菜先浸水，之後洗淨備用。

- 蟹柳、魚蛋同冬菜略為沖洗；蟹柳切段備用。

- 保滾清雞湯後，加入魚蛋，等到魚蛋開始漲大時，就落埋其餘材料落煲，湯一滾就
  攪掂。

 

P.S.  原本諗住買魚扎嘅，點知原來夏天係無魚扎賣，因為怕天氣太熱，容易變壞 ，所以唯有改用蟹柳囉！今日真係都唔知做乜事，買乜冇乜，買魚扎無魚扎；想買小棠菜，行勻成個街市都只係得兩檔有得賣，平時唔食唔用果陣就檔檔都有得賣；連蒜頭咁普通嘅嘢，買開個檔菜檔都話無，"咩樹" 呀今日！！！！