2012年8月4日星期六

雙冬蝦乾湯泡飯


呢幾日真係熱到癡線!!

 



我習慣每朝起身後就會飲杯暖水、粒蜂膠,點知一飲完杯暖水之後就即刻成身汗,其實都唔算係暖水喇,只係微微暖嘅溫水都攪成咁!因為我主要係上門教琴,所以已經習慣哂日曬雨淋,但係呢幾日真係好難頂,尤其星期二嗰日去康樂園,火車到咗太和站之後,車門一開 ……… 嘩,熱到成個蒸籠咁,真係同焗桑拿無乜分別!



 



唔知係咪因為太熱嘅關係,個人好唔舒服,我懷疑自己有少少中暑!喺咁嘅情況下,唔好話入廚房煮飯,就連食都唔係好願食呀,所以今晚就整咗呢個湯飯,一來少
啲功夫,二來易啲入口。一向都唔主張食泡飯嘅我都會整嚟食,咁你話天氣真係熱到呢
………


 



材料:

冬菇

蝦乾

瘦肉

豬膶

冬瓜

薑片



白飯



瘦肉醃料:






生抽

紹酒

粟粉



豬膶醃料:


薑汁

紹酒

胡椒粉





-
冬菇浸發好後去蒂、切粒;蝦乾洗乾淨,放入浸菇水內浸至軟身,之後切細;水留用。




-
瘦肉洗乾淨、切粒,之後用醃料醃好;豬膶洗淨後切粒,用醃料醃好,備用。




-
冬瓜去皮、去瓤,沖洗後切粒。




-
煲內加適量水,放入薑片及浸菇水煲滾。




-
先落冬瓜煲至半腍,然後將豬膶、瘦肉、冬菇同蝦乾一齊加入,煲至出味。




-
煲好之後加適量鹽調味,最後加入白飯,煲至湯翻滾即可。




湯夠清甜,飯粒吸收咗味道之後,濕濕哋真係易入口好多。
本來想買埋夜香花㗎,不過可惜街市無得賣!





Notes

-
豬膶其實可以唔駛醃,不過加入以上醃料可以去除腥臊味。




-
如果想方便的話,可以將已煮好嘅湯直接加入白飯,拌勻即可享用。




-
煮飯用嘅水可以比平時用量少啲,煮成較為乾身嘅飯粒,可以吸收更多湯水之餘,加湯煮
  飯時又唔會變得過腍。

11 則留言:

  1. 上次十號波前都係咁焗熱,唔知係咪仲有個風打
    我都完全唔食泡飯,以前屋企會煮杰粥,凍食,配d涼拌清爽小菜反而幾好!
    喂,你煲d綠豆沙食啦,解暑架
    [版主回覆08/06/2012 00:45:27]我依家唔得喇,涼少少都唔掂,滾菜湯倒必痾!上次食過洛神花仲 "wing wing" 哋㖭呀!我知道自己照顧媽咪嗰段日子攪壞咗身子喇!好似今日咁啦,晏起身,所以無食早餐,之後煎 pancake 食,用香蕉蓉代替果醬,夠哂健康啦!加杯焦糖咖啡,應該無事啦,點知食完無幾耐,個肚就 "乸" 住咁痛,心知不妙,結果咪又係痾囉!都唔知做乜,唯有係賴整完雪糕之後,舔過個膠刮上面啲殘餘物資啩!
    [毛豆回覆08/05/2012 13:31:25]好多人都話綠豆咩寒涼.邊有咁勁呀...冇事既.
    [版主回覆08/05/2012 13:04:33]唔好話慢動作呀,企喺度唔郁分分鐘都會成身汗!!
    凍粥?咪好似 "食糊" 咁囉?不過我唔係太好粥,少煲!
    其實我好鍾意食綠豆沙㗎,不過成日食又驚會太涼,費事成日走入廁所啦!我諗住嚟緊煲綠豆蓮藕湯呀!

    回覆刪除
  2. 一冷一熱好易病的。。小心啊!
    湯飯唔錯啊,方便易入口。 ^^
    [版主回覆08/05/2012 12:59:51]係囉,香港地,成日出出入入冷氣地方,真係想唔病都幾難呀!
    就係因為呢個原因先整泡飯囉!

    回覆刪除
  3. 泡飯唔係熱天食係懶煮時會用隔夜飯加湯
    [版主回覆08/05/2012 12:58:17]係?我反而鍾意將隔夜飯用嚟整炒飲喎!不過查實我屋企跟本唔會有隔夜飯,次次整嚫炒飯都係專登煮多少少留隔夜。

    回覆刪除
  4. 咁熱直頭唔想煮添喇! 湯飯又真係快靚正哦!
    [版主回覆08/05/2012 21:40:38]係啦,妳嗰邊都反常咁熱,間中整吓泡飯都唔錯,順便偷吓懶嘛!成日食就唔好啦,始終都係傷胃!

    回覆刪除
  5. 咁熱真係好難頂
    [版主回覆08/10/2012 19:57:08]咪係囉,郁一郁都唔得掂呀!

    回覆刪除
  6. 緊張大師-小女人2012年8月6日 上午7:34

    湯飯未食過,細細個爸媽教不要用湯送飯會胃痛,太深入我心,所以由細到大都係迼離湯飯,不過我知咁熱天時好多人會愛呢個湯飯容易入口.
    [版主回覆08/10/2012 19:59:20]係真㗎,對個胃唔好,負荷大咗!所以成世人食過泡飯嘅次數五隻手指數得哂!

    回覆刪除
  7. 夏天我成日都滾冬瓜湯嚟做湯飯,正呀!
    [版主回覆08/10/2012 19:56:25]係呀,真係消暑㗎,不過唔好成日食泡飯呀,對個胃唔好,增加負荷呀!

    回覆刪除
  8. 呢排真係好鬼熱...空氣質素又唔好 乜食慾都冇..但又要食喎
    湯飯我都好少食 冬瓜湯我好like
    [版主回覆08/10/2012 19:54:54]空氣質素唔好係真呀,呢個禮拜屋企做清潔時,塊布抹到勁黑!

    回覆刪除
  9. Pandora 香傭講法文2012年8月8日 上午1:33

    想像到好味
    [版主回覆08/10/2012 19:52:41]好味係其次,最重要係易入口囉!

    回覆刪除
  10. 真係熱得緊要唔郁都一身汗呀
    [版主回覆08/10/2012 19:52:01]妳講得無錯呀!

    回覆刪除

  11. [版主回覆08/10/2012 19:51:37]

    回覆刪除