2014年9月24日星期三

又中又西

        上次整麵包俾 Ernest,由於時間關係,朝早唔夠時間整好兼出爐攤凍,所以試吓前一晚整好個麵糰,放雪櫃過夜低溫發酵,第二朝起身就處理埋餘下步驟,可以慳番啲時間。但係Ernest 媽咪話番俾我聽,個包唔掂,一切就散開!由於低溫發酵都係第一次嘗試,我自己都未試過,所以前晚就再試多次,睇睇情況點樣。
 
 
 
個亞麻籽合桃包又OK 喎,無事呀,唔通麵包多士麵糰
係唔可以低溫發酵過夜!?由於今日係初一,
所以噚晚整咗個無紅酒、無五辛版嘅
ratatouille配麵包食一流!






噚晚仲煲咗個糖水,有綠豆、麥米、番薯同南瓜,
再加幾片薑,都唔知係咩名堂喇,
總之啱自己口味就算。






        買慣買熟嘅菜檔,依家有好幾隻南瓜賣,中國南瓜賣 $4 斤;中國種嘅日本南瓜,$8 斤;橙色嘅 halloween 南瓜我最憎,得個顏色靚,味道同質地都唔掂,都費鬼事問價;近排就多咗隻迷你版日本南瓜,賣 $12 斤。問阿姐點解賣咁貴,原來係正宗純種日本南瓜喎!呢個比個錫山梨大少少就已經 $9 喇!!





切開之後顏色好靚㗎,切嗰陣時已經覺得好粉、好鬆脆嘅感覺,
之前買過一次食,入口質地都好粉,好好食,但今次煲完
糖水之後,口感好似食緊生水榴槤咁,激死人呀!!





參考食譜:
燕麥包
 
普羅旺斯燴雜菜


6 則留言:

  1. 我第一,應該都有份食喇~~
    低温發酵我整過白方飽都OK喎。
    我發覺依家D瓜果,好多時係未生長到成熟就摘落嚟,所以冇以前D咁好食咖。

    回覆刪除
    回覆
    1. 妳咁醒,實預妳一份啦!

      係囉,真係唔知咩問題。

      妳有無睇芝芝姐個節目呀?原來食節瓜係要越大越好,有前臂咁長,香港賣嘅節瓜仔係未夠熟,無瓜味又唔夠甜!

      刪除
  2. 南瓜我都鐘意食, 不過家人吾like, 一個又太大自己食吾曬, 所以好少買.

    回覆刪除
    回覆
    1. 咁呢個細細個啱妳喎,得拳頭咁大咋!或者買中國南瓜囉,菜檔通常都係開邊賣。

      刪除
  3. 我成日都用低溫發酵,又無試過咁喎~~

    回覆刪除
    回覆
    1. 係囉!咁係咪所有種類麵糰都可以放入雪櫃低溫發酵呢?

      刪除