薯仔香草麵包 Potato Herbs Bread

呢兩日都得閒無嘢做，於是就可以瞓到自然醒為止，真係好耐未試過咁歎喇！

 

今日又唔使煮飯，見咁得閒，就郁手整麵包。呢個薯仔香草包其實係參考咗一個甜包食譜整成，除咗麵粉同薯蓉份量比例外，其餘材料都幾乎改頭換面，變成一個鹹包。

 

材料：
蒸熟薯肉  100 克
法國麵包粉  90 克
全麥粉  10 克
糖  15 克
鹽 2 克
即用酵母  3 克
混合香草  適量
蛋液  25 克
水  約 30 克

 

- 先將蒸熟薯肉用叉壓爛成薯蓉，加入麵粉、鹽、糖、香草同酵母混合。

- 加入蛋液拌勻，之後逐少加水攪拌成麵糰。

- 枱面灑粉，放上麵糰，加人適量手粉，輕手搓成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 75 分鐘。

- 麵糰排氣後滾圓，靜置鬆弛 15 分鐘。

- 將麵糰收口向上，壓扁排氣，將上、下、左、右依次向內摺入，之後捏緊收口。

- 麵糰再次滾圓，放上已墊入爐防黏蓆嘅烤盤上，蓋上帆布，發酵 90 分鐘。

- 連同一小杯水，放入已預熱至 200 ℃ 嘅焗爐內，焗約 25 分鐘即成。

-

出爐後放上架上攤凍，切件享用。

焗好出爐時見到個面咁深色，就立刻明白點解原食譜個甜包麵糰要塗上
一層法國白芝士，但其實食譜中相片見到成品都唔淺色得去邊哦！
好彩切開裡面非常之靚，而且濃烈嘅香草味立即湧上，
麵包質地亦因水份高而非常軟熟。

刻意買多啲薯仔做芥末煙肉蛋薯仔沙律，今晚嘅晚餐就有著落喇！

Notes：
- 由於加入薯蓉嘅麵糰非常之濕同黏手，所以需根據實際情況去增減水份用量。

- 麵糰會越搓越濕，最好就係用不斷重覆摺入動作取代搓揉，而且仲會用比較多手粉。

- 成品焗好後會比較深色，所以要不斷留意情況，以免麵包表面焗得太燶。