和風橘子醋

           我一向都有買日式柚子醋，特別鍾意佢嗰種清新嘅橘香味及淡淡酸味，夏天用嚟整沙律、配冷麵都好正，用嚟醃肉都唔錯，平衡一下肉類嘅油膩感覺。

 

        最近發現，我一直買開「AEON」自家品牌「Topvalu」嗰隻原來唔係柚子醋，係橘類水果醋！因為唔識日文嘛，咪信哂貨架上個產品名稱囉，可能係連職員都唔識日文，哈哈哈哈！！！睇番樽身個英文成份表，原來係用檸檬汁、橙汁同柑汁加日本醬油調製而成，成份咁簡單，自己整都得啦！上網參考過其他網友做法，自己又玩吓先！

 

 

  

材料：
檸檬
青檸
橙
日本醬油
木魚花
味醂
白醋

- 將所有水果刨下部份果皮留用，之後榨汁。

- 醬油倒入煲內，加木魚花及果皮，用中火煲至開始冒煙。

- 熄火後冚蓋焗 10 分鐘，攤凍後過篩隔渣。

- 加入適量果汁、白醋及味醂，調至自己鍾意嘅口味及酸度即成。

 

 

 

我就係參考呢個材料成份嚟做實驗呀！

 

 

加果皮煲熱可以增加橘香氣味，但千祈唔好
連埋白色部份喎，會有苦味㗎。

 

 

 

 

 

我自己就無加木魚花同味醂整喇，因為方便食齋時
都可以用嘛！咁啱今日係觀音誕食齋，
就即刻用嚟撈沙律食哦！

 

 

 

 

Notes：
- 木魚花可用木魚精 / 鰹魚粉代替。

- 無味醂的話，加熱時可加少量糖調味，。

 

- 入樽後最好放雪櫃保存。