與 blog 友交流煮食心得，分享生活點滴。
今日老友阿珊到訪，整定啲橙皮藍莓 muffin 招呼佢，
貪佢夠快手、又好味，賣相又見得吓人。
原本諗住拎幾個出去俾阿 York，點知突然收到佢姨媽電話，話佢媽咪
唔記得通知我佢哋去台灣唔上堂，咁 ……… 慳番！
呢個 sablé 酥餅麵糰已經喺 "冷宮" 不見天日咗好長好長時間，皆因原本佢係一個錯誤！！
因為年頭整玻璃曲奇送俾學生時，揀錯咗個 sablé 食譜嚟整，原來呢個 sablé
麵糰係非常軟身， "級" 唔到模，要用過另一個曲奇食譜再整。之但係
成幾百克粉整成嘅麵糰，無理由就咁掉咗去㗎，咪用保鮮紙包好後
掟上冰格保存囉，直到近排摷 "冷宮" 時先再記得番起佢，
咪所以的起心肝整咗佢，費事阻住哂啲空間。
到食哂所有 dark chocolate 之後，迫住要食粒 milk chocolate，食第一啖已經覺得好唔掂，不單只甜到嘔茄，"朕" 奶味仲濃到呢 …… 真係反哂胃咁滯，之後一直再無掂過佢喇！ 
焦糖漿
材料：
糖 50 克
水 2 茶匙
熱水 1 湯匙
- 將糖同水倒入煲內加熱，邊煮邊搖晃煲身直至糖溶。
- 繼續加熱，直至煮到自己想要嘅焦糖色。
- 熄火後倒入熱水，搖晃煲身令焦糖與水能均勻混合。
- 趁熱將焦糖漿倒人容器內。
- 放入雪櫃雪至焦糖凝固，待用。
朱古力布甸
材料：
朱古力 150 克
雞蛋 1 隻
牛奶 100 毫升
即溶咖啡粉 2 茶匙
熱水 1 湯匙
淡忌廉 100 毫升
- 朱古力座熱水溶化；雞蛋拂打成蛋液。
- 牛奶加熱至微暖，然後逐少倒入朱古力內，攪拌均勻。
- 咖啡粉加熱水溶解，倒入朱古力漿內，拌勻。
- 淡忌廉與蛋液混合，之後將朱古力漿逐少拌入。
- 將布甸液過篩到焗盅內，然後排放上烤盤上，烤盤內倒入適量熱水。
- 放入已預熱至 180 ℃ 嘅焗爐內，焗約 30 分鐘至布甸液凝固。
- 出爐攤凍後放入雪櫃雪凍，食前將布甸倒扣於碟上，切件享用。
食譜出自福田淳子嘅《我愛布丁》。
材料份量剛好做到 4 個疏乎厘盅大小嘅布甸，
每次食一杯，又唔需要切件，非常方便。
嘩，嗰隻 milk chocolate 真係恐怖，咁樣整完布甸之後都仲係好甜，
而且食譜中嘅牛奶我已經用清水代替，但個布甸
食出嚟都仲係好大奶味囉！！
唔知點解，我一整無錫排骨，就好自然會整埋上海菜飯！
今次我仲加咗隻指天指落去一齊燜，味道仲正呀！
今次用咗 Winnie 教我嘅方法，喺煲底預先放個竹笪，果然完全無黐底，
京蔥又無燜到燶哂，掂！
人哋會唔會循環再用我就唔知喇，但我就一定唔會囉，
煮完之後索哂豬油，根本無可能洗得番乾淨！！
煮咖喱雞，最好食嘅唔係雞而係薯仔；整薑蔥蟹最好食嘅係薑蔥而唔係蟹；
同樣，呢味無錫排骨最好味嘅唔係排骨，而係墊底嘅京蔥，
索哂啲精華，無得頂呀！
菜飯又易整、又好味，自家製作又可控制
調味料用量，食得更加健康。
想要食譜的話，請參考《無錫排骨》。
上次已經講好咗，再見面時就整 bagel 俾佢，因為佢話佢超愛 bagel，
好彩 bagel 唔使中間發酵，焗嘅時間又短，好快手
就已經整好，唔需要太多時間。
今次除咗黑芝麻，我仲加埋自家製糖漬橙皮落去，又香又甜，
難怪緊張大師 – 小女人話乜嘢都唔加，淨食都好好味。
星期五嗰日又整花生醬，既然新鮮做好，當然即刻用嚟搽麵包食啦！
材料：
急凍雞扒
沙爹醬
檸檬汁
醃料：
生抽
鹽
糖
紹酒
胡椒粉
黃薑粉
咖喱粉
芫荽粉
五香粉
- 雞扒解凍、洗乾淨，用抹手紙索乾水份。
- 將雞扒側邊多餘脂肪切去，之後連皮切成粗條。
- 用醃料醃 2 個鐘或以上至入味。
- 長竹簽浸水，之後將雞肉逐條串好。
- 雞肉串放上烤架上，放入已預熱至 200 ℃ 嘅焗爐內焗10 分鐘。
- 將雞肉串反轉，再焗多 5 – 10 分鐘至雞肉熟透。
- 食前將檸檬汁灑上雞肉串上，之後蘸沙爹醬伴食。
原本將雞肉串放喺烤架上焗係最好嘅，一方面可以上下均勻受熱，多餘油份
又可以滴落架下烤盤，食得健康啲，但係之後洗個架都真係唔易，
所以我都係偷懶放喺搽過油嘅錫紙上算喇！
色、香、味俱全，買相絕對唔差㗎！睇嚟我都可以
推車仔喺街度賣沙爹賺啲外快喎！
Notes：
- 浸過水嘅竹簽可避免於爐內烤焗時烤燶。
- 串雞肉時，竹簽每穿過雞肉一次就將雞肉兜圈繞過竹簽，令雞肉更加牢固於竹簽上，不易移位。
個銀包正正就係我想要的一種，太開心喇！ Winnie 實在太有心思喇！
後面拉鏈位可以放散銀。
雖然無一個正式位置放銀紙，但反正依家都多數用八達通、信用卡
同 EPS，我一般都唔會有太多銀紙喺身，得嗰幾張咁大把，
求其裝埋一齊就算數喇，最緊要方便，一個攪掂哂！
所以我成日都話，朋友唔使多，好嘅朋友，一個已經好足夠！Winnie，多謝妳呀！
提到轉化糖漿，大家即時諗到咩呢？梗係廣式月餅哩！其實除咗整月餅之外，原來都仲有好多用途㗎！
一般用嘅白糖、黃糖同黑糖都係蔗糖嘅一種，喺甘蔗度提煉出嚟，屬於雙醣 (Disaccharide)，即由兩個單醣 (Monosaccharide) 份子所組合而成。喺煮糖漿嘅時候，若果經常攪拌的話，就會不斷將空氣拌入，會做成反砂現象，情況就如製作反砂芋頭時嘅炒糖步驟相同，糖漿就會煮唔成！所以煮糖漿時只可以不時搖晃煲身，使糖漿均勻受熱，切忌攪拌。若果喺煮糖漿嘅時候加入天然果酸一齊煮，經過化學反應，雙醣就會還原轉化成兩個單醣份子，即果糖同葡萄糖，咁樣就唔會再有結晶情況出現，所以轉化糖又會叫做還原糖。
轉化糖漿除咗不會結晶反砂之外，仲可以令到成品質地柔軟，唔易變得乾硬，情況同用金黃糖漿一樣，如果屋企有罐「金獅糖漿」的話，不妨睇一睇個成份，其中一樣係 partially inverted sugar syrup，即部份轉化糖漿。除以上效果之外，轉化糖漿有天然防腐功效，用佢嚟製作嘅食品存放時間可以比較長一啲。轉化糖漿可長時間存放，而且越放得耐就越香醇，存放一年後就成為所謂嘅 “老漿”，風味變得更加香甜味濃，做出嚟嘅月餅味道就會更加香，餅皮更加軟熟濕潤。
材料：
糖 500 克
水 180 毫升
檸檬汁 45 毫升
- 糖同水放入煲內，用中慢火煮至糖溶。
- 加入檸檬汁，繼續中慢火煮至淺啡色。
- 當糖漿煮至 108 – 110 ℃ 時就可以熄火。
- 趁熱將糖漿倒入已經過消毒嘅玻璃樽內，密封存放於陰涼地方。
哈哈，我搵到個陳年古董樽俾大家睇呀！
Notes：
- 煮糖漿時以不超過 115 ℃ 為合，否則冷卻後就會太稠身甚至變硬。
- 天然果酸來源，除檸檬外，亦可用青檸或菠蘿。
- 煮糖漿時會不時濺到煲邊較高位置，可用掃蘸少少水掃過該位置，將糖份溶解再流番入熱糖漿
內，避免因長時間加熱水份蒸發而燒焦。
