蠔豉黃耳燜蘿蔔

          正所謂冬食蘿蔔夏食薑，秋涼後就開始多食蘿蔔，唔知係咪因為白蘿蔔秋冬當做呢，近排買到嘅白蘿蔔特別多水、特別甜。 

 

        今次我就整燜蘿蔔，用咗冬菇、黃耳同蠔豉去燜，啲蘿蔔燜到入哂味，加埋本身嘅清甜，勁好味呀！

 

 

材料：
冬菇
黃耳
枝竹
蠔豉
白蘿蔔
蒜子
八角
月桂葉

調味料：
紹酒
蠔油
老抽
瑞士汁
濃縮雞汁
糖
鹽

麻油
 

- 冬菇同黃耳用水浸發至軟身，剪去硬蒂、洗乾淨，黃耳汆水後過冷河，備用。

- 枝竹浸軟後洗乾淨後切段；蠔豉洗淨；蘿蔔刨皮後切件。

- 燒熱油，先爆香蒜子，之後加入蘿蔔兜炒，灒酒。

- 將其餘材料加入，倒入適量清水及調味料，兜勻。

- 大火將汁料煮滾後轉中慢火，繼續燜至所有材料熟透腍身即可。

- 灑上麻油兜勻後上碟。

 

 

 

整燜餸真係容易又方便，做好哂前期洗洗切切
功夫後 “一鑊熟” 就攪掂。

 

 

 

 

 

 

又用蠔油，又用瑞士汁，又用濃縮雞汁去燜，加上我用嘅
瑞士汁係已經煮過幾次雞翼，想唔好味都幾難囉！

 

 

 

Notes：
- 將黃耳汆水可去除 “噏” 味。

- 枝竹可以遲些少先加入，因為煮得太耐會易爛。 

 

- 燜好之後，若果剩餘好多汁料的話，可用大火煮至收汁或用粟粉水埋薄芡。