Kestrel's Blog

2010年4月17日星期六

薑味黑糖脆餅 Brown Sugar Ginger Cookies

我成日都話，冬天最好整曲奇，夏天最好整麵包！因為冬天溫度低，曲奇麵糰無咁瀉身，易啲控制；相反，夏天天氣比較暖，比較適合麵包發酵。

呢幾日又唔知發咩神經，突然之間凍番咁多，所以最好就係整曲奇喇！

焗緊呢個薑味黑糖脆餅嘅時候已經聞到好香濃嘅味道，但係呢隻味道
好得意 o架，exactly 係薑醋味嚟 o架！

材料：
牛油                  200 克
糖粉                  135 克
雞蛋                  1 隻
黑糖                  65 克
低筋麵粉          320 克
薑粉                  30 克
即溶咖啡粉     1 湯匙
熱水                  2 湯匙
蛋黃                  1 個

以上材料份量約可做 5 厘米脆乾 30 - 40 件。

食譜嚟自張朝順嘅《新手不敗烘焙》。

- 麵粉同薑粉過篩；牛油室溫放軟。

- 牛油、糖粉及黑糖混合好，加入雞蛋拌勻，再篩入粉類拌勻成麵糰。

- 用保鮮紙將麵糰包好，放入雪櫃雪 2 個鐘。

- 拎出麵糰，撒上少少手粉，用擀麵棍擀至約 1/2 厘米厚。

- 用餅模將麵糰 "吸" 出，排放喺已鋪入爐防黏紙嘅烤盤上。

- 咖啡粉用熱水溶解，加入蛋黃打散，成為掃面蛋液。

- 將蛋液掃上麵糰上，之後將整盤麵糰放入已預熱至 170 °C 嘅焗爐內焗 15 - 20分
鐘。

- 餅乾出爐後放喺架上放涼。

顏色焗得好靚，好上色，食落非常香脆呀！

裝滿哂整個密實盒，睇見都好開心呢！

Notes：
- 牛油無需打發，只需與糖混合好即可。

- 根據我有限嘅整曲奇經驗，再加上最近做完回禮餅之後，我發覺整 "吸" 模曲奇最好
都係用整 scone 嘅方法去做，即係將凍牛油粒捽入麵粉成麵包糠碎狀，咁樣整出嚟
嘅麵糰可以比較挺身，無咁軟、無咁瀉身，易啲控制，所以我今次無跟上面食譜嘅
方法去做，同樣都係用番摔粉方法，效果都幾好呀！

- 想麵糰再挺身啲，可以酌量減少牛油份量。

- 個人認為，麵糰擀得厚些少會好啲，因為成品賣相厚啲，感覺會靚啲。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2010年4月15日星期四

婚宴回禮餅 — 玻璃曲奇

之前都同大家分享過幾次大製作嘅實習成品，包括玻璃曲奇、馬卡龍同埋糖霜曲奇，主人家最後就揀咗玻璃曲奇。所以星期日同星期一兩日，我同 Winnie 就去咗 Louisa 屋企一齊整餅，整足兩日，總共整咗 1200 塊餅呀！整完之後，我哋幾個都真係攰到死呀！！！

做好哂包裝之後，我哋個個都好滿意呢，賣相真係唔差 o架，
絕對唔會輸蝕得過果啲專接 bakery order 嘅製成品呀！

搓麵糰、擀麵糰、"吸" 餅模，各人分工合作。

曲奇新鮮出爐，塊塊都焗得好靚呀！

呢幾日天氣都好濕，所以等啲曲奇餅一攤凍就即刻放入防潮箱。

細餅就放入密實盒內保存。

你睇，要用咁多罐果汁糖先夠整呀！

包裝用品：絲帶、鐵線、膠袋。

因為我一向做手作嘢都唔係好掂，所以包裝呢家嘢就由 Winnie 同
Louisa 一手包辦，連工人 Jovy 都要出動埋呢！

大功告成！！入好箱之後，就可以送去婚宴會場喇！

婚宴場地入口佈置得好靚呀！

嘉賓席上已放好回禮曲奇。

鮮紅嘅主家席上，放上金黃色嘅回禮曲奇，起到點綴作用呢！

Louisa 仲身體力行，親自做埋我哋啲回禮曲奇嘅代言人 o添呀！

大製作嘅實習片段重溫：

大製作 — 實習篇 I

大製作 — 實習篇 II

大製作 — 實習篇 III

P.S. 多謝 Frankie 影咗幾張婚宴場地實況嘅相俾我 post 上嚟同大家分享！

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2010年4月14日星期三

冬菇黃耳炆佛手瓜

整完大製作之後，到今日都仲未攰完呀！所以都無落到街買餸，反正今日又係初一，唔駛專登去街市買肉，真係懶得就懶呀，無辦法啦，真係好攰嘛！

老豆又拎咗佛手瓜返嚟，咁再摷埋屋企嘅乾貨，求求其其煮到個餸就算喇！好，就用冬菇同黃耳嚟炆佛手瓜啦！

材料：
佛手瓜
冬菇
黃耳
薑片

調味料：
生抽
糖
素鮑汁
栗粉
麻油

- 先將冬菇浸發好，之後切細；黃耳浸發後剪去底部，洗淨、汆水，備用。

- 佛手瓜刨皮，洗淨後切件。

- 燒熱油，爆香薑片，落佛手瓜爆炒一陣。

- 放入冬菇同黃耳，加調味料 ( 粟粉麻油除外 ) 及水，用中慢火炆煮。

- 當所有材料熟透腍身時，就可以用粟粉水埋芡。

- 最後灑上麻油，兜勻後熄火，即可上碟。

Notes：
- 浸冬菇水可以留用，用埋嚟炆餸會更加好味。

- 若果佛手瓜比較早炆腍的話，可先盛起，到上碟前先回鑊兜炒翻熱即可。

- 唔係食素嘅朋友可以用蠔油代替素鮑汁。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2010年4月13日星期二

意大利杏仁餅乾 Amaretti

嘩，卒之都完成咗大製作呢個 project 喇！！我哋幾個都真係攰到死呢！等埋 Louisa 今晚去到宴會場地影完相，之後 send 番俾我先至 post 上嚟 blog 度，遲啲再同大家分享啦！

由於呢兩日整嘅婚宴回禮餅個麵糰只係需要蛋黃，所以剩咗勁多蛋白，咁食完飯之後，當 Louisa 同 Winnie 繼續做埋包裝時，Louisa 就俾個食譜我，叫我自己試吓整呢個 Amaretti，因為又易整、又好食，但最重要就係只用蛋白，唔用蛋黃，咁就可以銷咁啲蛋白啦！

材料：
杏仁粉      175 克
糖霜          125 克
糖              50 克
泡打粉      1/8 茶匙
梳打粉      1/8 茶匙
蛋白          2 隻

- 將所有粉類同糖過篩，混合均勻。

- 加入蛋白，用膠刮拌勻。

- 用匙羹將杏仁蛋白混合物逐少勺上已鋪入爐防黏紙嘅烤盤上。

- 放入已預熱至 160 °C 嘅焗爐內焗 25 分鐘。

- 將杏仁餅乾放上架上攤凍即可。

其實呢個 Amaretti 係意大利式嘅 Macaron，所以食落口真係熟口熟面，
不過做法就簡單好多喇，而且個人覺得 Amaretti 仲好食啲 o添！

總共整咗兩大盒餅乾，一盒當然係自己要啦，另一盒就整俾 Winnie。

Notes：
- 喺原食譜裡面，175 克杏仁粉中，有 50 克係用北杏磨成杏仁粉。

- 原食譜係用 75 克糖，不過 Louisa 就話俾我聽，跟足原食譜份量的話會好甜，所
以我就減咗 25 克糖，不過依然都幾甜。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

2010年4月10日星期六

大馬站煲

上幾個星期，同 Louisa 一齊去咗煤氣烹飪中心度跟 Annie 學整脆皮燒腩，之後就將嚿又大又靚嘅燒肉拎番屋企做餸，點知之後第二日，老豆食完盆菜後又拎多嚿燒肉返嚟，攪到啲燒肉多到依家都未食得哂，咁啱老豆噚日又拎咗啲韭菜返嚟，咁就啱喇，買嚿豆腐返嚟就可以整大馬站煲。

大馬站，真係好耐都無食過喇，印象中好似係小學時期媽咪整過之後，到依家都未食過，一提起，就即刻流哂口水喇！有韭菜嘅香味、有蝦醬嘅惹味、亦有爆香燒腩嘅好味，加埋一齊，真係好味到暈！！今晚又再次追尋番呢個兒時回味嘅味道。

好好味呀，同媽咪整嘅差唔多味喎！

材料：
豆腐
燒腩
韭菜
蒜片
薑片

調味料：
蝦醬
紹酒
糖

- 豆腐用抹手紙包住，之後用重物壓喺上面，將多餘水份迫出；韭菜洗乾淨後切段。

- 燒熱油，將豆腐兩面煎至金黃，盛起備用。

- 落蒜片同薑片爆香，跟住落埋蝦醬一齊爆。

- 當蝦醬都爆出香味之後就落埋燒腩，灒酒，兜炒幾下之後，將豆腐回鑊。

- 加入適量水，落糖，用中慢火炆至水份略為收乾。

- 另燒熱砂鍋，落油，爆炒韭菜至八成熟後，將燒腩、豆腐連汁加入，煮滾後即可。

Notes：
- 豆腐最好買實豆腐，因為比較硬淨，煎嘅時候無咁易爛。

- 糖嘅份量可因應蝦醬嘅鹹度而調節，所以最好試一試味。

- 惹醬汁太多的話，可用粟粉水埋薄芡。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

雜乾果合桃裸麥包 Assorted Dried Fruit & Walunt Rye Bread

早前 Louisa 個 friend 去完台灣，買咗包裸麥粉俾我，原本我同 Louisa 諗住喺佢屋企即刻整包包食，點知佢原來無酵母喺屋企，咁我就唯有拎返袋粉返屋企先整。

因為呢幾日比較忙，無乜時間諗整邊隻裸麥包，於是就做番上次跟雪媽媽個食譜整果個合桃乾果裸麥包，反正 Louisa 都讚好食。不過今次就改咗乾果料，仲跟番雪媽媽個食譜裡面個做型嚟整 o添！

材料：
高筋麵粉                            160 克
裸麥粉                                 90 克
水                                        160 毫升
即用酵母                             4 克
鹽                                         2 克
糖                                         20 克
橄欖油                                 12 克
合桃                                     35 克
紅莓乾                                 15 克
杏脯乾                                 15 克
提子乾                                 20 克

- 合桃沖洗乾淨，用抹手紙索乾水份，放入焗爐內，用 180 °C 焗 8 - 10 分鐘至
香，攤凍後與杏脯乾一齊切碎；所有果乾用少量 rum 酒浸軟。

- 將所有粉類材料、酵母、油、鹽同糖倒入食物處理器內混合，加水搓成光滑麵
糰。

- 拎出麵糰，將麵糰滾圓並黏緊收口，放喺已搽油或灑粉嘅兜內，然後用保鮮紙冚
住，發酵約 45 分鐘。

- 當第一次發酵完成後，將麵糰排氣，然後將麵糰拎到枱面上分割成 4 小份，將小
麵糰滾圓後，冚上保鮮紙鬆弛 10分鐘。

- 用擀麵棍將麵糰擀平成長方形，放上合桃及乾果後捲起、收口。

- 將麵糰略為拉長，圍住 4 吋戚風模嘅中軸一圈，然後將其中一端包住另一端，握
緊收口。

- 將麵糰連戚風模中軸放喺已經鋪上入爐防黏紙嘅焗盤上，冚上保鮮紙作最後發
酵。

- 當麵糰發酵到大約兩倍大時，就灑上少少高筋麵粉喺麵糰上面。

- 用利刀喺麵糰上面割幾刀，放入已預熱至 200 °C嘅焗爐內焗 25 - 30分鐘至熟。

因為只得兩個戚風模，所以剩低嘅麵糰就咁搓埋一嚿就算！

呢包就係專程喺台灣帶返嚟嘅裸麥粉喇！

Notes：
- 材料份量亦可利用一個直徑 3 吋嘅鋼圈做出一個大麵包。

- 乾果及果仁配搭可因應個人口味改變。

- 戚風模中軸或鋼圈需預先搽上油作麵糰防黏之用。

你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

翠玉瓜鬆餅 Zucchini Muffin

最初見到呢個食譜時，好吸引我呀！因為原食譜係寫住「意大利青瓜鬆餅」，咁我就即刻諗到兩個問題：第一，點解指定要用意大利青瓜呢，有咩特別，同一般青瓜有咩唔同？第二就係，青瓜咁易出水，乜真係可以用嚟整蛋糕咩？於是我就上網搵吓資料，原來意大利青瓜個意文寫法係 zucchini，同翠玉瓜個英文完全一模一樣，再搵吓相睇，點知幾乎同翠玉瓜一模一樣咁滯，只係比翠玉瓜深綠色啲，同埋有啲品種係黃色。咁所以我就知道其實係可以用翠玉瓜代替，同埋唔駛怕有水出啦，因為翠玉瓜根本唔會化水！加上發覺原來有好多網友都整過翠玉瓜蛋糕，所以我先大膽一試咋！